ຄວາມໝາຍຂອງວັນເນົາ
ວັນເນົາ: “ເນົາ” ຄຳນີ້ແປວ່າ: ຈຶ້ງຢູ່, ບໍ່ຍົກຍ້າຍ, ບໍ່ເຄື່ອນທີ່; ນອກນີ້ ວັນເນົາຍັງໝາຍເຖິງວັນຢູ່ລະຫວ່າງກາງການປ່ຽນຂອງປີ ຈສ ຫລື ຈຸນລະສັກກະລາດ. ໃນມື້ເນົານີ້ ພະສົງ ສາມະເນນ ກໍຈະເນົາຢູ່ວັດ ເພື່ອສູດມົງຄຸນໃຫ້ພອນ (ສູດລົດນ້ຳ), ຝ່າຍຄາລະວາດກໍຈະພ້ອມພາກັນຈັດແຫ່ນາງສັງຂານ ທີ່ໄດ້ປະກວດຄັດເລືອດມາແລ້ວ ພ້ອມກັບແຫ່ມະໂຫລະສົບຕ່າງໆ, ປະເພນີນີ້ນິຍົມປະຕິບັດຄ້າຍຄືກັນກັບໃນທົ່ວປະເທດ. ແຕ່ທີ່ພິເສດກວ່າໝູ່ແມ່ນຢູ່ນະຄອນຫລວງພະບາງ ເພາະເພິ່ນມີການອັນເຊີນເອົາອັງພະ “ພຸດທະລາວັນ” (ພຣະບາງ) ອອກໃຫ້ມວນຊົນໄດ້ສັກກາລະບູຊາ ແລະ ຫົດສົງເຊິ່ງຊາວເມືອງມັກເອີ້ນວ່າ: “ແຫ່ຫວໍ່”.
ຂະບວນແຫ່ພຣະບາງທີ່ເອີ້ນວ່າ ແຫ່ຫວໍ່ ນີ້ຈະປະກອບມີຂະບວນແຫ່ອົງພະບາງ, ປູ່ເຍີ-ຍ່າເຍີ, ພະສົງສາມະເນນ, ພຸດທະຄຳພີ, ຂະບວນນາງແກ້ວ, ຕົວລະຄອນໃນເລື່ອງພະລັກ-ພະລາມ, ຂະບວນມະໂຫລີ-ປີ່ພາດ, ຂະບວນແຫ່ສຽນ (ຫົວ) ຂອງທ້າວກະບິນລະພົມ, ນາງສັງຂານ, ຂະບວນບ່າວ-ສາວ ແລະ ຂະບວນມະຫາຊົນຢ່າງອະເນກອະນັນຕາທີ່ຍິ່ງໃຫຍ່ອະລັງການ ເຊິ່ງນັບວ່າ ເປັນພິທີແຫ່ທີ່ງົດງາມ ແລະ ຍິ່ງໃຫຍ່ທີ່ສຸດ.
