ນາຍົກລັດຖະມົນຕີ ເຄື່ອນໄຫວຕິດຕາມກວດກາ ແລະ ຊຸກຍູ້ວຽກງານ ຢູ່ແຂວງ ເຊກອງ ແລະ ສາລະວັນ

ວັນທີ 20 ມິຖຸນາ 2024, ທ່ານ ສອນໄຊ ສີພັນດອນ ນາຍົກລັດຖະມົນຕີ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ຊຸກຍູ້ວຽກງານ ຢູ່ແຂວງ ເຊກອງ ແລະ ສາລະວັນ.

ການເຄື່ອນໄຫວຄັ້ງນີ້, ທ່ານ ນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຕິດຕາມກວດກາເບິ່ງສະພາບການພັດທະນາໂຄງການຂຸດຄົ້ນຖ່ານຫີນ ຂອງກຸ່ມບໍລິສັດ ພອນສັກ ຈຳກັດ ທີ່ເມືອງກະລຶມ, ແຂວງເຊກອງ ຊຶ່ງໂຄງການນີ້ມີເນື້ອທີ່ສຳຫລວດ ແລະ ຂຸດຄົ້ນ 700 ກວ່າກິໂລຕາແມັດ ເຊິ່ງຄາດວ່າຈະມີຖ່ານຫີນປະມານ 800 ລ້ານໂຕນ ໂດຍມີແຜນນໍາໃຊ້ຖ່ານຫີນດັ່ງກ່າວ ປະມານ 400 ລ້ານໂຕນ ເຂົ້າໃນໂຄງການໄຟຟ້າພະລັງງານຄວາມຮ້ອນ 1.800 ເມກາວັດ ທີ່ຈະກໍ່ສ້າງຢູ່ເມືອງກະລຶມ ໃນໄລຍະປີ 2025-2030 ແລະ ອີກ 400 ລ້ານໂຕນ ແມ່ນເພື່ອຂາຍຢູ່ພາຍໃນ ແລະ ຕ່າງປະເທດ.

ທ່ານ ນາຍົກລັດຖະມົນຕີ ໄດ້ເນັ້ນໃຫ້ຜູ້ພັດທະນາໂຄງການສືບຕໍ່ເອົາໃຈໃສ່ພັດທະນາໂຄງການຂອງຕົນ ໃຫ້ມີຄວາມຄືບໜ້າຕາມແຜນທີ່ກຳນົດໄວ້ໃນແຕ່ລະໄລຍະ ແລະ ສອດຄ່ອງຕາມກົດໝາຍ, ລະບຽບການທີ່ກ່ຽວຂ້ອງ; ເອົາໃຈໃສ່ຕໍ່ບັນຫາຜົນກະທົບທາງດ້ານສິ່ງແວດລ້ອມ ແລະ ສັງຄົມ, ປະກອບສ່ວນພັດທະນາໂຄງລ່າງພື້ນຖານຂອງທ້ອງຖິ່ນ ໃຫ້ຫລາຍຂຶ້ນຕື່ມ ໂດຍສະເພາະເສັ້ນທາງຄົມມະນາຄົມ, ການສົ່ງເສີມການຜະລິດ, ການປັບປຸງຊີວິດການເປັນຢູ່ຂອງປະຊາຊົນ ແລະ ອື່ນໆ.

ຕອນບ່າຍວັນດຽວກັນ, ທ່ານ ນາຍົກລັດຖະມົນຕີ ແລະ ຄະນະ ກໍໄດ້ສືບຕໍ່ໄປຢ້ຽມ ແລະ ຕິດຕາມສະພາບການບໍລິການເຂົ້າ-ອອກເມືອງ ຢູ່ດ່ານສາກົນລະໄລ ທີ່ເມືອງສະໝ້ວຍ, ແຂວງສາລະວັນ ເຫັນວ່າໄລຍະ 6 ເດືອນ ຕົ້ນປີ 2024 ມີຄົນເຂົ້າເມືອງ ທັງໝົດ 36,396 ເທື່ອຄົນ, ຄົນອອກເມືອງ 40,346 ເທື່ອຄົນ; ການເກັບລາຍຮັບ ໄດ້ຫຼາຍກວ່າ50 ຕື້ກີບ ເທົ່າກັບ 61% ຂອງແຜນການປີ; ສິນຄ້ານຳເຂົ້າ ສ່ວນໃຫຍ່ແມ່ນນໍ້າມັນເຊື້ອໄຟ, ຝຸ່ນວິທະຍາສາດ, ເຄື່ອງອຸປະໂພກ-ບໍລິໂພກ ແລະ ອື່ນໆ; ສິນຄ້າສົ່ງອອກສ່ວນໃຫຍ່ແມ່ນຖ່ານຫີນ ແລະ ຜະລິດຕະພັນກະສິກຳ ເປັນຕົ້ນ: ມັນຕົ້ນ, ຢາງພາລາ, ໝາກມ່ວງຫິມະພານ ແລະ ອື່ນໆ.

ໂອກາດນີ້, ທ່ານ ນາຍົກລັດຖະມົນຕີ ໄດ້ຊີ້ນຳໃຫ້ຮີບຮ້ອນສຳຫລວດວັດແທກຂອບເຂດທີ່ດິນຂອງດ່ານ ເພື່ອອອກໃບຕາດິນຕາມລະບຽບການ; ສົມທົບກັບຂະແໜງໂຍທາທິການ ແລະ ຂົນສົ່ງ ໃນການສຳຫລວດອອກແບບໂຄງລ່າງພື້ນຖານຂອງດ່ານຕາມມາດຖານເຕັກນິກທີ່ກຳນົດໄວ້ ທັງນີ້ ກໍເພື່ອເປັນພື້ນຖານໃຫ້ແກ່ການພັດທະນາໂຄງລ່າງພື້ນຖານຂອງດ່ານໃຫ້ມີຄວາມວ່ອງໄວ, ທັນສະໄໝ, ໄດ້ມາດຕະຖານ ແລະ ຮັບປະກັນຄວາມຍືນຍົງ.