ຄື້ນຄວາມຮ້ອນປົກຄຸມຟີລິບປິນ ດັດຊະນີຄວາມຮ້ອນສູງເກືອບ 50 ອົງສາ
ຟີລິບປິນຜະເຊີນສະພາບອາກາດຮ້ອນ ດັດຊະນີຄວາມຮ້ອນຢູ່ເກາະລູຊອນສູງເກືອບ 50 ອົງສາ.
ວັນທີ 24 ເມສາ, ກົມອຸຕຸນິຍົມວິທະຍາແຫ່ງຊາດຂອງຟີລິບປິນ ລາຍງານດັດຊະນີຄວາມຮ້ອນຢູ່ເມືອງອາປາຣີ ແຂວງຄາກາຢັນ ທາງເໜືອສຸດຂອງເກາະລູຊອນ ໄດ້ 48 ອົງສາ ໃນວັນທີ 23 ເມສາຜ່ານມາ ເປັນສະຖິຕິສູງສຸດຂອງປະເທດ ເຖິງມີທ່າອ່ຽງວ່າ ດັດຊະນີຄວາມຮ້ອນອາດຫລຸດລົງໃນທ້າຍອາທິດນີ້ ແຕ່ມີທ່າອ່ຽງວ່າ ອາດຍັງສູງໃນລະດັບ 45 ອົງສາ ໃນວັນທີ 24 ເມສານີ້.
ຂະນະທີ່ອຸນຫະພູມປົກກະຕິຂອງເມືອງອາປາຣີ ຢູ່ລະດັບ 36,4 ອົງສາ ໃນວັນທີ 23 ເມສາ ແລະ ກົມອຸຕຸນິຍົມວິທະຍາແຫ່ງຊາດຄາດຄະເນວ່າ: ເຖິງວ່າອຸນຫະພູມມີທ່າອ່ຽງຫລຸດລົງ, ແຕ່ຈະຍັງສູງຢູ່ໃນລະດັບ 35 ອົງສາ.
ສ່ວນດັດຊະນີຄວາມຮ້ອນຂອງນະຄອນຫລວງມະນິລາ ຢູ່ລະດັບ 45 ອົງສາ ໃນວັນທີ 23 ອົງສາ ແລະ ອາດຍັງສູງຢູ່ໃນລະດັບ 44 ອົງສາ ໃນວັນທີ 24 ເມສາ, ສ່ວນອຸນຫະພູມປົກກະຕິວັດແທກໄດ້ 37,1 ອົງສາ ໃນວັນທີ 23 ເມສາຜ່ານມາ.
ທັງນີ້, ອົງການອຸຕຸນິຍົມວິທະຍາໂລກ (WMO) ເຜີຍແຜ່ລາຍງານວ່າ: ອຸນຫະພູມສະເລ່ຍຂອງທະວີບອາຊີໃນປີຜ່ານມາ ສູງກວ່າຄ່າສະເລ່ຍອຸນຫະພູມລະຫວ່າງປີ 1961-1990 ຢູ່ລະດັບ 1,87 ອົງສາ ເຊິ່ງເປັນສັນຍານບົ່ງບອກວ່າ: ພາກພື້ນແຫ່ງນີ້ກໍາລັງຜະເຊີນສະພາບໂລກຮ້ອນໄວກວ່າພື້ນທີ່ແຫ່ງອື່ນຂອງໂລກ.
