UNHCR ຢູ່ໃນສະພາບກຽມພ້ອມ ກໍລະນີຜູ້ອົບພະຍົບໂຣຮິງຢາ
ສຳນັກງານຂ້າຫລວງໃຫຍ່ຜູ້ລີ້ໄພແຫ່ງສະຫະປະຊາຊາດ ຫລື UNHCR ເປີດເຜີຍໃນວັນທີ 10 ຕຸລາວ່າ: ເຈົ້າໜ້າທີ່ປ້ອງກັນຊາຍແດນຂອງບັງກະລາເທດລາຍງານວ່າ: ໃນວັນທີ 9 ຕຸລາ, ຜູ້ອົບພະຍົບມຸດສະລິມໂຣຮິງຢາຫລາຍກວ່າ 11.000 ຄົນ ຂ້າມຊາຍແດນຈາກມຽນມາມາບັງກະລາເທດ ເຊິ່ງເປັນການເພີ່ມຈຳນວນຂຶ້ນຢ່າງວ່ອງໄວ.
ໂຄສົກຂອງ UNHCR ກ່າວຢູ່ນະຄອນເຈນີວາ ຂອງສະວິດວ່າ: ຊາວໂຣຮິງຢາຫລາຍກວ່າ 5 ແສນຄົນ ອົບພະຍົບຈາກມຽນມາໄປບັງກະລາເທດນັບແຕ່ວັນທີ 25 ສິງຫາຜ່ານມາ, ພາຍຫລັງເກີດເຫດຮຸນແຮງຢູ່ລັດຍະໄຂ່ຂອງມຽນມາ, ແຕ່ຈຳນວນຜູ້ອົບພະຍົບຫລຸດລົງເຫລືອປະມານວັນລະ 2.000 ຄົນໃນອາທິດຜ່ານມາ, ແຕ່ໃນວັນທີ 9 ຕຸລານີ້ ສະຖານະການຜູ້ອົບພະຍົບເຮັດໃຫ້ UNHCR ຕ້ອງຢູ່ໃນສະພາບກຽມພ້ອມຂັ້ນສູງອີກ ເນື່ອງຈາກຜູ້ອົບພະຍົບມີຈຳນວນເພີ່ມຂຶ້ນເປັນວັນລະ 11.000 ຄົນ ແລະ ຄາດວ່າອາດຈະມີຜູ້ອົບພະຍົບຈຳນວນຫລາຍຂ້າມຊາຍແດນມາບັງກະລາເທດອີກ. ໂຄສົກຂອງ UNHCR ກ່າວວ່າ: ປັດຈຸບັນນີ້ຍັງບໍ່ຮູ້ສາເຫດທີ່ເຮັດໃຫ້ຜູ້ອົບພະຍົບມີຈຳນວນເພີ່ມຂຶ້ນອີກ, ແຕ່ມີລາຍງານວ່າ: ມີການພົບເຫັນໄຟໄໝ້ເກີດຂຶ້ນບໍລິເວນໃກ້ຊາຍແດນ ແລະ ບັນຫາອື່ນໆອີກ. ຂະນະດຽວກັນ ອົງການອະນາໄມໂລກ ເປີດເຜີຍວ່າ: ໄດ້ດຳເນີນການໃຫ້ວັກແຊງເພື່ອປ້ອງກັນພະຍາດອະຫິວາແກ່ຜູ້ອົບພະຍົບຊາວໂຣຮິງຢາທີ່ຫາກໍເດີນທາງເຂົ້າບັງກະລາເທດ ແລະ ປະຊາຊົນໃນທ້ອງຖິ່ນເພື່ອປ້ອງກັນບໍ່ໃຫ້ເກີດພະຍາດລະບາດ.
