ລັດຖະບານເຫັນດີໃຫ້ສ້າງນະຄອນຕື່ມອີກ 3 ແຫ່ງ

ລັດຖະບານໄດ້ເຫັນດີສ້າງຕັ້ງນະຄອນຫລວງພະບາງ. ຂະນະດຽວກັນກໍໄດ້ເປັນເອກະພາບດ້ານຫລັກການໃນການສ້າງຕັ້ງນະຄອນໄກສອນພົມວິຫານ ແລະ ນະຄອນປາກເຊຕື່ມອີກ.

ການຕົກລົງເຫັນດີດັ່ງກ່າວມີຂຶ້ນໃນກອງປະຊຸມລັດຖະບານປະຈໍາເດືອນຕຸລາ 2017 ທີ່ຈັດຂຶ້ນໃນວັນທີ 24-25 ນີ້, ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ, ໃນກອງປະຊຸມໄດ້ຄົ້ນຄວ້າພິຈາລະນາ ແລະ ຕົກລົງເຫັນດີໃຫ້ສ້າງຕັ້ງນະຄອນຫລວງພະບາງຕາມການສະເໜີຂອງເຈົ້າແຂວງ ແລະ ສະພາປະຊາຊົນແຂວງຫລວງພະບາງ, ພ້ອມນີ້ກໍໄດ້ຕົກລົງດ້ານຫລັກການໃຫ້ສ້າງຕັ້ງນະຄອນໄກສອນພົມວິຫານ ແລະ ນະຄອນປາກເຊ, ແຕ່ຕ້ອງໄດ້ໃຫ້ອຳນາດການປົກຄອງ ແລະ ສະພາປະຊາຊົນທ້ອງຖິ່ນດັ່ງກ່າວຈົ່ງຮີບຮ້ອນພິຈາລະນາສະເໜີຕາມຂັ້ນຕອນຂອງລະບຽບກົດໝາຍ ເພື່ອໃຫ້ໄດ້ປະກາດສ້າງຕັ້ງເປັນນະຄອນຢ່າງເປັນທາງການພ້ອມກັນກັບນະຄອນຫລວງພະບາງໃນໄວໆນີ້.