ຊີຣີຮຽກຮ້ອງໃຫ້ຕວກກີຖອນ ກຳລັງອອກຈາກປະເທດໂດຍໄວ

ສື່ທາງການຊີຣີລາຍງານອ້າງແຫລ່ງຂ່າວກະຊວງຕ່າງປະເທດຊີຣີທີ່ຮຽກຮ້ອງໃຫ້ຕວກກີຖອນກອງກຳລັງອອກໄປທັນທີຈາກແຂວງອິດລິບທາງຕາເວັນຕົກສຽງເໜືອຂອງປະເທດໂດຍບໍ່ມີເງື່ອນໄຂ.

ສຳນັກຂ່າວຊານາລາຍງານວ່າ: ກອງກຳລັງຕວກກີເຂົ້າມາແຂວງອິດລິບໃນຄໍ່າວັນທີ 12 ຕຸລາ ເພື່ອຄວບຄຸມພື້ນທີ່ໃນເຂດປອດໄພ ເຊິ່ງຈັດຕັ້ງຂຶ້ນຕາມຂໍ້ຕົກລົງລະຫວ່າງກຸ່ມກະບົດໃນຊີຣີ ເຊິ່ງມີຕວກກີສະໜັບສະໜູນ ກັບລັດຖະບານຊີຣີທີ່ມີຣັດເຊຍ ແລະ ອີຣານເປັນພັນທະມິດໄດ້ເຈລະຈາກັນໄວ້ຢູ່ນະຄອນຫລວງອັດຕານາໃນຕົ້ນປີ. ເຖິງຢ່າງໃດກໍຕາມ ແຫລ່ງຂ່າວກະຊວງຕ່າງປະເທດຊີຣີກ່າວວ່າ: ກອງກຳລັງຕວກກີຮຸກຮານເຂົ້າມາໃນເຂດແດນຊີຣີ ເຊິ່ງຖືວ່າຂັດກັບຂໍ້ຕົກລົງທີ່ໄດ້ເຊັນຮ່ວມກັນໄວ້ ແລະ ຂໍໃຫ້ນຳກອງກຳລັງອອກໄປຈາກດິນແດນຂອງຊີຣີໂດຍໄວທີ່ສຸດ ໂດຍເນັ້ນວ່າລັດຖະບານຕວກກີຈະຕ້ອງປະຕິບັດຕາມທີ່ໄດ້ຕົກລົງກັນໄວ້ໃນນະຄອນຫລວງອັດຕານາ. ກ່ອນໜ້ານີ້ ໜັງສືພິມເຮີຣິເຢດຂອງຕວກກີລາຍງານໃນວັນທີ 13 ຕຸລາວ່າ: ທະຫານກວ່າ 100 ຄົນ ເຊິ່ງລວມທັງກອງກຳລັງຊຸດພິເສດ ແລະ ລົດຫຸ້ມເກາະ 30 ຄັນ ເຄື່ອນກຳລັງເຂົ້າມາແຂວງອິດລິບຂອງຊີຣີ.