ນະຄອນຫລວງຮ່າໂນ້ຍອອກຄໍາສັ່ງເຂັ້ມງວດ ຄວບຄຸມການຄ້າຊີ້ນໝາ-ຊີ້ນແມວ

      ນະຄອນຫລວງຮ່າໂນ້ຍຂອງຫວຽດນາມ ອອກຄໍາສັ່ງໃຫ້ຢຸດການຄ້າຂາຍຊີ້ນໝາ ແລະ ຊີ້ນແມວທົ່ວເມືອງ ເພື່ອປົກປ້ອງສຸຂະພາບຂອງປະຊາຊົນ ລະ ສົ່ງເສີມແນວທາງປະຕິບັດທີ່ຖືກຕ້ອງຕາມຈະລິຍະທໍາຫລາຍຂຶ້ນ.

      ວັນທີ 9 ມິຖຸນາ, ສໍານັກຂ່າວຕ່າງປະເທດລາຍງານວ່າ: ຄໍາສັ່ງຂອງກົມສັດຕະວະບານ, ການປະມົງ ແລະ ບໍລິການສັດຕະວະແພດຂອງນະຄອນຫລວງຮ່າໂນ້ຍ ກໍານົດກົນລະຍຸດຫລາກຫລາຍແນວທາງ ເຊິ່ງກ່ຽວຂ້ອງກັບການບັງຄັບໃຊ້ກົດໝາຍຢ່າງເຂັ້ມງວດ ລວມທັງການຮ່ວມມືລະຫວ່າງໜ່ວຍງານລັດຖະບານຫລາຍແຫ່ງ ແລະ ທີມກວດສອບເຄື່ອນທີ່.

      ຄໍາສັ່ງດັ່ງກ່າວລະບຸເຖິງຄວາມສ່ຽງຮ້າຍແຮງທີ່ເກີດຈາກການລະບາດຂອງພະຍາດວໍ້ທົ່ວປະເທດເມື່ອບໍ່ດົນມານີ້, ພ້ອມເນັ້ນເຖິງຄວາມຈໍາເປັນຮີບດ່ວນໃນການປ້ອງກັນວິກິດດ້ານສາທາລະນະສຸກເບື້ອງຕົ້ນຢູ່ນະຄອນຫລວງຮ່າໂນ້ຍ ໂດຍຈຸດສໍາຄັນຕົ້ນຕໍຂອງຄໍາສັ່ງຄື: ການເພີ່ມອັດຕາການສັກວັກປີກປ້ອງກັນພະຍາດວໍ້ໃຫ້ຫລາຍກວ່າ 90% ໃນກຸ່ມປະຊາກອນໝາ ແລະ ແມວທີ່ເປັນສັດລ້ຽງ ຜ່ານການດໍາເນີນງານຮ່ວມກັນຂອງໜ່ວຍງານສັດຕະວະແພດ.

      ນອກຈາກນີ້, ຄໍາສັ່ງຍັງກໍານົດໃຫ້ມີການກວດສອບຢ່າງເຂັ້ມງວດ ແລະ ການລົງໂທດທີ່ຮຸນແຮງສໍາລັບການຄ້າ, ການຂົນສົ່ງ, ການຂ້າ ຫລື ການຂາຍໝາ ແລະ ແມວຢ່າງຜິດກົດໝາຍ ເພື່ອນໍາໄປຜະລິດເປັນຊີ້ນສັດ ເຊິ່ງທີມກວດສອບຈະຖືກສົ່ງໄປປະຈໍາການຕາມເສັ້ນທາງຂົນສົ່ງທີ່ສໍາຄັນ ເພື່ອສະກັດກັ້ນ ແລະ ຢັບຢັ້ງການເຄື່ອນຍ້າຍໝາ ແລະ ແມວທີ່ມີຊີວິດຢູ່ ໂດຍບໍ່ໄດ້ຮັບອະນຸຍາດ.

      ຍິ່ງໄປກວ່ານັ້ນ, ຄໍາສັ່ງໃໝ່ໄດ້ຮຽກຮ້ອງການປຸກລະດົມສ້າງຄວາມຕື່ນຕົວຕໍ່ສາທາລະນະຊົນຢ່າງກວ້າງຂວາງ ໂດຍໃຊ້ສື່ມວນຊົນເພື່ອໃຫ້ຄວາມຮູ້ແກ່ປະຊາຊົນ ກ່ຽວກັບອັນຕະລາຍຂອງພະຍາດວໍ້, ຄວາມຈໍາເປັນໃນການຈັດການສັດລ້ຽງຢ່າງຮັບຜິດຊອບ ແລະ ບໍ່ສົ່ງເສີມການບໍລິໂພກຊີ້ນໝ ແລະ ຊີ້ນແມວ.