ປກສ ເມືອງທ່າແຕງ ສຶກສາອົບຮົມກຸ່ມໄວໜຸ່ມ 9 ຄົນ ທີ່ແກວ່ງກ້ອນຫີນໃສ່ເຮືອນປະຊາຊົນ

ວັນທີ 7 ມິຖຸນາ 2024, ເຈົ້າໜ້າທີ່ພະແນກຕຳຫລວດ ໝ່ວຍງານ ສືບສວນ-ສອບສວນ ປກສ ເມືອງ ທ່າແຕງ ແຂວງ ເຊກອງ ໄດ້ນຳເອົາກຸ່ມໄວໜຸ່ມອັນຕະພານ 9 ຄົນ ຄື: ທ້າວ ຮຽງ ອາຍຸ 19 ປີ, ທ້າວ ສຸກີ້ ອາຍຸ 25 ປີ,ທ້າວ ໂຍຍ ອາຍຸ 25 ປີ, ທ້າວ ອຸບ ອາຍຸ 22 ປີ, ທ້າວ ທຸບ ອາຍຸ 17 ປີ,ທ້າວ ອາກົດ ອາຍຸ 19 ປີ, ທ້າວ ຮັບ ອາຍຸ 19 ປີ, ທ້າວ ອາໂບະ ອາຍຸ 18 ປີ ແລະ ທ້າວ ໂລະ ອາຍຸ 18 ປີ. ມາສຶກສາອົບຮົມ.

ພັນໂທ ສົມຈັນ ທຳມະວົງສາ ຮອງກອງບັນຊາການ ປສກ ເມືອງ ທ່າແຕງ ລາຍງານວ່າ: ເມື່ອວັນທີ 16 ເມສາ 2024 ຜ່ານມາ ເຈົ້າໜ້າທີ່ ປກສ ເມືອງ ທ່າແຕງ ໄດ້ຮັບແຈ້ງຄວາມຈາກປະຊາຊົນບ້ານໝອງກັນ ເມືອງ ທ່າແຕງ ເຊິ່ງເປັນຜູ້ເສຍຫາຍແຈ້ງວ່າ ມີກຸ່ມໄວໜຸ່ມບ້ານທົ່ງຫວາຍແກວ່ງກ້ອນຫີນໃສ່ເຮືອນຂອງຕົນ ແລະ ມີສຽງປືນແຕກຂຶ້ນ 1 ນັດ. ຈາກນັ້ນ ເຈົ້າໝ້າທີ່ຈຶ່ງລົງເກັບກຳຂໍ້ມູນເຫັນວ່າມີມູນຄວາມຈິງ ແລະ ໄດ້ກັກຕົວກຸ່ມໄວໜຸ່ມອັດຕະພານມາສຶກສາອົບຮົມກ່າວເຕືອນ, ພ້ອມທັງຮຽກຮ້ອງໃຫ້ອຳນາດການປົກຄອງບ້ານ ຜູ້ປົກຄອງເອົາໃຈສຶກສາອົບຮົມຕິດຕາມການເຄື່ອນໄຫວລູກຫລານຂອງຕົນເອງບໍ່ໃຫ້ມີການເຄືອນໄຫວກະທຳຜິດ ແລະ ສ້າງຄວາມບໍ່ສະຫງົບໃນສັງຄົມບ້ານເມືອງ.