ອາເມລິກາຍົກລະດັບເຝົ້າລະວັງ ການແພ່ລະບາດຂອງເຊື້ອໄວຣັສໄຂ້ຫວັດສັດປີກ

      ໜ່ວຍງານສາທາລະນະສຸກຂອງອາເມລິກາເຕືອນທຸກຝ່າຍທີ່ກ່ຽວຂ້ອງໃຫ້ເພີ່ມການກວດສອບ ເພື່ອຫລຸດຄວາມສ່ຽງການແຜ່ລະບາດຂອງເຊື້ອໄວຣັສໄຂ້ຫວັດສັດປີກ ທີ່ພົບຢູ່ຟາມງົວນົມຫລາຍແຫ່ງໃນປະເທດ.

      ວັນທີ 6 ເມສາ, ສໍານັກຂ່າວຕ່າງປະເທດລາຍງານວ່າ: ສູນຄວບຄຸມ ແລະ ປ້ອງກັນພະຍາດອາເມລິກາ (CDC) ອອກຖະແຫລງການວ່າ: ໄດ້ແຈ້ງເຕືອນເຖິງໜ່ວຍງານສາທາລະນະສຸກ ແລະ ກົມລ້ຽງສັດທຸກແຫ່ງພາຍໃນປະເທດ ໃຫ້ຍົກລະດັບມາດຕະການກວດສອບ, ປ້ອງກັນ ແລະ ຄວບຄຸມ ການແຜ່ລະບາດຂອງເຊື້ອໄວຣັສໄຂ້ຫວັດສັດປີກສາຍພັນ H5N1. ທັງນີ້ CDC ຢືນຢັນວ່າ: ຄວາມສ່ຽງທີ່ມະນຸດຈະຕິດເຊື້ອໄວຣັສໄຂ້ຫວັດສັດປີກ “ຍັງຢູ່ໃນລະດັບຕໍ່າ” ແຕ່ບໍ່ແມ່ນວ່າຈະບໍ່ມີໂອກາດເກີດຂຶ້ນ.

      ການເຄື່ອນໄຫວດັ່ງກ່າວຂອງ CDC ເກີດຂຶ້ນ ຫລັງກະຊວງກະສິກໍາອາເມລິກາພົບການແຜ່ລະບາດຂອງໄຂ້ຫວັດສັດປີກຢູ່ຟາມງົວນົມແຫ່ງໜຶ່ງໃນລັດໂອໄຮໂອ ໂດຍຜົນສອບສວນເບື້ອງຕົ້ນຊີ້ວ່າ: ຟາມແຫ່ງນີ້ຮັບງົວນົມມາຈາກຟາມແຫ່ງໜຶ່ງໃນລັດເທກຊັສ ວັນທີ 8 ມີນາຜ່ານມາ.

      ຫລັງຈາກນັ້ນ ມີການຢືນຢັນໃນວັນທີ 25 ມີນາຜ່ານມາ ພົບງົວນົມຢູ່ຟາມແຫ່ງນັ້ນຂອງລັດເທກຊັສ ຕິດເຊື້ອໄວຣັສໄຂ້ຫວັດສັດປີກ ແລະ ໃນວັນດຽວກັນ ມີການຢືນຢັນພົບງົວນົມຂອງຟາມແຫ່ງໜຶ່ງໃນລັດແຄນຊັສ ຕິດເຊື້ອໄວຣັສໄຂ້ຫວັດສັດປີກນໍາອີກ ເຊິ່ງເຈົ້າໜ້າທີ່ສັນນິຖານວ່າ: ການຕິດເຊື້ອໄວຣັສໄຂ້ຫວັດສັດປີກໃນງົວນົມຂອງຟາມຢູ່ລັດເທກຊັສ ແລະ ລັດແຄນຊັສ ມາຈາກນົກປ່າ.

     ຂະນະດຽວກັນ, ມີການຢືນຢັນວ່າ: ພົບງົວນົມຢູ່ຟາມຫລາຍແຫ່ງໃນລັດໄອດາໂຮ, ລັດມິຊິແກນ ແລະ ລັດນິວເມັກຊິໂກ ຕິດເຊື້ອໄວຣັສໄຂ້ຫວັດສັດປີກ ເຖິງວ່າຍັງບໍ່ພົບທີ່ມາຢ່າງຈະແຈ້ງ, ແຕ່ຜູ້ຊ່ຽວຊານໃຫ້ຄວາມເຫັນວ່າ: ສາຍພັນຂອງເຊື້ອໄວຣັສທີ່ພົບຢູ່ຟາມງົວນົມຂອງທັງສາມລັດ ມີຄວາມໃກ້ຄຽງກັບທີ່ພົບໃນລັດເທກຊັສ ແລະ ລັດແຄນຊັສ ໂດຍເຈົ້າໜ້າທີ່ຍັງບໍ່ຕັດຄວາມເປັນໄປໄດ້ກ່ຽວກັບການແຜ່ເຊື້ອລະຫວ່າງງົວນົມນໍາກັນ.

      ນອກຈາກນີ້, ສໍານັກງານສາທາລະນະສຸກຂອງລັດເທກຊັສລາຍງານໃນວັນທີ 1 ເມສາຜ່ານມາວ່າ: ພົບກໍາມະກອນຢູ່ຟາມແຫ່ງໜຶ່ງຕິດເຊື້ອໄວຣັສໄຂ້ຫວັດສັດປີກ ໂດຍມີອາການເດັ່ນຄື: ເປືອກຕາອັກເສບ ຕອນນີ້ຄົນເຈັບຢູ່ໃນການເບິ່ງແຍງຂອງແພດໝໍແລ້ວ.