ຣັດເຊຍມອບລົດບັນທຸກ ປືນອາກາໃຫ້ຟີລິບປິນ
ປະທານາທິບໍດີ ໂຣດຣິໂກ ດູເຕີເຕ ຜູ້ນຳຟີລິບປິນ ຮັບມອບລົດບັນທຸກທາງທະຫານ 20 ຄັນ ແລະ ປືນໄຣເຟິຫລາຍພັນກະບອກຈາກຣັດເຊຍ ຢູ່ທ່າກຳປັ່ນມະນິລາ ໃນວັນທີ 25 ຕຸລາ. ຂະນະທີ່ສອງປະເທດສະຫລອງການພົວພັນທາງທະຫານທີ່ຮັດແໜ້ນຂຶ້ນ.
ສຳນັກຂ່າວເອເອຟພີລາຍງານຈາກນະຄອນຫລວງມະນິລາ ປະເທດຟີລິບປິນ ໃນວັນທີ 25 ຕຸລາວ່າ: ທ່ານ ດູເຕີເຕ ພ້ອມ ພົນເອກ ເອດູອາໂດ ອາໂນ ຜູ້ບັນຊາການທະຫານສູງສຸດຟີລິບປິນ ຮັບມອບອາວຸດລະຫວ່າງເດີນທາງຢ້ຽມຢາມກຳປັ່ນກອງທັບເຮືອຣັດເຊຍ ທີ່ເຂົ້າຈອດຢູ່ທ່າກຳປັ່ນນະຄອນຫລວງມະນິລາ ເຊິ່ງເປັນການເຄື່ອນໄຫວຫລ້າສຸດຂອງການນຳພາປະເທດເຂົ້າຫາຣັດເຊຍ ແລະ ຈີນ ແລະ ຖອຍຫ່າງຈາກອາເມລິກາ.
ພາຍຫລັງການຢ້ຽມຢາມກຳປັ່ນຕໍ່ຕ້ານເຮືອດຳນ້ຳລຳໃຫຍ່ແອດມິຣັດ ພານເຕເລເຢບ, ທ່ານ ດູເຕີເຕ ຮັບມອບລົດບັນທຸກ 20 ຄັນ ແລະ ປືນໄຣເຟີ 5.000 ກະບອກ ພ້ອມລູກປືນ ເພື່ອໃຊ້ໃນພາລະກິດກອງທັບຟີລິບປິນ. ຂະນະທີ່ທ່ານ ເຊີເກ ຊອຍກູ ລັດຖະມົນຕີປ້ອງກັນປະເທດຣັດເຊຍ ສະແດງຄວາມຍິນດີຕໍ່ການຮັດແໜ້ນການພົວພັນລະຫວ່າງສອງປະເທດ.
