ໄລຍະການສະເຫລີມສະຫລອງບຸນປີໃໝ່ລາວ ພສ 2567 ຢູ່ນະຄອນຫລວງພະບາງ ມີອຸປະຕິເຫດເພີ່ມຂຶ້ນ ທຽບໃສ່ປີຜ່ານມາ

ວັນທີ 22 ເມສາ 2024 ນີ້, ພັນຕີ ອານົງ ມິ່ງຄໍາ ຮອງຫົວໜ້າຫ້ອງຕໍາຫລວດ ຜູ້ຊີ້ນຳວຽກງານ ຈະລາຈອນ ນະຄອນຫລວງພະບາງ ໄດ້ໃຫ້ສຳພາດວ່າ: ໃນໄລຍະບຸນປີໃໝ່ລາວປີນີ້ ຢູ່ນະຄອນຫລວງພະບາງ ມີອຸປະຕິເຫດເກີດຂຶ້ນທັງໝົດ 20 ລາຍ, ມີພາຫະນະເປເພ 38 ຄັນ, ມີຜູ້ໄດ້ຮັບບາດເຈັບ 27 ຄົນ, ບາດເຈັບເລັກນ້ອຍ 16 ຄົນ, ເຈັບສົມຄວນ 10 ຄົນ, ສາຫັດ 1 ຄົນ, ເສຍຊີວິດ 5 ຄົນ, ຍິງ 1 ຄົນ, ສາເຫດຂອງການເກີດອຸປະຕິເຫດ ສ່ວນໃຫຍ່ ແມ່ນຈາກການດື່ມເຫຼົ້າ, ແລ່ນລົດໄວ, ບໍ່ປ່ອຍສິດ, ແຊງບໍ່ຮັບປະກັນ, ແລ່ນບໍ່ແນບເສັ້ນ ແລະ ແລ່ນກິນທາງ, ຖ້າທຽບໃສ່ປີຜ່ານມາ ແມ່ນມີຕົວເລກເພີ່ມຂຶ້ນ ເຊີ່ງປີ 2023 ມີອຸປະຕິເຫດ ເກີດຂຶ້ນ 8 ລາຍ, ພາຫະນະເປເພ 14 ຄັນ, ຄົນໄດ້ຮັບບາດເຈັບ 14 ຄົນ, ຄົນເສຍຊີວິດ 1 ຄົນ.

 ກ່ອນໜ້ານັ້ນ ກອງບັນຊາການປ້ອງກັນຄວາມສະຫງົບນະຄອນ ຫລວງພະບາງ ໄດ້ຈັດວາງກຳລັງຢູ່ແຕ່ລະຈຸດ ເພື່ອອຳນວຍຄວາມສະດວກໃຫ້ແກ່ຜູ້ໃຊ້ລົດໃຊ້ຖະໜົນ ເຮັດໃຫ້ສະພາບການສັນຈອນໂດຍລວມ ມີຄວາມເປັນລະບຽບຮຽບຮ້ອຍດີ,  ແຕ່ຍັງພົບບັນຫາບາງດ້ານ ເປັນຕົ້ນການຈັດວາງກຳລັງ ແມ່ນໄດ້ນຳໃຊ້ນັກສຶກສາ ຂອງໂຮງຮຽນກໍ່ສ້າງນາຍສີບ ລົງປະຕິບັດໜ້າທີ່ຊ່ວຍ ເນື່ອງຈາກກຳລັງເຈົ້າໜ້າທີ່ວິຊາສະເພາະມີຈຳກັດ, ພ້ອມນີ້ ຜູ້ໃຊ້ລົດໃຊ້ຖະໜົນບາງຄົນ ບໍ່ເອົາໃຈໃສ່ປະຕິບັດກົດລະບຽບການສັນຈອນ ເຮັດໃຫ້ການສັນຈອນຕິດຄັດບາງຈຸດ ແລະ ເກີດອຸປະຕິເຫດ.

 ດັ່ງນັ້ນ ຈຶ່ງຮຽກຮ້ອງໃຫ້ຜູ້ໃຊ້ລົດ - ໃຊ້ຖະໜົນ ສືບຕໍ່ໃນການປະຕິບັດກົດລະບຽບການສັນຈອນ ເພື່ອຫລຸດຜ່ອນສະພາບການເກີດອຸປະຕິເຫດ ອັນຈະນຳໄປສູ່ການສູນເສຍທາງດ້ານຊີວິດ ແລະຊັບສີນຂອງປະຊາຊົນບັນດາເຜົ່າ.