ທ່ານ ເນທັນຢາຮູ ຍຸບຄະນະລັດຖະບານສົງຄາມອິດສະລາແອນ
ທ່ານ ເບັນຈາມິນ ເນທັນຢາຮູ ນາຍົກລັດຖະມົນຕີອິດສະລາແອນ ຕັດສິນໃຈຍຸບຄະນະລັດຖະບານສົງຄາມ ເຊິ່ງມີບົດບາດສໍາຄັນໃນການຂັບເຄື່ອນ ແລະ ກໍານົດທິດທາງການເຮັດສົງຄາມອິດສະລາແອນ-ຮາມັດຢູ່ເຂດກາຊາ.
ການຕັດສິນໃຈດັ່ງກ່າວຂອງຜູ້ນໍາອິດສະລາແອນມີຂຶ້ນພຽງໜຶ່ງອາທິດຫລັງຈາກທ່ານ ເບັນນີ ແກນ ຜູ້ນໍາຝ່າຍຄ້ານຄົນສໍາຄັນຖອນຕົວຈາກຄະນະລັດຖະບານສົງຄາມ ໂດຍອ້າງເຖິງຄວາມລົ້ມເຫລວຂອງທ່ານ ເນທັນຢາຮູ ໃນການສ້າງກົນລະຍຸດສົງຄາມຢູ່ກາຊາ ແລະ ການປົກຄອງເຂດກາຊາໃນອະນາຄົດ.
ເບື້ອງຕົ້ນຍັງບໍ່ຮູ້ແນ່ນອນວ່າ: ທ່ານ ເນທັນຢາຮູ ຈະປຶກສາໃຜເປັນພິເສດກ່ຽວກັບການເຮັດສົງຄາມອິດສະລາແອນ-ຮາມັດ ເຊິ່ງປັດຈຸບັນກໍາລັງເຂົ້າສູ່ເດືອນທີ 9 ໂດຍທາງການອິດສະລາແອນລະບຸວ່າ: ຄະນະລັດຖະບານຄວາມໝັ້ນຄົງຈະຕັດສິນໃຈເລື່ອງຕ່າງໆ ທີ່ກ່ຽວຂ້ອງກັບສົງຄາມຕໍ່ໄປ. ຂະນະທີ່ບັນຫາສໍາຄັນ, ທ່ານ ເນທັນຢາຮູ ອາດປະຊຸມ ເພື່ອຫາລືກ່ຽວກັບບັນຫາລະອຽດອ່ອນທີ່ກ່ຽວຂ້ອງກັບການເຮັດສົງຄາມກັບກຸ່ມຮາມັດ.
ຄະນະລັດຖະບານສົງຄາມສ້າງຕັ້ງຂຶ້ນ 5 ວັນພາຍຫລັງກຸ່ມຮາມັດເລີ່ມຕົ້ນໂຈມຕີອິດສະລາແອນ ໃນວັນທີ 7 ຕຸລາປີຜ່ານມາ ເພື່ອຮັບມືສະຖານະການສຸກເສີນ ເນື່ອງຈາກສົງຄາມ ແລະ ຄວາມຂັດແຍ່ງຢູ່ເຂດກາຊາ.
ທ່ານ ແກນ ລະບຸວ່າ: ທ່ານ ເນທັນຢາຮູ ຂັດຂວາງບໍ່ໃຫ້ພວກເຮົາກ້າວໄປສູ່ໄຊຊະນະທີ່ແທ້ຈິງ ກ່ອນຈະປະກາດລາອອກຈາກຄະນະລັດຖະບານສົງຄາມໃນວັນທີ 9 ມິຖຸນາຜ່ານມາ ໂດຍມີທ່ານ ກາດີ ໄອເຊນຄອດ ສະມາຊິກລັດຖະສະພາອິດສະລາແອນ ແລະ ເສນາທິການກອງກໍາລັງອິດສະລາແອນ (IDF) ຖອນຕົວນໍາທ່ານ ແກນ ໄປອີກຄົນໜຶ່ງ.
ນັກວິເຄາະຄາດຄະເນວ່າ: ທ່ານ ເນທັນຢາຮູ ກໍາລັງຜະເຊີນແຮງກົດດັນຈາກຫລາຍທິດທາງ ແລະ ການສັ່ງຍຸບຄະນະລັດຖະບານສົງຄາມອິດສະລາແອນໃນຄັ້ງນີ້ຈະສົ່ງຜົນຕໍ່ທິດທາງການເຮັດສົງຄາມອິດສະລາແອນ-ຮາມັດຢູ່ເຂດກາຊາບໍ່ຫລາຍກໍໜ້ອຍ.
ອ້າງອີງ:
- https://edition.cnn.com/2024/06/17/middleeast/netanyahu-disbands-israeli-war-cabinet-intl/index.html
- https://www.aljazeera.com/news/2024/6/17/israels-netanyahu-dissolves-war-cabinet
- https://www.reuters.com/world/middle-east/netanyahu-disbands-his-inner-war-cabinet-israeli-official-says-2024-06-17/
