ລາວສະເຫລີມສະຫລອງວັນຄຸ້ມຄອງໄພພິບັດອາຊຽນ ຄົບຮອບ 12 ປີ
ກະຊວງແຮງງານ ແລະ ສະຫວັດດີການສັງຄົມ ຮ່ວມກັບບັນດາປະເທດສະມາຊິກອາຊຽນ, ໄດ້ຈັດພິທີສະເຫລີມຫລອງວັນຄຸ້ມຄອງໄພພິບັດອາຊຽນ ຄົບຮອບ 12 ປິ, ຂຶ້ນໃນວັນທີ 19 ຕຸລານີ້, ທີ່ແຂວງຫລວງພະບາງ, ໂດຍການເຂົ້າຮ່ວມຂອງທ່ານ ບຸນທອງ ຈິດມະນີ ຮອງນາຍົກລັດ ຖະມົນຕີ ແຫ່ງ ສປປ ລາວ, ທ່ານ ເລເລືອງ ມິ໋ງ (Le Luong Minh), ເລຂາທິການໃຫຍ່ອາຊຽນ, ມີບັນດາລັດຖະມົນຕີຄຸ້ມຄອງໄພພິບັດອາຊຽນ, ຫົວໜ້າສູນອາຮ່າ ແລະ ເຈົ້າແຂວງຫວຼງພະບາງເຂົ້າຮ່ວມນໍາດ້ວຍ.
ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກ່າວວ່າ: ເພື່ອເປັນການສືືບຕໍ່ເອົາໃຈໃສ່ ແລະ ໃຫ້ຄວາມສຳຄັນໃນການກຽມພ້ອມ, ແກ້ໄຂ ແລະ ຫລຸດ ຜ່ອນບັນດາຜົນກະທົບຈາກໄພພິບັດດັ່ງກ່າວ ແລະ ຍັງຖືໂອກາດດັ່ງກ່າວນີ້ເພື່ອທົບທວນຄືນຜົນການຈັດຕັ້ງປະຕິບັດບັນດາເອກະສານສຳຄັນທີ່ຜູ້ນຳບັນດາປະເທດອາຊຽນໄດ້ຕົກລົງ, ມອບໝາຍໃຫ້ ແລະ ທັງເປັນການທົບທວນຄືນຜົນຂອງກອງປະຊຸມທີ່ບັນດາປະເທດອາຊຽນ ໄດ້ເຫັນດີປະຕິບັດຮ່ວມກັນຕະຫລອດໄລຍະໜຶ່ງປີຜ່ານມາ, ໂດຍສະເພາະການປະຕິບັດຖະແຫລງການອາຊຽນເປັນໜຶ່ງດຽວໃນການຕອບໂຕ້ໄພພິບັດ ພາຍໃນພາກພື້ນ ແລະ ພາຍນອກພາກພື້ນອາຊຽນ ທີ່ໄດ້ຮັບຮອງເອົາໃນກອງປະຊຸມສຸດຍອດອາຊຽນ ຄັ້ງທີ 28-29 ຢູ່ສປປ ລາວ. ລັດຖະບານລາວ ໄດ້ຖືເອົາວຽກງານການຄຸ້ມຄອງໄພພິບັດເປັນວຽກງານບູລິມະສິດໜຶ່ງ ໃນແຜນພັດທະນາເສດຖະກິດ-ສັງຄົມແຫ່ງຊາດ, ແຜນຍຸດທະສາດການສ້າງເສດຖະກິດແຫ່ງຊາດ ໄປຕາມທິດພັດທະນາແບບຍືນຍົງທີ່ມີຄວາມກົມກຽວກັນລະຫວ່າງການພັດທະນາເສດຖະກິດ, ການພັດທະນາສັງຄົມ ໄປຄຽງຄູ່ກັບການປົກປັກຮັກສາສິ່ງແວດລ້ອມ ແລະ ເພີ່ມທະວີການກຽມພ້ອມຮັບມືກັບ ໄພພິບັດທຳມະຊາດ, ການຈັດຕັ້ງປະຕິບັດແຜນພັດທະນາວຽກງານສະຫວັດດີການສັງຄົມ 2020, ຊຶ່ງໄດ້ກວມເອົາແຜນງານການຕອບໂຕ້ໄພພິບັດ, ການຊ່ວຍເຫລືອສຸກເສີນ ແລະ ຟື້ນຟູຫລັງໄພພິບັດ ເພື່ອເປັນການຈັດຕັ້ງຜັັນຂະຫຍາຍບັນດາສັນຍາ ແລະ ຂໍ້ຕົກລົງຂອງພາກພື້ນ ແລະ ສາກົນ.
ໃນໂອກາດນີ້, ທ່ານຮອງນາຍົກລັດຖະມົນຕີ ມີຄຳເຫັນວ່າ: ໄລຍະຜ່ານມາ, ສປປ ລາວ ໄດ້ເຊື່ອມສານວຽກງານໄພພິບັດເຂົ້າໃນຂະແໜງການທີ່ກ່ຽວຂ້ອງເຊັ່ນ: ຂະແໜງສາທາລະນະສຸກ, ຂະແໜງສຶກສາ, ໂດຍເອົາເຂົ້າໃນຫລັກສູດຂອງໂຮງຮຽນ ເພື່ອເຮັດໃຫ້ເຂົາເຈົ້າຮຽນຮູ້ ແລະ ກຽມພ້ອມຮັບມືກັບໄພພິບັດ, ໄດ້ຈັດຕັ້ງຕາໜ່າງປົກປ້ອງໄພພິບັດລົງສູ່ຊຸມຊົນ, ບ້ານ ແລະ ໄດ້ຈັດຕັ້ງການຝຶກອົບຮົມໃຫ້ພາກສ່ວນກ່ຽວຂ້ອງທຸກລະດັບ, ໂດຍສະເພາະແມ່ນການຕອບໂຕ້ ແລະ ຮັບມືກັບບັນຫາການປ່ຽນແປງດິນຟ້າອາກາດ, ໄພນ້ຳຖ້ວມ ແລະ ແຫ້ງແລ້ງ, ລົມພາຍຸພັດ, ສັດຕູພືດທຳລາຍຜົນລະປູກ, ພະຍາດລະບາດ, ດິນເຈື່ອນ ແລະ ອື່ນໆ, ໂດຍໄດ້ນຳໃຊ້ງົບປະມານຂອງລັດຖະບານຢ່າງຫລວງຫລາຍໃນການແກ້ໄຂຊ່ວຍເຫລືືອບັນເທົາທຸກສຸກເສີນ ແລະ ຟື້ນຟູຫລັງໄພພິບັດ. ແນວໃດກໍຕາມ ເພື່ອປະກອບສ່ວນເຂົ້າໃນການແກ້ໄຂບັນຫາດັ່ງກ່າວ, ເຊື່ອໝັ້ນວ່າ ກອງປະຊຸມລັດຖະມົນຕີຄຸ້ມຄອງໄພພິບັດ ແລະລ ຕອບໂຕ້ສຸກເສີນ ຄັ້ງທີ 5 ແລະ ກອງປະຊຸມປິ່ນອ້ອມອື່ືນໆນີ້, ຈະເປັນເວທີປຶກສາຫາລືບັນຫາທີ່ສຳຄັນ ແລະ ສາມາດບັນລຸບັນດາຂໍ້ຕົກລົງຮ່ວມກັນ ທີ່ນຳສູ່ການພັດທະນາ ແລະ ປັບປຸງເຮັດໃຫ້ວຽກງານຄຸ້ມຄອງໄພພິບັດ ແລະ ຕອບໂຕ້ສຸກເສີນໃຫ້ສອດຄ່ອງກັບວິໄສທັດອາຊຽນ 2025 ກ່ຽວກັບການຄຸ້ມຄອງໄພພິບັດໃຫ້ມີປະສິດທິຜົນສູງ, ຊຶ່ງຈະເປັນການປະກອບສ່ວນອັນສຳຄັນເຂົ້າໃນການສຶບຕໍ່ສ້າງປະຊາຄົມອາຊຽນໃຫ້ສຳເລັດໃນຊຸມປີຕໍ່ໜ້າ.
ໃນພິທີດັ່ງກ່າວ, ບັນດາຜູ້ແທນຍັງໄດ້ເຂົ້າຮ່ວມເປີດຫ້ອງວາງສະແດງຮູບພາບ ທີ່ປະກອບມີ: ຂໍ້ມູນຂ່າວສານ ແລະ ບັນດາຮູບພາບໄພພິບັດຕ່າງໆທີ່ເກີດຂຶ້ນໃນທົ່ວໂລກ, ພ້ອມດຽວກັນນີ້, ຄະນະຜູ້ແທນຍັງໄດ້ຮ່ວມກັນ ປ່ອຍປາລົງສູ່ແມ່ນ້ຳຂອງ, ເຂດວັດຊຽງທອງ, ເມືອງ ແລະ ແຂວງຫລວງພະບາງນຳອີກ.
