ປະຊາກອນ ແລະ ການພັດທະນາເສດຖະກິດ-ສັງຄົມ ແມ່ນສອງຄວາມສໍານຶກທີ່ມີສາຍກ່ຽວພັນອັນແໜ້ນແຟ້ນ ບໍ່ສາມາດແຍກອອກຈາກກັນໄດ້

ວັນທີ 29 ມີນາ 2024 ນີ້, ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ຜູ້ຊີ້ນຳວຽກງານວັດທະນະທຳ-ສັງຄົມ ໄດ້ຖະແຫລງການແຫ່ງຊາດ ກ່ຽວກັບການວາງແຜນຄອບຄົວວິໄສທັດປີ 2030 ປະຈຳປີ 2024 ວ່າ: ປະຊາກອນ ແລະ ການພັດທະນາເສດຖະກິດ-ສັງຄົມ ແມ່ນສອງຄວາມສໍານຶກທີ່ມີສາຍກ່ຽວພັນອັນແໜ້ນແຟ້ນນໍາກັນ ບໍ່ສາມາດແຍກອອກຈາກກັນໄດ້. ການພັດທະນາເສດຖະກິດ-ສັງຄົມ ແມ່ນການພັດທະນາເພື່ອຄົນ ແລະ ໂດຍຄົນ. ເພື່ອຄົນກໍໝາຍເຖິງ ເຮັດໃຫ້ຄົນຢູ່ດີ, ກິນດີ, ມີຄວາມຜາສຸກ, ມີອະນາຄົດສົດໃສ. ໂດຍຄົນແມ່ນຄົນທີ່ມີສຸຂະພາບສົມບູນແຂງແຮງດີ, ແນວຄິດຈິດ ໃຈທີ່ສົດໃສກ້າວໜ້າ ແລະ ສະຕິປັນຍາມັນສະໝອງທີ່ແຫລມຄົມເບິ່ງກວ້າງມອງໄກ.

ລັດຖະບານ ສປປ ລາວ ໄດ້ຖືວຽກງານວາງແຜນຄອບຄົວເປັນວຽກບຸລິມະສິດ ແລະ ຕັ້ງເປົ້າໝາຍເຮັດໃຫ້ທຸກຄອບຄົບມີຄວາມອົບອຸ່ນ, ມີຄວາມສຸກ, ມີຄວາມກ້າວໜ້າ, ມີຄວາມສີວິໄລ ເພື່ອຊຸກຍູ້ການພັດທະນາແບບຍືນຍົງ; ສ້າງເງື່ອນໄຂອໍານວຍຄວາມສະດວກ ເພື່ອໃຫ້ແຕ່ລະຄອບຄົວໄດ້ຍົກສູງລະດັບຊີວິດການເປັນຢູ່, ສຸຂະພາບຈິດໃຈ, ສາມາດເຂົ້າເຖິງຄຸນຄ່າດີງາມທາງດ້ານວັດທະ ນະທໍາ, ຄວາມສີວິໄລຂອງມວນມະນຸດ ແລະ ບັນດາໝາກຜົນຂອງເຕັກໂນໂລຊີ; ເສີມຂະຫຍາຍບົດບາດຂອງຄອບຄົວ ເພື່ອສ້າງສະພາບແວດລ້ອມໃຫ້ປະຊາຊົນໄດ້ຮັບການສຶກສາຢ່າງທົ່ວເຖິງ, ໄດ້ຮັບຂໍ້ມູນຂ່າວສານກ່ຽວກັບການວາງແຜນຄອບຄົວປະກອບສ່ວນເຂົ້າໃນການກໍ່ສ້າງຄົນໃຫ້ມີຄຸນສົມບັດສິນທໍາປະຕິວັດທີ່ກ້າວໜ້າ, ມີແບບແຜນການດໍາລົງຊີວິດທີ່ປອດໃສ ແລະ ກ້າວໜ້າ ກາຍເປັນກໍາລັງແຮງສໍາຄັນໃນການປົກປັກຮັກສາ ແລະ ສ້າງສາພັດທະນາປະເທດຊາດ.