ທ່ານ ອາເບະ ແລະ ທ່ານ ທຣຳ ຕົກລົງກັນວ່າ ຈະກົດດັນ ສປປ ເກົາຫລີ ໃຫ້ໜັກຂຶ້ນ
October 24, 2017 - 10:23 AM
ຮອງໂຄສົກລັດຖະບານຍີ່ປຸ່ນຖະແຫລງວ່າ: ນາຍົກລັດຖະມົນຕີ ຊິນໂຊ ອາເບະ ຂອງຍີ່ປຸ່ນ ແລະ ປະທານາທິບໍດີ ໂດນັນ ທຣຳ ຜູ້ນຳອາເມລິກາ ໄດ້ຕົກລົງວ່າ: ຈະປະສານການຮ່ວມມືກັນໃນການກົດດັນ ສປປ ເກົາຫລີ ໃຫ້ຫລາຍຂຶ້ນ.
ທ່ານ ຢາສີໂທຊິ ນິຊິມູຣະ ຮອງເລຂາທິການຄະນະລັດຖະບານຍີ່ປຸ່ນ ຖະແຫລງໃນວັນທີ 23 ຕຸລາວ່າ: ທ່ານ ອາເບະ ແລະ ທ່ານ ທຣຳ ໄດ້ເຈລະຈາກັນທາງໂທລະສັບ ພາຍຫລັງລາຍງານຜົນຢ່າງບໍ່ເປັນທາງການກ່ອນໜ້ານີ້ປາກົດວ່າ: ພັກຮ່ວມລັດຖະບານຂອງນາຍົກລັດຖະມົນຕີ ອາເບະ ໄດ້ຮັບໄຊຊະນະຢ່າງລົ້ນເຫລືອໃນການເລືອກຕັ້ງທົ່ວໄປໃນວັນທີ 22 ຕຸລາ. ທ່ານ ນິຊິມູຣະ ກ່າວຕໍ່ສື່ມວນຊົນວ່າ: ທ່ານ ອາເບະ ແລະ ທ່ານ ທຣຳ ມີແຜນຈະຫລິ້ນກ໊ອຟນຳກັນໃນວັນທີ 5 ພະຈິກ ລະຫວ່າງທີ່ຜູ້ນຳອາເມລິກາຢ້ຽມຢາມຍີ່ປຸ່ນເປັນເທື່ອທຳອິດ.
