ອົດສະຕຣາລີເລັ່ງຊ່ວຍກຽມພ້ອມຮັບມືພະຍາດລະບາດຢູ່ປາຊີຟິກ-ອາຊຽນ

      ວັນທີ 21 ມິຖຸນາ, ສໍານັກຂ່າວຊິນຮົວລາຍງານວ່າ: ອົງການວິໄຈວິທະຍາສາດ ແລະ ອຸດສາຫະກໍາແຫ່ງເຄືອຈັກກະພົບ (CSIRO) ຂອງອົດສະຕຣາລີເປີດເຜີຍແຜນຊ່ວຍເຫລືອກຸ່ມປະເທດໃນປາຊີຟິກ ແລະ ອາຊີຕາເວັນອອກສຽງໃຕ້ (ອາຊຽນ) ກຽມຄວາມພ້ອມຮັບມືພະຍາດລະບາດໃຫ້ດີຍິ່ງຂຶ້ນ.

      CSIRO ຈະໃຊ້ຄວາມຊ່ຽວຊານດ້ານສຸຂະພາບມະນຸດ ແລະ ສຸຂະພາບສັດ ລວມທັງສິ່ງອໍານວຍຄວາມສະດວກລະດັບໂລກ ຊ່ວຍເຫລືອນາໆປະເທດເຊັ່ນ: ຫວຽດນາມ, ຟີຈິ, ອິນໂດເນເຊຍ ແລະ ລາວ ເພີ່ມຂີດຄວາມສາມາດຈໍາແນກ, ຕິດຕາມ ແລະ ຮັບມືເຫດສຸກເສີນດ້ານສຸຂະພາບ.

      ລັດຖະບານອົດສະຕຣາລີລະບຸວ່າ: ແຜນການນີ້ມີມູນຄ່າທັງໝົດ 24.2 ລ້ານໂດລາອົດສະຕຣາລີ ຈະເນັ້ນສ້າງທີມເຈົ້າໜ້າທີ່ແນວໜ້າທີ່ມີທັກສະຖືກຕ້ອງເໝາະສົມກັບການປົກປ້ອງທ້ອງຖິ່ນ.

      ສູນກຽມຄວາມພ້ອມຮັບມືພະຍາດແຫ່ງອົດສະຕຣາລີ (ACDP) ຂອງ CSIRO ຈະໄດ້ຮັບງົບປະມານ 12 ລ້ານໂດລາອົດສະຕຣາລີ ເພື່ອຍົກລະດັບຫ້ອງປະຕິບັດການສຸຂະພາບສັດຢູ່ອາຊີຕາເວັນອອກສຽງໃຕ້, ປັບປຸງການກວດພະຍາດຕິດເຊື້ອໃນພື້ນທີ່ສ່ຽງສູງ ແລະ ຂະຫຍາຍເຄືອຂ່າຍບົ່ງມະຕິພະຍາດພາກສະໜາມໃນປາຊີຟິກ.

      ນອກຈາກນັ້ນ, ແຜນການນີ້ຄວບຄຸມການສ້າງຄວາມເປັນຫຸ້ນສ່ວນທາງການຜະລິດໃໝ່ ເພື່ອເພີ່ມຂີດຄວາມສາມາດຜະລິດວັກຊີນ, ຜະລິດຕະພັນຢາ ແລະ ອຸປະກອນການແພດຢູ່ອາຊີຕາເວັນອອກສຽງໃຕ້.