ອິດສະລາແອນໂຈມຕີໂຮງຮຽນ-ຄ້າຍຜູ້ລີ້ໄພ ໃນວັນຄົບຮອບ 9 ເດືອນສົງຄາມກາຊາ
ໂຮງຮຽນຂອງສະຫະປະຊາຊາດ ແລະ ຄ້າຍຜູ້ລີ້ໄພຢູ່ພາກກາງຂອງເຂດກາຊາ ເປັນເປົ້າໝາຍການໂຈມຕີທາງທະຫານຂອງອິດສະລາແອນ ເຊິ່ງເກີດຂຶ້ນໃນໄລຍະຄົບຮອບ 9 ເດືອນ ສົງຄາມຢູ່ເຂດກາຊາ.
ວັນທີ 8 ມິຖຸນາ, ສໍານັກຂ່າວຕ່າງປະເທດລາຍງານວ່າ: ກອງທັບອິດສະລາແອນອອກຖະແຫລງການວ່າ: ປະຕິບັດການໂຈມຕີທາງອາກາດຢູ່ໂຮງຮຽນຂອງສໍານັກງານບັນເທົາທຸກ ແລະ ຈັດຫາງານຂອງສະຫະປະຊາຊາດ ສໍາລັບຜູ້ລີ້ໄພປາແລັສຕິນຢູ່ຕາເວັນອອກໃກ້ (UNRWA) ໃນເມືອງນູໄຊຣັດ ທາງຕອນກາງຂອງເຂດກາຊາ ໃນວັນທີ 6 ມິຖຸນາຜ່ານມາ ເກີດຂຶ້ນຕາມຂໍ້ມູນຂ່າວທີ່ລະບຸວ່າ: ມີສະມາຊິກກຸ່ມຮາມັດລີ້ຊ້ອນຢູ່ໃນໂຮງຮຽນ.
ຂໍ້ມູນຂອງກອງທັບອິດສະລາແອນຢືນຢັນວ່າ: ການໂຈມຕີດັ່ງກ່າວສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 17 ຄົນ ທັງໝົດເປັນສະມາຊິກກຸ່ມຮາມັດ. ເຖິງຢ່າງໃດກໍຕາມ, ໂຮງໝໍໃນພື້ນທີ່ລາຍງານວ່າ: ຈໍານວນຜູ້ເສຍຊີວິດເພີ່ມເປັນ “ຫລາຍກວ່າ 40 ຄົນ” ແລະ ມີຜູ້ໄດ້ຮັບບາດເຈັບອີກຈໍານວນຫລາຍ ໂດຍຜູ້ເຄາະຮ້າຍສ່ວນຫລາຍເປັນເດັກ ແລະ ຜູ້ຍິງ ທີ່ອາໄສໂຮງຮຽນເປັນສະຖານທີ່ຫລົບໄພ.
ນອກຈາກນີ້, ກອງທັບອິດສະລາແອນປະຕິບັດການໂຈມຕີທາງອາກາດ ຢູ່ຄ້າຍຜູ້ລີ້ໄພ ໃນເມືອງເດອີ ອັລ-ບາລາ ທາງຕອນກາງຂອງເຂດກາຊາ ໃນວັນທີ 7 ມິຖຸນາຜ່ານມາ ເຊິ່ງເປັນວັນຄົບຮອບການເກີດສົງຄາມທີ່ຍືດເຍື້ອເຂົ້າສູ່ເດືອນທີ 9 ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 6 ຄົນ.
ທັງນີ້, ການຍືດເຍື້ອຂອງສົງຄາມ ແລະ ສະພາບຄວາມເສຍຫາຍ ທີ່ເກີດຂຶ້ນເປັນວົງກວ້າງຢູ່ເຂດກາຊາ ຍິ່ງເພີ່ມແຮງກົດດັນໃຫ້ອິດສະລາແອນຢ່າງຕໍ່ເນື່ອງ ຈາກສຽງຮຽກຮ້ອງຂອງປະຊາຄົມໂລກທີ່ເພີ່ມຂຶ້ນ ໃນການໃຫ້ຢຸດສົງຄາມ ແລະ ປະເທດໃນເອີຣົບຮັບຮອງອະທິປະໄຕຂອງປາແລັສຕິນເພີ່ມຂຶ້ນ ໂດຍແອັສປາຍ, ອຽກລັງ, ນອກແວ ແລະ ສະໂລວານີ ປະກາດອອກມາໃນເວລາໄລ່ລຽງກັນ.
