ອະດີດລັດຖະມົນຕີ ຫົວໜ້າສຳນັກງານລັດຖະບານ ຫວຽດນາມ ຖືກກັກຕົວຊົ່ວຄາວ

ໜັງສືພິມ ໄວໜຸ່ມ ຂອງຫວຽດນາມ ລາຍງານວັນທີ 4 ພຶດສະພາ 2024 ນີ້ ວ່າ: ໃນກອງປະຊຸມວິສາມັນຂອງລັດຖະບານ, ນາຍພົນໂທ ໂຕເອິນ ໂຊ ໂຄສົກຂອງກະຊວງຕຳຫຼວດແຈ້ງໃຫ້ຊາບວ່າ ອົງການຕຳຫຼວດສືບສວນຂອງກະຊວງຕຳຫຼວດໄດ້ມີຄຳສັ່ງດຳເນີນຄະດີຜູ້ຕ້ອງຫາ ແລະ ຈັບກຸມທ່ານ ມາຍຕຽນ ຢຸງ ອະດີດລັດຖະມົນຕີ, ຫົວໜ້າສຳນັກງານນາຍົກລັດຖະມົນຕີເປັນການຊົ່ວຄາວ.

ທ່ານພົນໂທ ໂຕເອິນ ໂຊ ໃຫ້ຮູ້ຕື່ມອີກວ່າ: ພາຍຫຼັງສືບສວນເປີດກ້ວາງຄະດີໃຫ້ສິນບົນ ແລະ ຮັບສິນບົນທີ່ເກີດຂຶ້ນຢູ່ແຂວງ ເລີ່ມດົງ ນັ້ນ, ວັນທີ 30 ເມສາຜ່ານມາອົງການຕຳຫຼວດສືບສວນໄດ້ອອກຄຳສັ່ງກັກຕົວຊົ່ວຄາວທ່ານ ມາຍຕຽນ ຢຸງ ອະດີດລັດຖະມົນຕີ, ຫົວໜ້າສຳນັກງານລັດຖະບານໃນຂໍ້ຫາສວຍໃຊ້ໜ້າທີ່ຕຳແໜ່ງໃນການປະຕິບັດໜ້າທີ່ວຽກງານທາງລັດຖະການໄປໃນທາງທີ່ບໍ່ຖືກຕ້ອງ.