ກອງທັບອີຣັກເຜີຍບັນລຸເປົ້າໝາຍໃນ ປະຕິບັດການຕໍ່ຕ້ານກອງກຳລັງຊາວເຄີດ
ກອງກຳລັງລັດຖະບານອີຣັກເປີດເຜີຍໃນວັນທີ 18 ຕຸລາວ່າ: ບັນລຸເປົ້າໝາຍໃນປະຕິບັດການແບບສາຍຟ້າແລບຕໍ່ຕ້ານກອງກຳລັງຊາວເຄີດໃນດິນແດນທີ່ຢູ່ນອກເຂດປົກຄອງຕົນເອງຊາວເຄີດ.
ທະຫານອີຣັກ ແລະ ພັນທະມິດຍຶດບໍ່ນ້ຳມັນ ແລະ ເມືອງເຄີຄຸກທາງຕອນເໜືອ ລວມທັງພື້ນທີ່ໃນການຍຶດຄອງຂອງກຳລັງຊາວເຄີດ ທັງເມືອງນິເນເວ ແລະ ເມືອງດິຍາລາ ກັບຄືນມາໄດ້ໃນໄລຍະສອງວັນຜ່ານມາ ເພື່ອຕອບໂຕ້ທີ່ຊາວເຄີດຈັດການລົງປະຊາມະຕິແຍກເປັນອິດສະຫລະໃນເດືອນກ່ອນ.
ທ່ານ ຈັບບາ ອັດລູໄອບີ ລັດຖະມົນຕີນ້ຳມັນອີຣັກ ຮຽກຮ້ອງໃຫ້ບໍລິສັດບີພີ ບໍລິສັດທາງດ້ານພະລັງງານລາຍໃຫຍ່ຂອງອັງກິດເຂົ້າຊ່ວຍເຫລືອໃນການພັດທະນາບໍ່ນ້ຳມັນທີ່ຍຶດຄືນມາຈາກກອງກຳລັງຊາວເຄີດ. ກ່ອນໜ້ານີ້ ກະຊວງພະລັງງານອີຣັກເຄີຍລົງນາມໃນສັນຍາຈ້າງທີ່ປຶກສາກັບບີພີໃນປີ 2012 ເພື່ອຊ່ວຍເຫລືອບໍລິສັດນອດອອຍຂອງທາງການອີຣັກໃນການພັດທະນາບໍ່ນ້ຳມັນ, ແຕ່ສັນຍາດັ່ງກ່າວຍັງບໍ່ເຄີຍມີຜົນໃນທາງປະຕິບັດ ເນື່ອງຈາກລັດຖະບານອີຣັກສູນເສຍການຄວບຄຸມບໍ່ນ້ຳມັນດັ່ງກ່າວໃຫ້ແກ່ກອງກຳລັງຊາວເຄີດໃນປີຕໍ່ມາ ເຊິ່ງເປັນໄລຍະທີ່ເກີດການປະທະກັນຢ່າງໜັກກັບກຸ່ມລັດອິດສະລາມ ຫລື IS ໃນພື້ນທີ່ຕອນເໜືອ ແລະ ຕາເວັນຕົກຂອງປະເທດ.
