ອາເມລິກາໃຊ້ສິດ ຢັບຢັ້ງປາແລັສຕິນເປັນສະມາຊິກ UN

      ອາເມລິກາໃຊ້ສິດໃນກອງປະຊຸມສະພາຄວາມໝັ້ນຄົງແຫ່ງສະຫະປະຊາຊາດ (UNSC) ວັນທີ 18 ເມສາ ໂດຍຄັດຄ້ານຮ່າງມະຕິທີ່ສະເໜີໃຫ້ຮັບຮອງປາແລັສຕິນເຂົ້າເປັນສະມາຊິກອົງການສະຫະປະຊາຊາດ (UN) ໂດຍສົມບູນ ເຊິ່ງຖືເປັນການຢັບຢັ້ງການຮັບຮອງຄວາມເປັນລັດຂອງປາແລັສຕິນເຊັ່ນກັນ.

     ໂດຍອັງກິດ ແລະ ສະວິດງົດອອກສຽງ, ສ່ວນສະມາຊິກ UNSC ທີ່ເຫລືອອີກ 12 ປະເທດ ລວມທັງສະມາຊິກຖາວອນ ຄືຝຣັ່ງ, ຈີນ ແລະ ຣັດເຊຍ ລົງມະຕິເຫັນພ້ອມ.

     Robert Wood ຮອງເອກອັກຄະລັດຖະທູດອາເມລິກາ ປະຈໍາສະຫະປະຊາຊາດ ລະບຸວ່າ: ລັດຖະບານປາແລັສຕິນທີ່ເປັນອິດສະຫລະຄວນໄດ້ຮັບການສະຖາປະນາຜ່ານການເຈລະຈາໂດຍກົງລະຫວ່າງອິດສະລາແອນກັບທາງການປາແລັສຕິນ ບໍ່ແມ່ນຜ່ານການດໍາເນີນງານໃນເວທີ UN.

     ສ່ວນປະທານາທິບໍດີ ມາໝູດ ອັບບາສ ຂອງປາແລັສຕິນ ອອກຖະແຫລງການປະນາມການໃຊ້ສິດຕອບໂຕ້ຂອງອາເມລິກາວ່າ: “ບໍ່ຍຸຕິທໍາ ຜິດຈະລິຍະທໍາ ແລະ ໄຮ້ເຫດຜົນ” ໂດຍຊີ້ວ່າ: ອາເມລິກາກໍາລັງທ້າທາຍ “ຈຸດປະສົງຂອງປະຊາຄົມສາກົນ ເຊິ່ງສະໜັບສະໜູນຢ່າງແຂງແຮງຕໍ່ການເປັນສະມາຊິກໂດຍສົມບູນຂອງປາແລັສຕິນ”.

     ຂະນະທີ່ທ່ານ ຣິຢາດ ມັນຊູ ເອກອັກຄະລັດຖະທູດປາແລັສຕິນ ປະຈໍາສະຫະປະຊາຊາດ ກ່າວຕໍ່ກອງປະຊຸມ UNSC ຫລັງການລົງມະຕິວ່າ: “ຂໍ້ມູນຄວາມຈິງທີ່ຮ່າງມະຕິນີ້ບໍ່ຜ່ານ ຈະບໍ່ທໍາລາຍເຈດຕະນາຂອງພວກເຮົາ ແລະ ຈະບໍ່ທໍາລາຍຄວາມມຸ້ງໝັ້ນຂອງພວກເຮົາ, ພວກເຮົາຈະບໍ່ຢຸດຄວາມພະຍາຍາມ”.

     ຄວາມພະຍາຍາມຊຸກດັນປາແລັສຕິນເຂົ້າເປັນສະມາຊິກ UN ໂດຍສົມບູນ ເກີດຂຶ້ນຫລັງຈາກສົງຄາມລະຫວ່າງອິດສະລາແອນ ແລະ ກຸ່ມຕິດອາວຸດຮາມັດຢູ່ເຂດກາຊາເລີ່ມຂຶ້ນຍາວນານກວ່າ 6 ເດືອນ. ໃນຂະນະທີ່ອິດສະລາແອນພະຍາຍາມຂະຫຍາຍການຕັ້ງຖິ່ນຖານຢູ່ເຂດເວສແບງ ເຊິ່ງ UN ຖືວ່າເປັນການກະທໍາທີ່ຜິດກົດໝາຍ.

ອ້າງອີງ:https://www.channelnewsasia.com/world/us-vetoes-palestine-membership-un-security-council-4276636