ຈັບກຸ່ມແກ້ງຮ່ວມກັນປຸ້ນເອົາລົດຈັກ 4 ຄົນ ຢູ່ແຂວງສາລະວັນ ມາດຳເນີນຄະດີ

ຂ່າວ ປກສ ແຂວງສາລະວັນ ລາຍງານ ວັນທີ 29 ພຶດສະພາ 2024 ວ່າ: ເມື່ອທ້າຍເດືອນມີນາ 2024 ຜ່ານມາ, ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງສາລະວັນ ໄດ້ນຳຕົວໄວລຸ້ນ 4 ຄົນ ທີ່ຮ່ວມກັນປຸ້ນເອົາລົດຈັກ ຄື: ທ້າວ ຄຳຈັນ ອາຍຸ 20 ປີ ຢູ່ບ້ານນາຂ້ອຍສາວ, ທ້າວ ແອນ້ອຍ ອາຍຸ 17 ປີ,ທ້າວ ສີສົມພອນ ອາຍຸ 15 ປີ ທັງ 2 ຄົນນີ້ຢູ່ບ້ານນາໄຊນ້ອຍ ແລະ ທ້າວ ໂຊນິກ ອາຍຸ 19 ປີ ຢູ່ບ້ານສະໂປນ ເມືອງສາລະວັນ ແຂວງສາລະວັນ. ມາດຳເນີນສອບສວນດຳເນີນຄະດີຕາມກົດໝາຍ.

ຜ່ານການສອບສວນ ພວກກ່ຽວຮັບສາລະພາບວ່າ: ໄດ້ຮ່ວມກັນເຄື່ອນໄຫວປຸ້ນເອົາລົດຈັກ ຢູ່ຕາມເສັ້ນທາງເລກທີ 20, ເລກທີ 15A, 15B ແລະ ເສັ້ນທາງຮ່ອມ ບໍລິເວນອະນຸສອນສະຖານອົງແກ້ວ-ສວນສາທາລະນະ ແລະ ຄັ້ງລ່າສຸດໄດ້ຮ່ວມກັນປຸ້ນເອົາຈັກຂອງຜູ້ເສຍຫາຍເປັນຍິງສາວ 3 ຄົນ ຂັບຂີ່ຊ້ອນກັນມາ, ໂດຍໃຊ້ຮູບການຂັບຂີ່ລົດຈັກແນບຂ້າງລົດຈັກເປົ້າໝາຍປຸ້ນ ແລ້ວໃຊ້ຕີນຢັນລົດຈັກຄັນດັ່ງກ່າວ ໃຫ້ເສຍຫລັກລົ້ມລົງຂ້າງທາງ ແລ້ວກໍໃຊ້ມີດ ແລະ ງ້າວ ລົງໄປນາບຂູ່ ເຮັດໃຫ້ຜູ້ເສຍຫາຍຢ້ານກົວແລ້ວແລ່ນຫລົບໜີ. ສ່ວນລົດຈັກທີ່ປຸ້ນມາໄດ້ກໍນຳໄປຂາຍເມື່ອໄດ້ເງິນມາກໍແບ່ງປັນກັນໃຊ້ຈ່າຍຫລີ້ນກິນຟູມເຟືອຍຈົນໝົດ.

ປັດຈຸບັນ, ຄະດີດັ່ງກ່າວເຈົ້າໜ້າທີ່ພະແນກສືບສວນ-ສອບສວນ ປກສ ແຂວງສາລະວັນ ພວມສອບສວນຂະຫຍາຍຜົນໃຫ້ລະອຽດ ເພື່ອຕິດຕາມເກັບກູ້ລົດຈັກທີ່ພວກກ່ຽວປຸ້ນໄປຂາຍມາມອບຄືນໃຫ້ເຈົ້າຂອງເດີມ ແລະ ສະຫລຸບສຳນວນຄະດີສົ່ງໃຫ້ອົງການໄອຍະການ ສັ່ງຟ້ອງສານຕັດສິນລົງໂທດຕາມກົດໝາຍ.