ກໍລະກົດນີ້ຈະຮູ້ຜົນໂຄງການປະກວດແຕ້ມຮູບລົດໂຕໂຍຕາໃນຝັນທີ່ປະເທດຍີ່ປຸ່ນ
ວັນທີ 1 ເມສານີ້, ບໍລິສັດ ໂຕໂຍຕາ ມໍເຕີ້ ປະເທດໄທ ຈຳກັດ, ໄດ້ຈັດພິທີມອບລາງວັນລະດັບປະເທດຈາກໂຄງການປະກວດແຕ້ມຮູບໃນຫົວຂໍ້ ລົດໂຕໂຍຕາ ໃນຝັນຂອງຂ້ອຍ ຄັ້ງທີ 7 ປະຈຳປີ 2017, ຂຶ້ນທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ຄຳຜ່ານ ສີສະຫວັນ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ປະກອນ ວົງວິທະຍາພິຣົມ ປະທານຝ່າຍປະຕິບັດການສາຍງານຢ່ອຍ ເຂດພູມມິພາກແມ່ນ້ຳຂອງ ບໍລິສັດ ໂຕໂຍຕາ ມໍເຕີ້ ປະເທດໄທ ຈຳກັດ ແລະ ພາກສ່ວນກ່ຽວຂ້ອງຕ່າງໆເຂົ້າຮ່ວມນຳດ້ວຍ.
ທ່ານປະທານຝ່າຍປະຕິບັດການສາຍງານຢ່ອຍ ກ່າວວ່າ: ໂຄງການດັ່ງກ່າວ ແມ່ນຈັດຂຶ້ນເປັນຄັ້ງທີ 11 ໃນທົ່ວໂລກ ແລະ ເປັນຄັ້ງທີ 7 ໃນລາວ, ເພື່ອສົ່ງເສີມການສຶກສາຂອງເຍົາວະຊົນລາວ, ຊຶ່ງເປັນນະໂຍບາຍຂອງໂຕໂຍຕາ ເພື່ອແນໃສ່ສະໜັບສະໜູນ ແລະ ຊ່ວຍເຫລືອສັງຄົມລາວຕະຫລອດ, ມາຊຶ່ງໃນປີນີ້ຖືໄດ້ວ່າມີຜົນຕອບຮັບຢ່າງຍິ່ງໃຫຍ່, ໂດຍມີເຍົາວະຊົນຫລາຍກວ່າ 4 ພັນຄົນຈາກທົ່ວປະເທດເຂົ້າຮ່ວມ, ໃນນັ້ນ ໄດ້ແບ່ງອອກເປັນ 3 ປະເພດອາຍຸຄື: ລຸ້ນອາຍຸຕ່ຳກວ່າ 8 ປີ, ລຸ້ນອາຍຸ 8-11 ປີ ແລະ ລຸ້ນອາຍຸ 12-15 ປີ, ໂດຍແຕ່ລະລຸ້ນໄດ້ມີຜູ້ຜ່ານເຂົ້າຮອບ 5 ຄົນ, ໃນນັ້ນ ລາງວັນທີ 1 ໄດ້ຮັບເງິນຈຳນວນ 5 ລ້ານກີບ, ລາງວັນທີ 2 ໄດ້ຮັບເງິນ 4 ລ້ານກີບ, ລາງວັນທີ 3 ໄດ້ຮັບເງິນ 3 ລ້ານກີບ ແລະ ລາງວັນຊົມເຊີຍ 2 ລາງວັນ, ລາງວັນລະ 1 ລ້ານກີບ. ຂະນະດຽວກັນ ຜູ້ທີ່ໄດ້ຮັບລາງວັນຄັ້ງນີ້ ຈຳນວນ 15 ຄົນ ຈະໄດ້ເດີນທາງໄປທັດສະນະສຶກສາຢູ່ປະເທດໄທ ຮ່ວມກັບຄອບຄົວ. ພິເສດໃນປີນີ້ ຜົນງານຂອງຜູ້ທີ່ໄດ້ຮັບລາງວັນອັນດັບທີ 1, 2, 3 ແຕ່ລະປະເພດອາຍຸນັ້ນ ຈະໄດ້ສົ່ງໄປຮ່ວມປະກວດໃນເວທີລະດັບໂລກທີ່ປະເທດຍີ່ປຸ່ນ, ຊຶ່ງຈະມີການປະກາດຜົນລາງວັນໃນເດືອນກໍລະກົດ 2017 ນີ້ ແລະ ຜູ້ໄດ້ຮັບລາງວັນກໍຈະໄດ້ເດີນທາງໄປຮັບເອົາລາງວັນດ້ວຍຕົນເອງຢູ່ປະເທດຍີ່ປຸ່ນອີກດ້ວຍ.
