ຮ່າງກາຍຟ້ອງວ່າທ່ານກຳລັງມີຄວາມຮັກ

ທ່ານກຳລັງຕົກຂຸມຮັກໃຜຢູ່ຫລືບໍ່ ຫລື ກຳລັງສັບສົນກັບຄວາມຮູ້ສຶກຢູ່ ລອງມາເບິ່ງອາການທີ່ຮ່າງກາຍບອກຕໍ່ໄປນີ້ :

1. ເກີດປະຕິກິລິຍາໃນສະໝອງກະທັນຫັນ : ຮັກແຮກພົບອາດມີຢູ່ແທ້ ເພາະຜົນການສຳຫລວດທີ່ໄດ້ຮັບການຕີພິມລົງໃນ ວາລະສານ Journal of Sexual Medicine ສະແດງໃຫ້ເຫັນແລ້ວວ່າທຸກຄົນສາມາດຮັບຮູ້ໄດ້ວ່າໂຕເອງກຳລັງຕົກຂຸມຮັກຢູ່ ຫລືບໍ່ ໂດຍໃຊ້ເວລາໃນການຕັດສິນຄວາມຮູ້ສຶກພຽງ 5 ວິນາທີ ຫລັງຈາກທີ່ສະໝອງ 12 ພາກສ່ວນຊ່ວຍກັນໄລ່ສານເຄມີ ເຊັ່ນ : ອະດຣີນາລິນ, ໂດພາມີນ ແລະ ອື່ນໆອອກມາຢ່າງຕໍ່ເນື່ອງ.
2. ຫົວໃຈຢຸດເຕັ້ນ (ເຕັ້ນຊ້າລົງ) : ເນື່ອງຈາກການຕົກຂຸມຮັກມີຜົນກັບລະດັບຮໍໂມນໃນຮ່າງກາຍໂດຍກົງ ດ້ວຍເຫດນີ້ຈຶ່ງສົ່ງ ຜົນໃຫ້ລະດັບຄວາມດັນເລືອດກັບອັດຕາການເຕັ້ນຂອງຫົວໃຈມີຈຳນວນຫລຸດລົງໄປນຳ.
3. ມີບັນຫາກັບການນອນ : ນອກຈາກນີ້, ຍັງມີຜົນການວິໄຈທີ່ຕີພິມລົງໃນວາລະສານ Adolescent Health ລະບຸວ່າ : ຄົນທີ່ກຳລັງຕົກຂຸມຮັກໃຜຈັກຄົນນັ້ນ ພວກເຂົາຈະໃຊ້ເວລາໄປກັບການນອນຫລັບໜ້ອຍລົງ ເຊິ່ງສາເຫດກໍເດົາໄດ້ບໍ່ຍາກເລີຍ ເພາະມັນສືບເນື່ອງມາຈາກຄົນເຫລົ່ານັ້ນໃຊ້ເວລາໄປກັບການຄິດຮອດຄົນທີ່ຕົນເອງມັກຕະຫລອດຄືນ ຄືກັບອາການເວລາທີ່ຝັນເຖິງສິ່ງຂອງທີ່ຢາກໄດ້.
4. ບໍ່ຮູ້ສຶກເຖິງຄວາມເຈັບປວດ : ສ່ວນຜົນການວິໄຈຂອງຄະນະແພດສາດຈາກມະຫາວິທະຍາໄລສະແຕນຟອດ ກໍສະແດງໃຫ້ ເຫັນວ່າ : ບໍ່ແປກຫາກຄວາມເຈັບປວດຈະຫາຍໄປເມື່ອມີຄວາມຮັກ ເນື່ອງຈາກໃນຕອນນີ້ຮ່າງກາຍກຳລັງເສບຕິດຄວາມຮັກຈົນເຮັດໃຫ້ລືມເລື່ອງລາວທີ່ເຄີຍເຈັບປວດໄດ້.
5. ກາຍເປັນຄົນມັກລືມ : ເມື່ອຕົກຂຸມຮັກໃຜຈັກຄົນ ສະໝອງກໍຈະຫລັ່ງຮໍໂມນຄວາມຮັກ ຫລື ຮໍໂມນອົກຊິໂທຊິນອອກມາ ເຊິ່ງຮໍໂມນນີ້ເຮັດໃຫ້ລະບົບໃນການຈື່ຈຳສິ່ງອ້ອມໂຕຂອງຄົນຜູ້ນັ້ນມີປະສິດທິພາບໃນການເຮັດວຽກຫລຸດລົງ ກໍເລີຍເປັນສາເຫດທີ່ເຮັດໃຫ້ເກີດອາການຫລົງໆລືມໆໃນໄລຍະທີ່ກຳລັງຕົກຂຸມຮັກຢູ່.
6. ເລີ່ມມີອາການຫຶງຫວງ : ມັນເປັນເລື່ອງທີ່ຊ່ວຍບໍ່ໄດ້ແທ້ໆ ຖ້າທ່ານຈະຮູ້ສຶກບໍ່ພໍໃຈເວລາທີ່ເຫັນຄົນທີ່ທ່ານກຳລັງຕົກຂຸມຮັກລົມກັບຄົນອື່ນທີ່ເປັນເພດກົງກັນຂ້າມ ນັ້ນເປັນຍ້ອນມະຫາວິທະຍາໄລແຫ່ງລັດກາລິຟໍເນຍ ພົບວ່າ : ຄວາມຮັກສາມາດເຮັດໃຫ້ຄົນໆໜຶ່ງຮູ້ສຶກຢາກປົກປ້ອງຄົນທີ່ຕົນເອງຮັກ, ແຕ່ເປັນຄວາມຮູ້ສຶກທີ່ຮຸນແຮງຈົນເຮັດໃຫ້ຢາກປົກປ້ອງຫລາຍຈົນເກີນໄປ.
7. ຄິດວ່າອາຫານມີລົດຊາດຫວານຫລາຍຂຶ້ນ : ໃນໄລຍະສະພາບອາລົມປົກກະຕິ ທັງອາຫານ ແລະ ເຄື່ອງດື່ມກໍມີລົດຊາດແຕກຕ່າງກັນໄປຕາມສ່ວນປະສົມ, ແຕ່ຜົນການສືກສາຂອງ American Psychological Association ກໍມີການລາຍງານວ່າ : ເວລາທີ່ກຳລັງຕົກຂຸມຮັກອາຫານທຸກຢ່າງຈະມີລົດຊາດຫວານໄປໝົດຫລັງຈາກທີ່ພວກເຂົາໄດ້ສອບຖາມຜູ້ເຂົ້າທົດລອງ.
8. ຖືກສິ່ງອ້ອມຂ້າງລົບກວນໄດ້ງ່າຍ : ວຽກງານວິໄຈທີ່ໄດ້ຮັບການຕີພິມລົງໃນວາລະສານ Motivation and Emotion ກໍລະບຸວ່າ : ເມື່ອຄົນເຮົາເລີ່ມຄິດເຖິງຄົນຮັກ ຄວາມຮັກຈະເຮັດໃຫ້ຄວາມສາມາດໃນການຕັ້ງສະມາທິ ຫລື ຈົດຈໍ່ກັບສິ່ງທີ່ຢູ່ຕໍ່ໜ້າຫລຸດລົງ.
9. ເວົ້າໂດຍນ້ຳສຽງສູງກ່ວາປົກກະຕິ : ເວລາທີ່ແມ່ຍິງມີໂອກາດໄດ້ລົມກັບຄົນທີ່ຕົນເອງຮູ້ສືກສົນໃຈ ຫລາຍເທື່ອທີ່ແມ່ຍິງເຫລົ່ານັ້ນເວົ້າໂດຍນ້ຳສຽງທີ່ສູງກ່ວາລະດັບປົກກະຕິ ເຊິ່ງເປັນສິ່ງທີ່ໄດ້ຮັບການພິສູດແລ້ວວ່າເປັນຄວາມຈິງ ແລະ ກໍເປັນການວິໄຈທີ່ໄດ້ຖືກຕີພິມໄປແລ້ວໃນວາລະສານ Evolutionary Psychology.
10. ກະດູກແຂງແຮງຂຶ້ນ : ນອກຈາກນີ້ ຫລາຍວຽກງານວິໄຈຍັງພົບຕື່ມວ່າຄູ່ແຕ່ງດອງທີ່ໃຊ້ຊີວິດຢ່າງມີຄວາມສຸກຈະເຮັດໃຫ້ກະດູກຂອງພວກເຂົາແຂງແຮງ ແລະ ມີສຸຂະພາບທີ່ດີຂຶ້ນນຳ. ຮູ້ແບບນີ້ແລ້ວກໍຈັບມືຄົນຮັກ ແລ້ວຈູງມືກັນເຂົ້າພິທີແຕ່ງດອງກັນໄປເລີຍດີກ່ວາ.