ກໍາປູເຈຍຄາດຄະເນອຸນຫະພູມພາຍໃນປະເທດທ້າຍເດືອນເມສານີ້ອາດຮ້ອນສຸດໃນຮອບ 170 ປີ

     ລັດຖະບານກໍາປູເຈຍຄາດຄະເນວ່າ: ສະພາບອາກາດພາຍໃນປະເທດທ້າຍເດືອນເມສານີ້ອາດຮ້ອນທີ່ສຸດໃນຮອບ 170 ປີ.

     ວັນທີ 28 ເມສາ, ກະຊວງສາທາລະນະສຸກກໍາປູເຈຍອອກຖະແຫລງການ ຂໍໃຫ້ປະຊາຊົນຫລີກເວັ້ນການດໍາເນີນຊີວິດ ແລະ ຫລຸດການເຮັດກິດຈະກໍາກາງແຈ້ງຕໍ່ເນື່ອງເປັນເວລາດົນ ເນື່ອງຈາກສະພາບອາກາດຮ້ອນອົບເອົ້າ ແລະ ແນະນໍາໃຫ້ປະຊາຊົນດື່ມນໍ້າຢ່າງໜ້ອຍວັນລະ 2 ລິດ ເຖິງວ່າບໍ່ມີຄວາມຮູ້ສຶກຢາກກໍຕາມ ເພື່ອຫລຸດຄວາມສ່ຽງຂອງຮ່າງກາຍຈາກການເກີດອາການຂາດນໍ້າ.

     ກະຊວງຊັບພະຍາກອນນໍ້າ ແລະ ກົມອຸຕຸນິຍົມວິທະຍາແຫ່ງຊາດຂອງກໍາປູເຈຍ ຄາດຄະເນອຸນຫະພູມທົ່ວທຸກພາກຂອງປະເທດ ອາດເພີ່ມສູງເຖິງ 43 ອົງສາ ລະຫວ່າງວັນທີ 28-30 ເມສານີ້ ເຊິ່ງຈະເປັນສະຖິຕິສູງທີ່ສຸດໃນຮອບໄລຍະເວລາປະມານ 170 ປີ.

     ເຖິງຢ່າງໃດກໍດີ, ກົມອຸຕຸນິຍົມວິທະຍາແຫ່ງຊາດກໍາປູເຈຍຄາດຄະເນ ອຸນຫະພູມຈະເລີ່ມຫລຸດລົງໃນໄລຍະຕົ້ນເດືອນພຶດສະພາທີ່ຈະເຖິງ ເຊິ່ງຈະເປັນການເຂົ້າສູ່ລະດູຝົນ.