ອິດສະລາແອນປິດສະຖານທູດຫລາຍສິບແຫ່ງຊົ່ວຄາວ ຢ້ານອີຣານເອົາຄືນຈາກເຫດການຢູ່ຊິຣີ

     ມີລາຍງານວ່າ: ອິດສະລາແອນປິດສະຖານເອກອັກຄະລັດຖະທູດຫລາຍກວ່າ 20 ປະເທດຊົ່ວຄາວ ທ່າມກາງຄໍາເຕືອນຂອງອີຣານວ່າຈະຕອບໂຕ້ທີ່ອິດສະລາແອນໂຈມຕີສະຖານເອກອັກຄະລັດຖະທູດອີຣານຢູ່ຊິຣີ ແລະ ສັງຫານທະຫານອີຣານ 7 ຄົນ.

     ວັນທີ 8 ເມສາ, ສໍານັກຂ່າວຕ່າງປະເທດລາຍງານວ່າ: ສື່ທ້ອງຖິ່ນຫລາຍແຫ່ງຢູ່ອິດສະລາແອນລາຍງານວ່າ: ລັດຖະບານອິດສະລາແອນສັ່ງໂຈະ ແລະ ຫລຸດລະດັບການປະຕິບັດງານຂອງສະຖານເອກອັກຄະລັດຖະທູດຢ່າງໜ້ອຍ 28 ປະເທດ ລວມທັງອີຢິບ, ໂມຣ໊ອກໂກ, ຈໍແດນ, ບາເຣນ ແລະ ຕວກກີ.

      ທັງນີ້, ພົນຕີ ຢາຢາ ຣາຮິມ ຊາຟາວີ ທີ່ປຶກສາອາວຸໂສທາງທະຫານຂອງທ່ານ ຢາຕໍເລາະ ອາລີ ຄາເມເນອີ ຜູ້ນໍາສູງສຸດແຫ່ງອີຣານ ກ່າວວ່າ: ທັກສະແຫ່ງການຕໍ່ຕ້ານທີ່ເປັນການລວມຕົວຂອງພັນທະມິດຕໍ່ຕ້ານອິດສະລາແອນ ແລະ ຕາເວັນຕົກມີຄວາມພ້ອມລະດັບສູງສຸດ ແລະ ເຕືອນວ່າ: ສະຖານເອກອັກຄະລັດຖະທູດອິດສະລາແອນທົ່ວໂລກບໍ່ປອດໄພອີກຕໍ່ໄປ.

     ອີຣານປະກາດຈະແຈ້ງວ່າ: ຕ້ອງການເອົາຄືນ ເຫດການເຮືອບິນຂັບໄລ່ F-35 ຂອງອິດສະລາແອນ ຖິ້ມລະເບີດ 6 ລູກ ໂຈມຕີອາຄານກົງສຸນ ໃນບໍລິເວນສະຖານເອກອັກຄະລັດຖະທູດອີຣານປະຈໍານະຄອນຫລວງດາມັດກັດ ຂອງຊິຣີ ໃນວັນທີ 1 ເມສາຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດ 13 ຄົນ ໃນຈໍານວນນີ້ 7 ຄົນເປັນຊາວອີຣານ ແລະ ທັງໝົດເປັນເຈົ້າໜ້າທີ່ກອງກໍາລັງພິທັກປະຕິວັດອີຣານ (IRGC) ໂດຍຜູ້ເສຍຊີວິດໃນຈໍານວນນີ້ 2 ຄົນ ເປັນທະຫານຊັ້ນນາຍພົນ.

     ເຖິງຢ່າງໃດກໍຕາມ, ມາຮອດປັດຈຸບັນ ລັດຖະບານ ແລະ ກອງທັບອິດສະລາແອນຍັງສະຫງວນທ່າທີຕໍ່ເຫດການທີ່ເກີດຂຶ້ນ, ແຕ່ໃນໄລຍະເວລາຜ່ານມາ ອິດສະລາແອນບໍ່ເຄີຍໃຫ້ຄວາມເຫັນກ່ຽວກັບການໂຈມຕີລັກສະນະນີ້, ແຕ່ກ່າວວ່າ: ອິດສະລາແອນຈະບໍ່ມີທາງປ່ອຍໃຫ້ອີຣານ ແລະ ກອງກໍາລັງຝັກໄຝ່ອີຣານ ເຂົ້າມາຕັ້ງຖານທີ່ໝັ້ນ ແລະ ລີ້ຊ້ອນຢູ່ຊິຣີ.