ທ່ານ ເນທັນຢາຮູ ກ່າວວ່າ ເດີນໜ້າເຮັດສົງຄາມຕໍ່ ເຖິງວ່ານາໆຊາດປະນາມການໂຈມຕີຢູ່ຣາຟາ

      ຂໍ້ມູນຈາກກະຊວງສາທາລະນະສຸກຢູ່ກາຊາລະບຸວ່າ: ມີຜູ້ເສຍຊີວິດຢ່າງໜ້ອຍ 45 ຄົນ ເຊິ່ງສ່ວນຫລາຍເປັນພົນລະເຮືອນ ຈາກການຖືກອິດສະລາແອນໂຈມຕີທາງອາກາດຢູ່ເມືອງຣາຟາ ໃນວັນທີ 26 ພຶດສະພາຜ່ານມາ. ນອກຈາກນີ້ ຍັງມີຜູ້ບາດເຈັບອີກຫລາຍຮ້ອຍຄົນຈາກໄຟໄໝ້, ກະດູກຫັກ ແລະ ລູກປືນ.

     ການໂຈມຕີດັ່ງກ່າວເກີດຂຶ້ນບໍ່ເທົ່າໃດວັນ ພາຍຫລັງສານຍຸຕິທໍາສາກົນ (ICJ) ມີຄໍາສັ່ງໃຫ້ອິດສະລາແອນຢຸດປະຕິບັດການທາງທະຫານຢູ່ຣາຟາທັນທີ ທ່າມກາງວິກິດດ້ານມະນຸດສະທໍາທີ່ຢູ່ໃນຂັ້ນ “ຫາຍະນະ”, ແຕ່ອິດສະລາແອນອ້າງວ່າ: ການໂຈມຕີຄັ້ງນີ້ໝາຍປິດຊີບກຸ່ມຮາມັດ ເຊິ່ງມີຜູ້ນໍາຮາມັດເສຍຊີວິດ 2 ຄົນ.

     ຫລ້າສຸດ, ທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະລາແອນ ປະກາດຕໍ່ລັດຖະສະພາວ່າ: ການໂຈມຕີຈະຍັງດໍາເນີນຕໍ່ໄປ ແລະ ຈະບໍ່ຢຸດເຮັດສົງຄາມກັບຮາມັດຈົນກວ່າຈະບັນລຸເປົ້າໝາຍ. ຂະນະດຽວກັນກໍຍອມຮັບວ່າ: ການໂຈມຕີຈົນມີພົນລະເຮືອນບາດເຈັບ ແລະ ເສຍຊີວິດຈໍານວນຫລາຍຄັ້ງນີ້ ເປັນເຄາະຮ້າຍທີ່ໜ້າສະຫລົດໃຈ ເຊິ່ງລະຫວ່າງນີ້ຈະກວດສອບເຫດການດັ່ງກ່າວ.

      ທ່ານ ເນທັນຢາຮູ ອ້າງວ່າ: ອິດສະລາແອນໃຫ້ຄວາມສໍາຄັນຕໍ່ການຫລີກລ່ຽງ ຫລື ປ້ອງກັນບໍ່ໃຫ້ພົນລະເຮືອນເສຍຊີວິດ. ພ້ອມຢືນຢັນວ່າ: ກອງທັບອິດສະລາແອນ (IDF) ພະຍາຍາມຢ່າງດີທີ່ສຸດ ເພື່ອບໍ່ໃຫ້ເປັນອັນຕະລາຍຕໍ່ປະຊາຊົນທີ່ບໍ່ກ່ຽວຂ້ອງໃນເຫດຂັດແຍ່ງຄັ້ງນີ້.

      ແຕ່ອົງການສ້ຽວວົງເດືອນແດງປາແລັສຕິນ ລະບຸວ່າ: ການໂຈມຕີທາງອາກາດຄັ້ງນີ້ຕັ້ງເປົ້າໃສ່ຄ້າຍຜູ້ພັດຖິ່ນຊາວປາແລັສຕິນໃກ້ກັບສູນອາໄສຂອງ UN ໃນທັວອັລສຸລຕ່ານ ຫ່າງຈາກໃຈກາງເມືອງຣາຟາປະມານ 2 ກິໂລແມັດ.

      ການກ່າວໃນສະພາຂອງທ່ານ ເນທັນຢາຮູ ຖືກຂັດຈັງຫວະເປັນບາງຊ່ວງຈາກຄອບຄົວຂອງຕົວປະກັນທີ່ຖືກຮາມັດຈັບໄປນັບແຕ່ວັນທີ 7 ຕຸລາປີຜ່ານມາ ເຊິ່ງນາຍົກລັດຖະມົນຕີຖືກວິຈານຢ່າງໜັກວ່າ: ບໍ່ສາມາດເຮັດຂໍ້ຕົກລົງກັບຮາມັດເພື່ອແລກປ່ຽນກັບອິດສະລາແອນຂອງຄົນໃນຄອບຄົວໄດ້.

     ທ່ານ ໂວລເກີ ເຕິກ ຂ້າຫລວງໃຫຍ່ເພື່ອສິດທິມະນຸດແຫ່ງສະຫະປະຊາຊາດ ກ່າວວ່າ: ການໂຈມຕີຂອງອິດສະລາແອນຮອບຫລ້າສຸດບົ່ງຊີ້ວ່າ: ອິດສະລາແອນຍັງບໍ່ປ່ຽນວິທີການເຮັດສົງຄາມ ເຖິງວ່າຈະນໍາໄປສູ່ການເສຍຊີວິດຂອງພົນລະເຮືອນຈໍານວນຫລາຍກໍຕາມ.

     ສ່ວນສະຫະພາບເອີຣົບ (EU) ໄດ້ອອກມາປະນາມອິດສະລາແອນ ແລະ ຮຽກຮ້ອງໃຫ້ອິດສະລາແອນປະຕິບັດຕາມຄໍາສັງຂອງສານ.

ອ້າງອີງ:

• https://www.bbc.com/news/articles/c7228x974lxo
• https://edition.cnn.com/middleeast/live-news/israel-hamas-war-gaza-news-05-27-24/index.html