ຊາວໜຸ່ມເມືອງເມິງ ລົງມອດໄຟໄໝ້ລາມປ່າ ຢູ່ເຂດປ່າສະຫງວນ ບ້ານລາດຄູນເມືອງ

ວັນທີ 1 ພຶດສະພາ 2024 ນີ້, ສະມາຊິກຊາວໜຸ່ມ ແລະ ສອງກອງບັນຊາການ ປກຊ-ປກສ ອ້ອມຂ້າງ ເມືອງເມິງ ແຂວງບໍ່ແກ້ວ ໄດ້ລົງມອດໄຟໄໜ້ລາມປ່າ ຢູ່ຂອບເຂດປ່າສະຫງວນ ບ້ານລາດຄູນເມືອງ. ເນື່ອງຈາກສະພາບອາກາດຮ້ອນອົບເອົ້າ ແລະ ປະຊາຊົນໄດ້ຈູດສວນ ເພື່ອທໍາການຜະລິດ ຈຶ່ງເຮັດໃຫ້ເກີດໄຟໄໜ້ລາມປ່າ ຢູ່ຂອບເຂດປ່າສະຫງວນຂອງບ້ານລາດຄູນເມືອງ ຜູ້ເຂົ້າດັບມອດໄຟໄໝ້ລາມປ່າໃນຄັ້ງນີ້ ໄດ້ດັບມອດໄຟ ແລະ ແຜ້ວຖາງເປັນແລວກັນໄຟເພື່ອສະກັດບໍ່ໃຫ້ໄຟລາມປ່າເປັນວົງກວ້າງ.

ໃນໄລຍະຜ່ານມາ ໄດ້ມີປະຊາຊົນຈໍານວນໜຶ່ງບຸກລຸກຖ່າງປ່າເພື່ອທໍາການຜະລິດປູກຝັງ-ລ້ຽງສັດ ເປັນຕົ້ນ ປູກຕົ້ນໄມ້ອຸດສາຫະກໍາ ກໍຄືປູກຍາງພາລາ ແລະ ສ້າງບ່ອນລ້ຽງສັດ ມາຮອດປັດຈຸບັນປ່າສະຫງວນຂອງບ້ານລາດຄູນເມືອງຍັງເຫລືອພຽງແຕ່ປ່າສະຫງວນແຫ່ງດຽວນີ້ ເນື່ອງຈາກວ່າປະຊາຊົນໄດ້ຂະຫຍາຍເນື້ອທີ່ການຜະລິດເຂົ້າມາໃນຂອບເຂດປ່າສະຫງວນຂອງບ້ານ.

ຕໍ່ເຫດການດັ່ງກ່າວ, ທາງອົງການປົກຄອງບ້ານ ໄດ້ສືບຕໍ່ປົກປັກຮັກສາປ່າສະຫງວນແຫ່ງນີ້ໄວ້ໃຫ້ຍືນຍົງຕະຫລອດໄປ, ຫ້າມບໍ່ໃຫ້ບຸກຄົນໃດມາບຸກລຸກຕື່ມອີກ. ນອກນີ້, ປະຊາຊົນຈໍານວນໜຶ່ງຍັງໄດ້ບຸກລຸກປ່າແຫລ່ງນໍ້າ, ປ່າຕົ້ນນໍ້າ ເຊັ່ນປ່າຫົວຫ້ວຍຈອງ ແລະ ຫົວຫ້ວຍອື່ນໆ ພາຍໃນບ້ານ, ເຊິ່ງພາກສວນທີ່ກ່ຽວຂ້ອງໄດ້ເອົາໃຈໃສ່ສະກັດກັ້ນ ແລະ ຕິດຕາມກວດກາ ເພື່ອນໍາເອົາຜູ້ກະທໍາຜິດມາສຶກສາອົບຮົບ ຕາມລະບຽບກົດໝາຍທີ່ໄດ້ວາງອອກ.

ຂ່າວ: ແຂວງບໍ່ແກ້ວ