ມອບ-ຮັບໂຄງການກໍ່ສ້າງທາງ 16B ແຕ່ເມືອງດາກຈຶງ-ດ່ານດາກຕະອອກ (ຊາຍແດນລາວ-ຫວຽດນາມ)

ການມອບ-ຮັບ ໂຄງການກໍ່ສ້າງ ທາງເລກທີ 16B ຍາວ 21 ກິໂລແມັດ ແຕ່ເມືອງ ດາກຈຶງ ແຂວງເຊອງ ຫາ ຊາຍແດນ ລາວ-ຫວຽດນາມ (ດ່ານດາກຕະອອກ) ດຳເນີນໄປໃນວັນທີ 21 ພຶດສະພາ 2024ນີ້, ໂຄງການກໍ່ສ້າງທາງ 16B ມີມູນຄ່າການກໍ່ສ້າງທັງໝົດ 59 ຕື້ກວ່າກີບ ຊຶ່ງນໍາໃຊ້ທຶນ ພາຍໃນ 100%, ມີຄວາມຍາວ 21,63 ກິໂລແມັດ, ໜ້າທາງເຂດເທສະບານເມືອງດາກຈຶງກວ້າງ 9 ແມັດ ແລະ 14 ແມັດ; ເຂດຊານເມືອງ ແລະ ເຂດນອກເມືອງກວ້າງ 7 ແມັດ, ເປັນປະເພດທາງຊັ້ນ 4; ປູຢາງສອງຊັ້ນ ປະກອບມີທໍ່ລ່ຽມ 2 ແຫ່ງ ແລະ ທໍ່ກົມ 3 ແຫ່ງ ແລະ ເປັນເສັ້ນທາງຍຸດທະສາດ ສ້າງເງື່ອນໄຂອໍານວຍຄວາມສະດວກ ໃຫ້ການໄປ-ມາຫາສູ່, ແລກປ່ຽນຊື້-ຂາຍສິນຄ້າຂອງປະຊາຊົນ, ອໍານວຍຄວາມສະດວກ ໃຫ້ການພັດທະນາເສດຖະກິດ-ສັງຄົມ, ການຄ້າ, ການລົງທຶນ ແລະ ການທ່ອງ ທ່ຽວພາຍໃນແຂວງໃຫ້ມີບັນຍາກາດຟົດຟື້ນ ແລະ ເປັນເງື່ອນໄຂໃຫ້ການຍົກລະດັບດ່ານດາກຕະອອກ ຂຶ້ນເປັນດ່ານສາກົນ, ປະຕິບັດການເຊື່ອມຈອດ-ເຊື່ອມໂຍງ ແລວເສດຖະກິດຕະວັນອອກ-ຕະວັນຕົກ ໃຫ້ມີຄວາມສະດວກ ແລະ ວ່ອງໄວ.