ກອງປະຊຸມລັດຖະມົນຕີຄຸ້ມຄອງໄພພິບັດອາຊຽນ ຄັ້ງທີ 5 ອັດລົງດ້ວຍຜົນສຳເລັດຈົບງາມ
ກອງປະຊຸມລັດຖະມົນຕີຄຸ້ມຄອງໄພພິບັດອາຊຽນ ຄັ້ງທີ 5 ໄດ້ໄຂຂຶ້ນໃນວັນທີ 19 ຕຸລານີ້ ແລະ ໄດ້ອັດລົງຢ່າງຈົບງາມໃນມື້ດຽວກັນ ໂດຍການເປັນປະທານຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ມີບັນດາລັດຖະມົນຕີ, ຮອງລັດຖະມົນຕີຈາກປະເທດສະມາຊິກອາຊຽນ ແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມດັ່ງກ່າວ ໄດ້ຮັບຟັງການປະກອບຄຳເຫັນຂອງບັນດາລັດຖະມົນຕີຮັບຜິດຊອບວຽກງານຄຸ້ມຄອງໄພພິບັດອາຊຽນ ພາຍໃຕ້ຫົວຂໍ້: ການສ້າງຊຸມຊົນເຂັ້ມແຂງ ແລະ ປອດໄພ ເພື່ອໃຫ້ອາຊຽນທົນທານຕໍ່ໄພພິບັດ, ພ້ອມທັງໄດ້ຮັບຟັງ ແລະ ປະກອບຄຳເຫັນຕໍ່ບົດລາຍງານຜົນຂອງກອງປະຊຸມຕ່າງໆ ທີ່ພົວພັນເຖິງການຈັດຕັ້ງປະຕິບັດແຜນງານ ແລະ ໂຄງການຕ່າງໆ ໃນວຽກງານຄຸ້ມຄອງໄພພິບັດອາຊຽນ. ນອກນີ້ ຍັງໄດ້ຮ່ວມກັນ ພິຈາລະນາ ແລະ ຮັບຮອງເອົາຖະແຫລງການປະທານກອງປະຊຸມລັດຖະມົນຕີຄຸ້ມຄອງໄພພິບັດອາຊຽນ ຄັ້ງທີ 5 ແລະ ກອງປະຊຸມພາຄີຄັ້ງທີ 6 ຕໍ່ສັນຍາອາຊຽນວ່າດ້ວຍການຄຸ້ມຄອງໄພພິບັດ ແລະ ການຕອບໂຕ້ຕໍ່ເຫດການສຸກເສີນ.
ກອງປະຊຸມ ຍັງໄດ້ຮັບຊາບການຈັດຕັ້ງປະຕິບັດສັນຍາອາຊຽນ ວ່າດ້ວຍການຄຸ້ມຄອງໄພພິບັດ ແລະ ການຕອບໂຕ້ສຸກເສີນ (AADMER) 2016-2020, ຊຶ່ງກວມເອົາບັນດາກິດຈະກຳຢູ່ໃນໜ່ວຍງານຕ່າງໆເຊັ່ນ: ໜ່ວຍງານວິຊາການ ການປະເມີນຄວາມສ່ຽງ, ໜ່ວຍງານວິຊາການ ກ່ຽວກັບການປ້ອງກັນ ແລະ ຫລຸດຜ່ອນໄພພິບັດ, ໜ່ວຍງານວິຊາການ ກ່ຽວກັບການກຽມພ້ອມ ແລະ ຕອບໂຕ້, ໜ່ວຍງານວິຊາການກ່ຽວກັບການຟື້ນຟູຫລັງໄພພິບັດ ແລະ ໜ່ວຍງານວິຊາການກ່ຽວກັບໃຫ້ຄວາມຮູ້ ແລະ ການຄຸ້ມຄອງຂໍ້ມູນ; ຄົ້ນ ຄວ້າເພື່ອທົບທວນຄືນພາຍໃຕ້ສັນຍາອາຊຽນວ່າດ້ວຍການຄຸ້ມຄອງໄພພິບັດ ແລະ ການຕອບໂຕ້ສຸກເສີນ (AADMER), ໂດຍຜ່ານກອງປະຊຸມປຶກສາຫາລືລະດັບວິຊາການ ແລະ ການເຂົ້າຮ່ວມຂອງຂະແໜງການກ່ຽວຂ້ອງ, ໂດຍສະເພາະກະຊວງການຕ່າງປະເທດ ແລະ ກະຊວງປ້ອງກັນປະເທດ; ການກຳນົດຍຸດທະສາດຈັດຕັ້ງປະຕິບັດຖະແຫລງການອາຊຽນ ໜຶ່ງອາຊຽນ ໜຶ່ງການຕອບໂຕ້ ແລະ ເຫັນດີຕາມການສະເໜີໃຫ້ກອງເລຂາອາຊຽນເຊີນຂະແໜງການກ່ຽວຂ້ອງຂອງອາຊຽນ ລວມທັງ ຄະນະກຳມະການຜູ້ຕາງໜ້າຖາວອນ ປະຈຳອາຊຽນເຂົ້າຮ່ວມປຶກສາຫາລື, ພ້ອມທັງຮັບຊາບຕໍ່ກັບການສ້າງຄວາມຕ້ານທານຂອງອາຊຽນ, ໂດຍຜ່ານການໃຫ້ເງິນໂດຍໃຫ້ກອງເລຂາອາຊຽນເປັນຜູ້ຄົ້ນຄວ້າຊອກຫາທາງການຮ່ວມມືກັບພາກເອກະຊົນ; ການຮ່ວມມືກັບຮ່ວມພັດທະນາ, ກອງປະຊຸມຊົມເຊີຍມາຍັງກອງປະຊຸມຄະນະກຳມະການຄຸ້ມຄອງໄພພິບັດອາຊຽນທີ່ໄດ້ມີຄວາມເປັນເອກະພາບກັນ ໃນການເຊັນບົດບັນທຶກຄວາມເຂົ້າໃຈກັບລັດເຊຍ ແລະ ໃຫ້ກອງເລຂາອາຊຽນເປັນຜູ້ເຊັນ ແລະ ບົດບັນທຶກຄວາມເຂົ້າໃຈອົງການກາແດງສາກົນ, ພ້ອມທັງການຂະຫຍາຍໄລຍະເວລາບົດບັນທຶກຄວາມເຂົ້າໃຈກັບ ສປ ຈີນ ແລະ ກອງປະຊຸມໄດ້ຮັບຮອງການປຶກສາຫາລືລະດັບລັດຖະມົນຕີຄຸ້ມຄອງໄພພິບັດ ແລະ ຂະແໜງການກ່ຽວຂ້ອງຕໍ່ວຽກງານຫລຸດຜ່ອນໄພພິບັດ, ຊຶ່ງຈະຈັດຂຶ້ນໃນປະເທດມາເລເຊຍ ໃນປີ 2018.
