ດູໄບເລີ່ມຟື້ນຕົວ ຫລັງນໍ້າຖ້ວມໜັກກະທັນຫັນ ຜູ້ຊ່ຽວຊານຊີ້ເປັນສັນຍານເຕືອນໂລກຮ້ອນຮຸນແຮງ

      ສະຖານະການຢູ່ເມືອງດູໄບ ເມືອງໃຫຍ່ທີ່ສຸດຂອງສະຫະລັດອາຣັບເອມິເຣດ ເລີ່ມດີຂຶ້ນ ຫລັງເກີດພາຍຸຝົນຕົກໜັກທີ່ສຸດໃນຮອບ 75 ປີ ຈົນນໍ້າຖ້ວມໜັກໃນຫລາຍພື້ນທີ່ ແລະ ເກີດຄວາມວຸ້ນວາຍຢູ່ສະໜາມບິນຫລັກ, ສ່ວນກົມອຸຕຸນິຍົມວິທະຍາເຕືອນວ່າ: ເປັນສັນຍານຫລ້າສຸດຂອງຄວາມຮຸນແຮງຈາກສະພາບໂລກຮ້ອນ.

      ວັນທີ 18 ເມສາ, ສໍານັກຂ່າວຕ່າງປະເທດລາຍງານວ່າ: ທາງຫລວງສາຍສໍາຄັນ ແລະ ສະໜາມບິນຕົກຢູ່ໃນຄວາມວຸ້ນວາຍ ຫລັງຝົນທີ່ຕົກສູງເຖິງ 259,5 ມິນລີແມັດ ຫລາຍທີ່ສຸດນັບແຕ່ເລີ່ມບັນທຶກເມື່ອ 75 ປີຜ່ານມາ ເຮັດໃຫ້ສູນກາງທາງການເງິນຂອງຕາເວັນອອກກາງຈົມນໍ້າ.

      ຕໍາຫລວດລາຍງານວ່າ: ຜູ້ເສຍຊີວິດຢ່າງໜ້ອຍ 1 ຄົນ ເປັນຜູ້ຊາຍອາຍຸ 70 ປີ ຖືກກະແສນໍ້າພັດຫາຍໄປເວລາຢູ່ໃນລົດ ໃນເມືອງຣາສອັລໄຄມາ ທາງຕາເວັນອອກສຽງເໜືອຂອງປະເທດ.

      ທັງນີ້, ໂຮງຮຽນຫລາຍແຫ່ງຢູ່ນະຄອນດູໄບຈະປິດການຮຽນການສອນໄປຮອດອາທິດໜ້າ ເນື່ອງຈາກເຈົ້າໜ້າທີ່ຕ້ອງອະນາໄມສະຖານທີ່ຄັ້ງໃຫຍ່ກ່ອນ.

      ທ່ານ ຊີກ ໂມຮໍາເໝັດ ບິນ ນາຢານ ປະທານາທິບໍດີແຫ່ງ UAE ສັ່ງໃຫ້ເຈົ້າໜ້າທີ່ດໍາເນີນການສຶກສາສະພາບໂຄງລ່າງພື້ນຖານທົ່ວປະເທດ ເພື່ອຈໍາກັດຄວາມເສຍຫາຍທີ່ອາດເກີດຂຶ້ນ. ນອກຈາກນີ້ ລັດຖະບານຍັງສັ່ງໃຫ້ອົບພະຍົບຄອບຄົວທີ່ໄດ້ຮັບຜົນກະທົບໄປອາໄສຢູ່ສະຖານທີ່ປອດໄພຊົ່ວຄາວ.

      ນອກຈາກນັ້ນ, ພາຍຸຫົວນີ້ຍັງໄດ້ພັດຖະຫລົ່ມໂອມານ ສົ່ງຜົນເຮັດໃຫ້ມີຜູ້ເສຍຊີວິດແລ້ວ 19 ຄົນ ລວມທັງເດັກນ້ອຍ ກ່ອນຈະຖະຫລົ່ມສະຫະລັດອາຣັບເອມິເຣດ ແລະ ບາເຣນ ໃນວັນທີ 15 ແລະ 16 ເມສາ.

      ເຖິງຢ່າງໃດກໍດີ, ສູນອຸຕຸນິຍົມວິທະຍາແຫ່ງຊາດໂອມານ ໄດ້ອອກມາປະຕິເສດຂໍ້ກ່າວຫາໃນການໃຊ້ເຕັກໂນໂລຊີເລັ່ງ ແລະ ເພີ່ມປະລິມານຝົນ ແລະ ກ່າວວ່າພາຍຸຫົວນີ້ມີກໍາລັງແຮງຢູ່ແລ້ວ.

     ນັກອຸຕຸນິຍົມວິທະຍາກ່າວວ່າ: ເປັນເລື່ອງເຂົ້າໃຈຜິດ “ຝົນຕົກໜັກທີ່ສຸດໃນຮອບ 75 ປີ ບໍ່ໄດ້ເກີດຈາກຝົນທຽມ ແລະ ພວກເຮົາຄວນເວົ້າເຖິງການປ່ຽນແປງສະພາບອາກາດ ທີ່ສົ່ງຜົນເຮັດໃຫ້ເກີດສະພາບອາກາດປ່ຽນແປງ”.