ມາເລເຊຍອອກມາດຕະການສຸກເສີນ ຮັບມືຄື້ນຄວາມຮ້ອນເຖິງກາງເດືອນເມສາ

     ທາງການມາເລເຊຍປະກາດມາດຕະການສຸກເສີນ ເພື່ອຮັບມືຄື້ນຄວາມຮ້ອນທີ່ຮ້າຍແຮງກວ່າເກົ່າ ຫລັງອຸນຫະພູມສູງເກືອບ 40 ອົງສາ ເຮັດໃຫ້ມີຜູ້ເສຍຊີວິດ ແລະ ທໍາລາຍຜົນຜະລິດທາງກະສິກໍາຈໍານວນຫລາຍ.

      ວັນທີ 27 ມີນາ, ສໍານັກຂ່າວຕ່າງປະເທດລາຍງານວ່າ: ຂໍ້ມູນຈາກກົມອຸຕຸນິຍົມວິທະຍາມາເລເຊຍ ເປີດເຜີຍວ່າ: ພື້ນທີ່ເກືອບເຄິ່ງໜຶ່ງຂອງຄາບສະໝຸດມາເລເຊຍຜະເຊີນອຸນຫະພູມສູງສຸດຢ່າງໜ້ອຍ 35 ອົງສາ ເປັນເວລາ 3 ວັນຕິດຕໍ່ກັນ ເຊິ່ງຜູ້ຊ່ຽວຊານຫລາຍຄົນຄາດວ່າ: ອາກາດຮ້ອນ ແລະ ສະພາບແຫ້ງແລ້ງຈະຄົງຢູ່ຈົນຮອດກາງເດືອນເມສານີ້.

       ຄື້ນຄວາມຮ້ອນຮຸນແຮງເຮັດໃຫ້ຊາວມາເລເຊຍຄົນໜຶ່ງ ອາຍຸ 22 ປີ ເສຍຊີວິດຈາກພະຍາດລົມແດດ ຕະຫລອດຈົນເພີ່ມຄວາມສ່ຽງຂອງການຂາດເຂີນນໍ້າ ແລະ ເຮັດໃຫ້ເກີດການສູນເສຍຜົນຜະລິດທາງກະສິກໍາຢ່າງຮ້າຍແຮງ.