ວັນສ້າງໜັງສືພິມ ລາວພັດທະນາ ຄົບຮອບ 18 ປີ (19 ມີນາ 2006-19 ມີນາ 2024)

ໂດຍ: ລູກເມືອງພວນ

  ວັນທີ 19 ມີນາ ເປັນວັນສ້າງຕັ້ງໜັງສືພິມ ລາວພັດທະນາຄົບຮອບ 18 ປີ. ພາຍໃຕ້ການຊີ້ນຳນຳພາ ແລະ ສ້າງຕັ້ງຂຶ້ນໂດຍສະມາຄົມນັກຂ່າວແຫ່ງ ສປປ ລາວ ຊຶ່ງປີນີ້ແມ້ນຄົບຮອບ 18ປີ, ຕະລອດໄລຍະ 18 ປີທີ່ຜ່ານມາ, ໜັງສືພິມລາວພັດທະນາໄດ້ສູ້ຊົນຜ່ານຜ່າຄວາມຫຍຸ້ງຍາກຂາດເຂີນນາໆປະການ ລວມທັງດ້ານພະນັກງານວິຊາການ, ອຸປະກອນ, ເຄື່ອງມືຮັບໃຊ້, ຄວາມຫຍຸ້ງຍາກທາງດ້ານການເງິນ…ແລະອື່ນໆ ແຕ່ ກໍບໍ່ໄດ້ຢຸດຢົ້ງໃນການພັດທະນາຕົນເອງໃຫ້ກ້າວຂຶ້ນມາຕະຫຼອດ ຈາກໜັງສືພິມເຈ້ຍມາເປັນໜັງສືພິມອອນລາຍ.

     ໜັງສືພິມລາວພັດທະນາເປັນອີກໜຶ່ງໜັງສືພິມ ທີ່ເຂົ້າເຖິງຮາກຖານປະຊາຊົນ ແລະ ສັງຄົມດ້ວຍການນຳສະເໜີຂ່າວຮອບດ້ານເຊັ່ນ: ບັນຫາເສດຖະກິດ, ວັດທະນະທຳສັງຄົມ, ປ້ອງກັນຊາດ ປ້ອງກັນຄວາມສະຫງົບ, ກີລາ, ການທ່ອງທ່ຽວ, ວຽກງານວິທະຍາສາດ, ເຕັກໂນໂລຊີ ແລະ ວຽກງານການຕ່າງປະເທດ. ເຮັດໃຫ້ສັງຄົມມີຄວາມຮູ້, ຄວາມເຂົ້າໃຈທາງດ້ານການເມືອງ, ການປົກຄອງ, ມະຕິຄຳສັ່ງ, ຂໍ້ກຳນົດກົດໝາຍຂອງພັກ ແລະ ລັດບານຫຼາຍຂຶ້ນ ນອກນັ້ນຍັງກາຍເປັນເວທີ ໃຫ້ສັງຄົມໄດ້ສະແດງຄວາມຄິດເຫັນຢ່າງກວ້າງຂວາງ,

   ເຖິງຢ່າງໃດກໍດີ, ຍັງມີຫຼາຍສິ່ງຢ່າງທີ່ຈະຕ້ອງໄດ້ປັບປຸງພັດທະນາຕົນເອງໃຫ້ກ້າວຂຶ້ນຢ່າງບໍ່ຢຸດຢັ້ງໃນທຸກດ້ານ. ໂດຍສະເພາະແມ່ນການສ້າງນັກຂຽນທີ່ເປັນມືອາຊີບ, ເຄື່ອງມື ອຸປະກອນທີ່ທັນສະໄໝ, ຈັນຍາບັນ, ຈັນຍາທຳ, ຄຸນສົມບັດຂອງນັກຂ່າວ, ການເຂົ້າເຖິງປະຊາຊົນ ສັງຄົມໃຫ້ເລິກເຊິ່ງ ກ້ວາງຂວາງກ່ວາເກົ່າ, ຄວາມວ່ອງໄວ ແລະ ຄວາມທັນສະໄໝໃຫ້ສົມກັບຊື່  “ລາວພັດທະນາ”  ຢ່າງແທ້ຈິງ.