ບົດວິເຄາະຄາດຄະເນ ເສດຖະກິດຫວຽດນາມເຕີບໃຫຍ່ 5,3% ໄຕມາດສອງປີນີ້
ທະນາຄານສະແຕນດາດຊາຣເຕີ ຄາດຄະເນເສດຖະກິດຫວຽດນາມໄລຍະໄຕມາດສອງ ຫລື ລະຫວ່າງເດືອນເມສາ-ມິຖຸນາຂອງປີີນີ້ ຂະຫຍາຍຕົວ 5,3% ເມື່ອທຽບໃສ່ແບບປີຕໍ່ປີ ເຊິ່ງຫລຸດລົງເລັກໜ້ອຍຈາກການເຕີບໃຫຍ່ 5,7% ໃນໄຕມາດທໍາອິດ ຫລື ລະຫວ່າງເດືອນມັງກອນ-ມີນາຜ່ານມາ.
ວັນທີ 27 ມິຖຸນາ, ສໍານັກຂ່າວຊິນຮົວລາຍງານວ່າ: ທະນາຄານສະແຕນດາດຊາຣເຕີຂອງສິງກະໂປ ຄາດຄະເນຍອດຄ້າຍ່ອຍຂອງຫວຽດນາມ ໄລຍະເດືອນມິຖຸນາຜ່ານມາ ເຕີບໃຫຍ່ 8,2% ເມື່ອທຽບໃສ່ແບບປີຕໍ່ປີ, ແຕ່ຫລຸດລົງຈາກການເຕີບໃຫຍ່ 9,5% ໃນເດືອນພຶດສະພາ, ສ່ວນການສົ່ງອອກຫລຸດລົງມາຢູ່ລະດັບ 14,2% ທຽບໃສ່ແບບປີຕໍ່ປີ.
ຂະນະທີ່ສະພາບເງິນເຟີ້ຂອງຫວຽດນາມ ໃນເດືອນມິຖຸນາຜ່ານມາ ອາດເພີ່ມຂຶ້ນເປັນ 4,5 ທຽບໃສ່ປີຕໍ່ປີ ເຊິ່ງຈະສູງເກີນ 4% ຕິດຕໍ່ກັນເປັນເດືອນທີ 3 ພາຍຫລັງສະພາບເງິນເຟີ້ຂອງຫວຽດນາມຢູ່ລະດັບ 4,4% ໃນເດືອນພຶດສະພາຜ່ານມາ.
ທັງນີ້, ບົດວິເຄາະຂອງທະນາຄານສະແຕນດາດຊາຣເຕີເບິ່ງວ່າ: ເຖິງວ່າມີການຂະຫຍາຍຕົວຊ້າໃນໄຕມາດສອງຜ່ານມາ, ແຕ່ເສດຖະກິດຫວຽດນາມຍັງຢູ່ເສັ້ນທາງຂອງການຟື້ນຕົວ. ເຖິງຢ່າງໃດກໍຕາມ, ຍັງມີຄວາມທ້າທາຍໃນໄຕມາດທີສາມ ຈາກລາຄາອຸປະໂພກ-ບໍລິໂພກເພີ່ມຂຶ້ນ, ເງິນຕາຕ່າງປະເທດອ່ອນຄ່າ ແລະ ອຸປະສົງທົ່ວໂລກອ່ອນຕົວ.
ກ່ອນໜ້ານີ້, ທະນາຄານສະແຕນດາດຊາຣເຕີຄາດຄະເນວ່າ: ເສດຖະກິດຫວຽດນາມຈະເຕີບໃຫຍ່ 6% ໃນໄຕມາດທີສອງ ເຊິ່ງສູງກວ່າການເຕີບໃຫຍ່ 5,66% ໃນໄຕມາດທໍາອິດ.
ລັດຖະບານຫວຽດນາມກໍານົດເປົ້າໝາຍ ຊຸກຍູ້ການເຕີບໃຫຍ່ຂອງລວມຍອດຜະລິດຕະພັນພາຍໃນ (GDP) ຢູ່ລະດັບ 6-6,5% ໃນປີ 2024.
