ສິງກະໂປຄອງແຊ່ມເມືອງຄຸນນະພາບຊີວິດດີທີ່ສຸດ-ແພງທີ່ສຸດຂອງໂລກປີຫລ້າສຸດ

ລາຍງານຂອງກຸ່ມບໍລິຫານຄວາມໝັ້ນຄົງຊື່ດັງສັນຊາດສະວິດຍົກໃຫ້ສິງກະໂປເປັນເມືອງແພງທີ່ສຸດສໍາລັບການພັກອາໄສ ແລະ ສາມາດຮອງຮັບຄຸນນະພາບຊີວິດດີເດັ່ນທີ່ສຸດໃນໂລກສໍາລັບມະຫາເສດຖີປະຈໍາປີ 2024.

 ບໍລິສັດ ບໍລິຫານຄວາມໝັ້ນຄົງ ແລະ ການລົງທຶນຊັ້ນນໍາ “ຈູເລຍ ແບຣ” ຈາກປະເທດສະວິດ ເປີດເຜີຍລາຍງານ Global Weath and Lifestyle 2024 ເຊິ່ງມີເນື້ອໃນສ່ວນໜຶ່ງເປັນການຈັດອັນດັບເມືອງທີ່ມີຄຸນນະພາບຊີວິດດີທີ່ສຸດ ແລະ ມີລະດັບການໃຊ້ຈ່າຍໃນການໃຊ້ຊີວິດແພງທີ່ສຸດໃນໂລກສໍາລັບມະຫາເສດຖີ ໂດຍໃນປີ 2024 ນີ້ ສິງກະໂປຍັງປະເທດທີ່ຄອງອັນດັບ 1 ຂອງລາຍການນີ້ຢ່າງຕໍ່ເນື່ອງເປັນປີທີ 2.

  ການຈັດອັນດັບເມືອງທີ່ມີການໃຊ້ຈ່າຍ ແພງທີ່ສຸດ ແຕ່ດີເດັ່ນທີ່ສຸດໃນໂລກຂອງ ຈູເລຍ ແບຣ ນັ້ນ ວິເຄາະຈາກຂໍ້ມູນລະດັບຄ່າໃຊ້ຈ່າຍຂອງສິນຄ້າ ແລະ ບໍລິການທີ່ກ່ຽວກັບການໃຊ້ຊີວິດຢ່າງມີຄຸນນະພາບສູງສຸດໃນ 25 ເມືອງຈາກທົ່ວໂລກ ເຊິ່ງໃນປີນີ້ມີການປ່ຽນແປງອັນດັບຂອງເມືອງຈາກປີກ່ອນໆສູງ ເນື່ອງຈາກສະພາບການຜັນຜວນທາງການເງິນ, ຄ່າເງິນໂດລາຂອງອາເມລິກາ ແລະ ສະກຸນເງິນອື່ນໆ ທີ່ເຄີຍແຂງຄ່າໄດ້ຫລຸດຖອຍລົງ, ລາຄາສິນຄ້າ ແລະ ບໍລິການພັດສູງຂຶ້ນ ແລະ ອື່ນໆ.

 ນອກຈາກນີ້, ລາຍງານແຫ່ງການດໍາລົງຊີວິດ ແລະ ຄວາມໝັ້ນຄົງຂອງເສດຖີໂລກສະບັບຫລ້າສຸດຂອງ ຈູເລຍ ແບຣ ຍັງຊີ້ໃຫ້ເຫັນຂໍ້ໜ້າສັງເກດຄື ເມືອງໃນເຂດອາຊີປາຊີຟິກຫລາຍເມືອງ ຕິດຢູ່ໃນອັນດັບສຸດຍອດເມືອງຄຸນນະພາບຊີວິດສູງສຸດ ແລະ ຄ່າໃຊ້ຈ່າຍແພງທີ່ສຸດຂອງໂລກໃນລາຍງານ.

   ນອກຈາກ ສິງກະໂປໄດ້ອັນດັບ 1 ແລ້ວ ຍັງມີຮົງກົງໄດ້ອັນດັບ 2, ຊຽງໄຮ້ ຢູ່ອັນດັບ 4 (ຕົກຈາກອັນດັບ 2 ຂອງປີຜ່ານມາ), ຈາກາຕາຢູ່ອັນດັບ 14 (ຕົກຈາກອັນດັບ 12 ຂອງປີຜ່ານມາ) ແລະ ໂຕກຽວຢູ່ອັນດັບ 23 (ຕົກຈາກອັນດັບ 15 ຂອງປີຜ່ານມາ).

ເຖິງວ່າລາຄາສິນຄ້າ ແລະ ບໍລິການຈະເພີ່ມສູງຂຶ້ນ ກຸ່ມຄົນທີ່ເອີ້ນວ່າ: HNWI (High Net Worth Individual) ຫລື ຜູ້ທີ່ມີຊັບສິນເງິນສົດ ແລະ ເງິນລົງທຶນທີ່ມີມູນຄ່າລວມຫລາຍກວ່າ 1 ລ້ານໂດລາສະຫະລັດ ຂຶ້ນໄປ ຍັງໃຊ້ຈ່າຍຢ່າງເຕັມທີ່ ແລະ ໃນລະດັບທີ່ຫລາຍກວ່າເກົ່າ ໂດຍສະເພາະຄ່າໃຊ້ຈ່າຍດ້ານການດຳລົງຊີວິດເຊັ່ນ: ຄ່າໂຮງແຮມ, ຄ່າອາຫານໃນພັດຕະຄານໄຮເອນ, ຄ່າເສື້ອຜ້າ ແລະ ເຄື່ອງປະດັບແບຣນເນມ.