ບັນຫາໄຟຟ້າບໍ່ພຽງພໍ ໄຟຕົກ ແລະ ໄຟມອດ ຍ້ອນການເພີ່ມຂຶ້ນຂອງຈຳນວນຄົວເຮືອນເຮັດໃຫ້ການຊົມໃຊ້ໄຟຟ້າສູງຂຶ້ນຢ່າງໄວວາ

ວັນທີ 13 ພຶດສະພາ 2024 ນີ້, ທ່ານ ເພັດສະໝອນ ວັນທາ, ຫົວໜ້າລັດວິສາຫະກິດໄຟຟ້າລາວ ສາຂານະຄອນຫລວງ 2 ໄດ້ລາຍງານຕໍ່ສື່ມວນຊົນ ວ່າ: ຈາກກໍລະນີມີຫາງສຽງຈົ່ມວ່າຂອງປະຊາຊົນບາງເຂດຕໍ່ກັບບັນຫາໄຟຟ້າບໍ່ພຽງພໍ ແລະ ໄຟຕົກໄຟມອດເກີດຂຶ້ນໃນປັດຈຸບັນນີ້ທີ່ຢູ່ໃນຄວາມຮັບຜິດຊອບຂອງລັດວິສາຫະກິດໄຟຟ້າລາວ ສາຂານະຄອນຫລວງ2, ເນື່ອງຈາກວ່າສັງຄົມມີການຂະຫຍາຍຕົວສູງ ເຮັດໃຫ້ຈຳນວນຄົວເຮືອນເພີ່ມຂຶ້ນຢ່າງໄວວາ ຈຶ່ງເຮັດໃຫ້ການຊົມໃຊ້ໄຟຟ້າສູງຂຶ້ນແບບກ້າວກະໂດດ. ລັດວິສາຫະກິດໄຟຟ້າ ສາຂານະຄອນຫລວງ2 ມີແຜນການເຄື່ອນໄຫວສ້ອມແປງ, ປ່ຽນຖ່າຍ ແລະ ເສີມບັນດາອຸປະກອນຂອງລະບົບຈຳໜ່າຍ ປະຕິບັດຕາມລຳດັບຂອງການສະເໜີ ທີ່ສະເໜີເຂົ້າມາຂອງອົງການປົກຄອງບ້ານຕ່າງໆ ແຕ່ກະຍັງບໍ່ທັນທົ່ວເຖິງເນື່ອງຈາກງົບປະມານຂອງໄຟຟ້າລາວມີຈຳກັດ.

ມາຮອດປັດຈຸບັນ ໄຟຟ້າລາວສາມາດສະໜອງໄຟຟ້າຮັບໃຊ້ພຽງພໍ, ແຕ່ຍ້ອນການຊົມໃຊ້ພະລັງງານໄຟຟ້າບາງຈຸດຍັງຜິດປົກກະຕິ ຈຶ່ງເກີດມີສະພາບໄຟຟ້າບໍ່ພຽງພໍບາງເຂດນັ້ນ ຍ້ອນເກີດຈາກການນຳໃຊ້ພະລັງງານໄຟຟ້າບັນທຸກໂຫລດໝໍ້ແປງເກີນ ບໍ່ສາມາດຈ່າຍໄຟໄດ້ພຽງພໍ, ເນື່ອງຈາກອາກາດຮ້ອນອົບເອົ້າ, ການຊົມໃຊ້ໄຟຟ້າເພີ່ມຂຶ້ນຢ່າງກ້າວກະໂດດ, ທາງໄຟຟ້າລາວບໍ່ສາມາດແກ້ໄຂປັບປຸງໄດ້ຢ່າງທັນການ ເຊິ່ງເປັນເຫດພາວະວິໄສທີ່ບໍ່ສາມາດຫລີກລ່ຽງໄດ້ ເມື່ອມີການຊົມໃຊ້ໄຟຫລາຍກໍເຮັດໃຫ້ອຸປະກອນພາກສາຍສົ່ງ ແລະ ພາກຈຳໜ່າຍເກີດຄວາມເສຍຫາຍ ແລະ ເກີດອຸບັດຕິເຫດໄຟຟ້າ ເຊັ່ນ: ໝໍ້ແປງໄໝ້ ຫລື ເປ່ເພ, ສາຍໄຟເປື່ອຍເກີດຊ໋ອດລັດວົງຈອນ ແລະ ອື່ນໆ. ເນື່ອງຈາກບັນທຸກໂຫລດການຊົມໃຊ້ເກີນຂອບເຂດຄວາມສາມາດຮັບໄດ້ຂອງອຸປະກອນພາກຈຳໜ່າຍ. ອີງຕາມການສະເໜີຂອງລູກຄ້າພາຍໃນນະຄອນຫລວງວຽງຈັນ ເຫັນວ່າການສະໜອງໄຟບໍ່ພຽງພໍມີທັງໜົດ 110 ຈຸດ ສະເພາະເຂດຮັບຜິດຊອບຂອງໄຟຟ້າລາວ ສາຂານະຄອນຫລວງ 2 ມີ 68 ຈຸດ.

ສໍາລັບລັດວິສາຫະກິດໄຟຟ້າລາວ ສາຂານະຄອນຫລວງ 2 ຮັບຜິດຊອບ 5 ເມືອງນອກຂອງນະຄອນຫລວງວຽງຈັນ ຄື: ໄຊທານີ, ຫາດຊາຍຟອງ, ນາຊາຍທອງ, ສັງທອງ ແລະ ປາກງື່ມ. ມີຈຳນວນບ້ານທີ່ຄຸ້ມຄອງ ທັງໝົດ 322 ບ້ານ, ມີລະບົບຈຳໜ່າຍ ທັງໝົດ 10 ສະຖານີ ຄື: ສະຖານີທ່າສະຫວ່າງ, ວຽງແກ້ວ, ໂຄກສະອາດ, ດົງໂພສີ, ທ່ານາແລ້ງ, ນາໄຫ, ວີຕ້າປາກ, ນາຊາຍທອງ, ເພຍລາດ ແລະ ສະຖານີນາບົງ.

ຂໍ້ມູນ: ວິທະຍຸແຫ່ງຊາດ