ສື່ຂອງລັດຖະບານອີຣານຢືນຢັນ ປະທານາທິບໍດີເສຍຊີວິດຈາກອຸປະຕິເຫດເຮລິກອບເຕີຕົກ
ສໍານັກຂ່າວຫລາຍແຫ່ງຂອງລັດຖະບານອີຣານລາຍງານວ່າ: ປະທານາທິບໍດີ ແລະ ເຈົ້າໜ້າທີ່ລະດັບສູງອີກຫລາຍທ່ານ ລວມທັງລັດຖະມົນຕີຕ່າງປະເທດ ເສຍຊີວິດຈາກອຸປະຕິເຫດເຮລິກອບເຕີຕົກ.
ວັນທີ 20 ພຶດສະພາ, ສື່ຫລາຍແຫ່ງຂອງລັດຖະບານອີຣານ ລວມທັງ ສໍານັກຂ່າວແຫ່ງຊາດ (IRNA), ສໍານັກຂ່າວທາສນິມ ແລະ ສໍານັກຂ່າວເມີຍ ລາຍງານວ່າ: ປະທານາທິບໍດີ ອິບຣາຮິມ ໄຣຊີ ຜູ້ນໍາອີຣານ ເສຍຊີວິດຈາກອຸປະຕິເຫດເຮລິກອບເຕີຕົກ ຢູ່ແຂວງອາເຊີໄບຈານຕາເວັນອອກ ເຊິ່ງຢູ່ທາງຕາເວັນຕົກສຽງເໜືອຂອງປະເທດ.
ຂະນະດຽວກັນ, ທ່າ ຮໍເຊັນ ເອເມີຍ-ອັບໂດລລາຣຽນ ລັດຖະມົນຕີຕ່າງປະເທດ ແລະ ທ່ານ ມາເລກ ຣາມາຕີ ເຈົ້າແຂວງອາເຊີໄບຈານຕາເວັນອອກ ຕະຫລອດຮອດລູກເຮືອທັງໝົດຢູ່ໃນເຮລິກອບເຕີລໍານີ້ ທີ່ເປັນລຸ້ນ ເບລ212 ຜະລິດໂດຍບໍລິສັດເບລຂອງອາເມລິກາ ເສຍຊີວິດເຊັ່ນກັນ.
ເຖິງຢ່າງໃດກໍຕາມ, ຍັງບໍ່ມີການຢືນຢັນຢ່າງເປັນທາງການຈາກລັດຖະບານເຕຮາລານ. ສ່ວນສະພາສ້ຽວວົງເດືອນແດງອີຣານ ແລະ ເຈົ້າໜ້າທີ່ກູ້ໄພໃນພື້ນທີ່ ວ່າທີມຄົ້ນຫາສາມາດລະບຸຕໍາແໜ່ງຕົກຂອງເຮລິກອບເຕີກາງພູຢູ່ເມືອງໂຈຟານຂອງແຂວງອາເຊີໄບຈານຕາເວັນອອກ ແລະ ຜົນການກວດສອບເບື້ອງຕົ້ນ “ບໍ່ພົບຮ່ອງຮອຍຂອງຜູ້ລອດຊີວິດ”.
ທັງນີ້, ເຮລິກອບເຕີລໍາດັ່ງກ່າວ ໜຶ່ງໃນຂະບວນເຮລິກອບເຕີ 3 ລໍາ ທີ່ເດີນທາງໄປຮ່ວມພິທີເປີດເຂື່ອນ ຢູ່ຊາຍແດນລະຫວ່າງອີຣານກັບອາເຊີໄບຈານ ໃນວັນທີ 19 ພຶດສະພາຜ່ານມາ, ຈາກນັ້ນມີລາຍງານວ່າ: ເຮລິກອບເຕີຂອງປະທານາທິບໍດີອີຣານ “ລົງຈອດຢ່າງຮຸນແຮງ” ທ່າມກາງສະພາບອາກາດທີ່ມີໝອກໜາ ຢູ່ເທິງພູ, ສ່ວນເຮລິກອບເຕີອີກສອງລໍາທີ່ຮ່ວມຂະບວນລົງຈອດຢ່າງປອດໄພ ຫ່າງຈາກເມືອງທາບຣິ ເມືອງເອກຂອງແຂວງອາເຊີໄບຈານຕາເວັນອອກໄປທາງຕອນເໜືອອີກປະມານ 50 ກິໂລແມັດ.
ທ່ານ ຢາຕໍເລາະ ອາລີ ຄາເມເນອີ ຜູ້ນໍາສູງສຸດຂອງອີຣານ ພະຍາຍາມສ້າງຄວາມເຊື່ອໝັ້ນໃຫ້ບັນຍາກາດພາຍໃນປະເທດທີ່ຜະເຊີນຄວາມບໍ່ແນ່ນອນໃນທັນທີ ດ້ວຍການກ່າວວ່າ: ການບໍລິຫານປະເທດ ແລະ ກິດຈະການທຸກຢ່າງຈະດໍາເນີນຕໍ່ໄປ. ພ້ອມທັງພາວະນາຂໍໃຫ້ປະຊາຊົນຮ່ວມກັນສູດມົນພາວະນາໃຫ້ຜູ້ສູນຫາຍທຸກຄົນປອດໄພ.
ອ້າງອີງ:
- https://www.bbc.com/news/live/world-middle-east-69035051?src_origin=BBCS_BBC
- https://www.aljazeera.com/news/liveblog/2024/5/20/live-irans-president-raisi-fm-amirabdollahian-killed-in-helicopter-crash
