ເຮັດໂບລາສົ່ງໂດຣນ ແລະ ມິສໄຊໂຈມຕີອິດສະລາແອນ ທະຫານບາດເຈັບ 14 ຄົນ
ກຸ່ມເຮັດໂບລາຢູ່ລີບັງເປີດເຜີຍໃນວັນທີ 17 ເມສາວ່າ: ນັກຮົບຂອງກຸ່ມຍິງມິສໄຊ ແລະ ໂດຣນເຂົ້າໃສ່ອາຄານທາງທະຫານໃນຕອນເໜືອຂອງອິດສະລາແອນ ສົ່ງຜົນເຮັດໃຫ້ມີທະຫານອິດສະລາແອນບາດເຈັບ 14 ຄົນ.
ສ່ວນອິດສະລາແອນລາຍງານວ່າ: ໃນຈໍານວນເຈົ້າໜ້າທີ່ທີ່ໄດ້ຮັບບາດເຈັບ 14 ຄົນ ມີ 6 ຄົນທີ່ໄດ້ຮັບບາດເຈັບສາຫັດ. ຂະນະທີ່ມີລາຍງານກວດພົບໂດຣນ ແລະ ລູກສອນໄຟຕໍ່ຕ້ານລົດຖັງຫລາຍລູກທີ່ຍິງຈາກລີບັງໄປບ້ານອາຣັບ ອັລ-ອາຣໍາເຊ ໃນອິດສະລາແອນ.
ກຸ່ມເຮັດໂບລາເປີດເຜີຍວ່າ: ການໂຈມຕີຄັ້ງນີ້ເກີດຂຶ້ນເພື່ອຕອບໂຕ້ເຫດການທີ່ອິດສະລາແອນເປີດປະຕິບັດການໂຈມຕີພື້ນທີ່ທາງຕອນໃຕ້ຂອງລີບັງໃນວັນທີ 16 ເມສາ ສົ່ງຜົນເຮັດໃຫ້ມີຜູ້ເສຍຊີວິດ 3 ຄົນ ແລະ ໜຶ່ງໃນນັ້ນເປັນເຈົ້າໜ້າທີ່ລະດັບຜູ້ບັນຊາການຂອງກຸ່ມເຮັດໂບລາ.
ຂະນະດຽວກັນ, ໃນວັນທີ 17 ເມສາ ກອງທັບອາກາດອິດສະລາແອນລະບຸວ່າ: ເຮືອບິນຮົບຂອງຕົນເຂົ້າໂຈມຕີໂຄງສ້າງພື້ນຖານຂອງກຸ່ມເຮັດໂບລາຢູ່ທາງຕາເວັນອອກຂອງລີບັງ ຖືວ່າການໂຈມຕີດັ່ງກ່າວຂະຫຍາຍວົງອອກໄປນອກເໜືອພື້ນທີ່ຊາຍແດນທາງໃຕ້ ເຊິ່ງເປັນພື້ນທີ່ສ່ວນໃຫຍ່ທີ່ອິດສະລາແອນຕັ້ງເປົ້າໂຈມຕີ.
ເຖິງຢ່າງໃດກໍຕາມ, ການສູ້ຮົບທີ່ເກີດຂຶ້ນເຮັດໃຫ້ເກີດກະແສຄວາມກັງວົນວ່າ: ຄວາມຂັດແຍ່ງທີ່ເກີດຂຶ້ນຕາມພື້ນທີ່ຕ່າງໆຢູ່ຕາເວັນອອກກາງອາດສ່ຽງລຸກລາມສູ່ສົງຄາມພາກພື້ນ ແລະ ຄວາມກັງວົນເຫລົ່ານີ້ກໍທະວີຄວາມຮຸນແຮງຂຶ້ນ ພາຍຫລັງເກີດເຫດອີຣານໃຊ້ໂດຣນ ແລະ ລູກສອນໄຟຫລາຍຮ້ອຍລູກຍິງຖະຫລົ່ມອິດສະລາແອນໃນທ້າຍອາທິດຜ່ານມາ ເພື່ອຕອບໂຕ້ເຫດໂຈມຕີສະຖານກົງສຸນອີຣານຢູ່ນະຄອນຫລວງດາມັດກັດຂອງຊິຣີໃນຕົ້ນເດືອນ ເຊິ່ງອິດສະລາແອນໃຫ້ຄໍາໝັ້ນວ່າຈະຕອບໂຕ້ກັບເຊັ່ນກັນ.
ອ້າງອີງ:
- https://www.reuters.com/world/middle-east/hezbollah-launches-missiles-drones-northern-israel-wounding-14-israeli-soldiers-2024-04-17/
- https://www.reuters.com/world/middle-east/israeli-strikes-lebanon-kill-three-including-hezbollah-commander-sources-say-2024-04-16/
