ຮອງນາຍົກ ຈະເຂົ້າຮ່ວມກອງປະຊຸມສະພາລັດຖະມົນຕີ ຂອງອົງການ ຮ່ວມມືດ້ານເສດຖະກິດ ເພື່ອການພັດທະນາ ຫຼື OECD ປະຈໍາປີ 2024 ຢູ່ນະຄອນຫລວງປາຣີ
ໂດຍຕອບສະໜອງຕາມການເຊື້ອເຊີນ ຂອງ ທ່ານ ຟູມິໂອະ ຄິຊິດະ ນາຍົກລັດຖະມົນຕີ ແຫ່ງ ຍີ່ປຸ່ນ ແລະ ທ່ານ Mathias Cormann ເລຂາທິການໃຫຍ່ ຂອງອົງການຮ່ວມມືດ້ານເສດຖະກິດ ເພື່ອການພັດທະນາ (OECD), ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍຄະນະຈະເດີນທາງເຂົ້າຮ່ວມກອງປະຊຸມສະພາລັດຖະມົນຕີ ຂອງອົງການ OECD ປະຈໍາປີ 2024 (The OECD-Ministerial Council Meeting 2024) ຊຶ່ງຈະຈັດຂຶ້ນໃນວັນທີ 2-3 ພຶດສະພາ 2024 ທີ່ ນະຄອນຫລວງປາຣີ ປະເທດຝຣັ່ງ, ພາຍໃຕ້ຫົວຂໍ້: “ການນຳພາປຶກສາຫາລືລະດັບໂລກ ດ້ວຍແນວທາງທີ່ເປັນກາງ ແລະ ເຊື່ອຖືໄດ້ ເພື່ອການເຕີບໂຕແບບຍືນຍົງ ແລະ ຮອບດ້ານ – Leading Global Discussion with Objective and Reliable Approach toward Sustainable and Inclusive Growth” ໂດຍການເປັນປະທານຂອງຍີ່ປຸ່ນ.
ໂອກາດນີ້, ທ່ານ ສະເຫລີມໄຊ ກົມມະສິດ ຈະໄດ້ຂຶ້ນກ່າວປາໄສຕາງໜ້າໃຫ້ແກ່ບັນດາປະເທດສະມາຊິກອາຊຽນ ໃນຖານະເປັນປະເທດປະທານອາຊຽນ ສໍາລັບປີ 2024 ເພື່ອແລກປ່ຽນວິໃສທັດຂອງອາຊຽນ ແລະ ສປປ ລາວ ໃນໂອກາດການສະເຫລີມສະຫລອງ ການສ້າງຕັ້ງໂຄງການອາຊີຕາເວັນອອກສ່ຽງໃຕ້ ຂອງອົງການ OECD ຫລື The OECD-Southeast Asia Regional Programme (SEARP) ຄົບຮອບ 10 ປີ ແລະ ທັງເປັນການຊົມເຊີຍປະເທດຍີ່ປຸ່ນ ໃນຖານະຄູ່ຮ່ວມມືຍຸດທະສາດ ຂອງ ສປປ ລາວ ໃນໂອກາດສະເຫລີມສະຫລອງການເຂົ້າເປັນສະມາຊິກຂອງ ອົງການ OECD ຄົບຮອບ 60 ປີ.
