ປກສ ອຸດົມໄຊ ຈັບກຸ່ມຄ້າຢາເສບຕິດ 5 ຄົນ ພ້ອມຢຶດເງິນສົດທັງກີບ, ບາດ ແລະ ຢວນ ລວມຫລາຍສິບຕື້ກີບ

ວັນທີ 20 ມິຖຸນາ 2024, ຂ່າວ ປກສ ແຂວງອຸດົມໄຊ ລາຍງານວ່າ: ໃນເວລາ 6 ໂມງເຊົ້າ ຂອງວັນທີ 11 ມິຖຸນານີ້ ເຈົ້າໜ້າທີ່ວິຊາສະເພາະໄດ້ເຂົ້າມ້າງ ແລະ ກັກຕົວເປົ້າໝາຍຄ້າຂາຍຢາເສບຕິດ ແລະ ອາວຸດເຖື່ອນ ຢູ່ 2 ຈຸດ ທີ່ບ້ານໝູຕື່ນ ເມືອງນາໝໍ້ ໄດ້ຕົວຜູ້ກະທຳຜິດ5 ຄົນ ພ້ອມຢຶດຂອງກາງຢາເສບຕິດ, ເງິນກີບ, ເງິນຢວນ, ແລະ ເງິນບາດ ເປັນຈຳນວນຫລາຍ.

ຈຸດເປົ້າໝາຍທີ 1: ກັກຕົວເປົ້າໝາຍໄດ້ 4 ຄົນຄື: ທ້າວ ສາເຈີ ອາຍຸ 54 ປີ, ທ້າວ ເຈີພູ ອາຍຸ 27 ປີ, ທ້າວ ເຈີເຕີ ອາຍຸ 26 ປີ, ທ້າວ ລີເຊີ ອາຍຸ 24 ປີ ເປັນ ພໍ່ລູກກັນ ຢູ່ບ້ານໝູຕືນ ເມືອງນາໝໍ້ ແຂວງອຸດົມໄຊ. ພ້ອມດ້ວຍຂອງກາງ ເປັນຢາຝິ່ນ 2 ກ້ອນ, ນ້ຳໜັກຫຼາຍກວ່າ 437 ກຣາມ, ເງິນກີບ 90,000,000 ກີບ, ເງິນຢວນ 5,135,637 ຢວນ, ເງິນບາດໄທ 251,000 ບາດ, ປື້ມບັນຊີ 5 ຫົວ, ບັດ ATM 2 ບັດ, ລູກປືນ AK 28 ລູກ, ລູກປືນ ກາມ້າ 4 ລູກ, ລົດປຣາໂດ ສີຂາວມຸກ 1 ຄັນ, ລົດກະບະລີໂວ 2 ຄັນ ແລະ ໂທລະສັບ 2 ເຄື່ອງ.

ຈຸດເປົ້າໝາຍທີ 2: ກັກຕົວໄດ້ 1 ຄົນຄື: ທ້າວ ສໍຕໍ ອາຍຸ 27 ປີ, ປະຊາຊົນ ຢູ່ບ້ານ ໝູຕືນ ເມືອງນາໝໍ້, ແຂວງ ອຸດົມໄຊ; ເຄື່ອງຂອງກາງ ປືນສັ້ນ ຍີ່ຫໍ້ RAMBO (ແລັມໂບ) 1 ກະບອກ, ລູກກະສູນ 4 ລູກ, ເງິນຢວນ 384,200 ຢວນ, ໝື້ໝາກຟ່າ 2 ຫລອດ, ແກັບໝາກຟ່າ 4 ດອກ, ປື້ມເງິນຝາກປະຢັດ 1 ຫົວ, ໂທລະສັບ 3 ເຄື່ອງ.

ປັດຈຸບັນຄະດີດັ່ງກ່າວເຈົ້າໜ້າທີ່ພວມສືບຕໍ່ດໍາເນີນການສືບສວນ-ສອບສວນ ຂະຫຍາຍຜົນຫາກຸ່ມຜູ້ຮ່ວມຂະບວນການ ເພື່ອນຳຕົວມາດຳເນີນຄະດີຕາມກົດໝາຍ.