ຮອງນາຍົກລັດຖະມົນຕີ ມີຄຳເຫັນເນື່ອງໃນໂອກາດວັນສ້າງຕັ້ງຂອບການຮ່ວມມືແມ່ນໍ້າຂອງ-ແມ່ນ້ຳລ້ານຊ້າງ ຄົບຮອບ 8 ປີ
ເນື່ອງໃນໂອກາດວັນສ້າງຕັ້ງຂອບການຮ່ວມມືແມ່ນໍ້າຂອງ-ແມ່ນ້ຳລ້ານຊ້າງ ຄົບຮອບ 8 ປີ (23 ມີນາ 2016 – 23 ມີນາ 2024), ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ສະແດງຄວາມຊົມເຊີຍຢ່າງສຸດໃຈ ມາຍັງບັນດາລັດຖະບານ ແລະ ປະຊາຊົນ ຂອງບັນດາປະເທດສະມາຊິກຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ. ນັບຕັ້ງແຕ່ປີ 2016 ເປັນຕົ້ນມາ, ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໄດ້ກາຍເປັນເວທີສຳຄັນເພື່ອສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກ ຢູ່ ອະນຸພາກພື້ນແມ່ນ້ຳຂອງ ໂດຍຍຶດຖືຫລັກການແຫ່ງ ຄວາມສະເໝີພາບ, ມີຜົນປະໂຫຍດຮ່ວມກັນ ແລະ ສ້າງຄວາມສົມບູນພູນສຸກຮ່ວມກັນ.
ຂະນະທີ່ພວກເຮົາທົບທວນຄືນໝາກຜົນທີ່ໄດ້ຮັບຕະຫລອດ 8 ປີຜ່ານມາ, ບົນເນື້ອໃນຈິດໃຈ “ຮ່ວມແມ່ນ້ຳສາຍດຽວກັນ, ສ້າງອານາຄົດຮ່ວມກັນ”, ອະນຸພາກພື້ນແມ່ນ້ຳຂອງໄດ້ເຫັນຄວາມຄືບໜ້າທີ່ສຳຄັນ ປິ່ນອ້ອມ 3 ເສົາຄໍ້າ (ການເມືອງ-ຄວາມໝັ້ນຄົງ, ການພັດທະນາເສດຖະກິດແບບຍືນຍົງ, ສັງຄົມ-ວັດທະນະທໍາ ແລະ ການແລກປ່ຽນລະຫວ່າງປະຊາຊົນ) ແລະ 5 ຂົງເຂດການຮ່ວມມືບູລິມະສິດ (ການເຊື່ອມຈອດ, ການຄຸ້ມຄອງແຫລ່ງຊັບພະຍາກອນນໍ້າ, ຄວາມອາດສາມາດດ້ານການຜະລິດ, ເສດຖະກິດຂ້າມຊາຍແດນ, ກະສິກໍາ ແລະ ການຫລຸດຜ່ອນຄວາມທຸກຍາກ). ຈຸດສຸມຕົ້ນຕໍ ແມ່ນແນໃສ່ການເພີ່ມທະວີການຮ່ວມມືເພື່ອພັດທະນາເສດຖະກິດ-ສັງຄົມ ແບບຍືນຍົງ, ຮັດແໜ້ນການຮ່ວມມືສູ່ລວງເລິກ ເພື່ອສົ່ງເສີມສັນຕິພາບ, ສະຖຽນລະພາບ, ຄວາມສົມບູນພູນສຸກ, ສ້າງຄວາມໄວ້ເນື້ອເຊື່ອໃຈ ແລະ ຄວາມເຂົ້າໃຈເຊິ່ງກັນ ແລະ ກັນ, ສະໜັບສະໜູນບັນດາຂໍ້ລິເລີ່ມໃນການເພີ່ມທະວີການເຊື່ອມໂຍງ ແລະ ເຊື່ອມຈອດ ພາກພື້ນແມ່ນ້ຳຂອງ-ແມ່ນ້ຳລ້ານຊ້າງ. ໃນນີ້, ໄດ້ເນັ້ນໃສ່ການຂະຫຍາຍການຮ່ວມມືເພື່ອສ້າງແລວເສດຖະກິດແມ່ນໍ້າຂອງ-ແມ່ນ້ຳລ້ານຊ້າງ ແລະ ການຫັນສູ່ທັນສະໄໝ ແລະ ເພີ່ມທະວີການຜະລິດພະລັງງານ, ສິນຄ້າກະສິກຳ ແລະ ອຸດສາຫະກຳ ໃຫ້ໄດ້ທັງປະລິມານ ແລະ ຄຸນນະພາບ ເພື່ອຫັນສູ່ທັນສະໄໝ ລວມທັງການເພີ່ມທະວີການຮ່ວມມືດ້ານສາທາລະນະສຸກ, ການພັດທະນາຊັບພະຍາກອນມະນຸດ, ນະວັດຕະກໍາ ແລະ ເຕັກໂນໂລຊີ ເພື່ອຫລຸດຜ່ອນຄວາມທຸກຍາກ.
ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໄດ້ເປັນປັດໄຈກະຕຸ້ນຜົນປະໂຫຍດຕົວຈິງຢູ່ໃນ ສປປ ລາວ ແລະ ອະນຸພາກພື້ນແມ່ນໍ້າຂອງ. ສປປ ລາວ ໄດ້ເຂົ້າຮ່ວມການເຄື່ອນໄຫວໃນຂະບວນການຕ່າງໆ ຂອງຂອບການຮ່ວມມືດັ່ງກ່າວຢ່າງຫ້າວຫັນ ແລະ ໄດ້ຮັບຜົນປະໂຫຍດທີ່ເປັນຮູບປະທໍາຜ່ານບັນດາໂຄງການ ແລະ ຂໍ້ລິເລີ່ມຕ່າງໆ ເປັນຕົ້ນແມ່ນ ໂຄງການຫລຸດຜ່ອນຄວາມທຸກຍາກ ລາວ-ຈີນ ແລະ ຂໍ້ລິເລີ່ມອື່ນໆ ແນໃສ່ການພັດທະນາພື້ນຖານໂຄງລ່າງ ແລະ ການສ້າງຂີດຄວາມສາມາດ. ຍິ່ງໄປກວ່ານັ້ນ, ບັນດາໂຄງການພາຍໃຕ້ກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ໄດ້ໃຫ້ການສະໜັບສະໜູນດ້ານການຝຶກອົບຮົມ ແລະ ການລິເລີ່ມພັດທະນາໃນຂະແໜງຕ່າງໆ ເຊິ່ງໄດ້ປະກອບສ່ວນເຂົ້າໃນຄວາມກ້າວໜ້າທາງດ້ານເສດຖະກິດ-ສັງຄົມ. ສປປ ລາວ ໄດ້ຮັບອະນຸມັດໂຄງການທັງໝົດ ຈໍານວນ 80 ໂຄງການ ລວມມູນຄ່າ ປະມານ 21 ລ້ານໂດລາສະຫະລັດ. ມາຮອດປະຈຸບັນ, ໄດ້ຈັດຕັ້ງປະຕິບັດສຳເລັດ ຈໍານວນ 30 ໂຄງການ ແລະ 50 ໂຄງການ ແມ່ນຢູ່ໃນຂັ້ນຕອນການຈັດຕັ້ງປະຕິບັດ.
ໃນຂະນະທີ່ພວກເຮົາກ້າວເຂົ້າສູ່ໄລຍະໃໝ່ຂອງການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໃນຕໍ່ໜ້າ, ພວກເຮົາຢືນຢັນຄືນຄວາມໝາຍໝັ້ນ ທີ່ຈະຮ່ວມກັນບັນລຸເປົ້າໝາຍ ແລະ ຈຸດປະສົງຂອງການຮ່ວມມື ກໍຄື ການຈັດຕັ້ງຜັນຂະຫຍາຍຜົນຂອງກອງປະຊຸມຜູ້ນຳແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 4 ທີ່ໄດ້ຈັດຂຶ້ນໃນປີ 2023 ເຊັ່ນ: ຖະແຫລງການ ເນປີດໍ, ແຜນປະຕິບັດງານ 5 ປີ ຂອງຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ (2023-2027) ແລະ ຖະແຫລງການວ່າດ້ວຍຂໍ້ລິເລີ່ມສ້າງແລວນະວັດຕະກໍາ ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ. ບົດບາດຂອງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໃນການສົ່ງເສີມ ສັນຕິພາບ, ສະຖຽນລະພາບ ແລະ ການພັດທະນາແບບຮອບດ້ານ ແມ່ນສອດຄ່ອງກັບ ວິໄສທັດ ຂອງການສ້າງປະຊາຄົມແມ່ນ້ຳຂອງ-ແມ່ນ້ຳລ້ານຊ້າງ ທີ່ຈະເລີນຮຸ່ງເຮືອງ ແລະ ເຊື່ອມຈອດກັນ ກໍຄື ການປະກອບສ່ວນເຂົ້າໃນການສ້າງປະຊາຄົມອາຊຽນ, ຂໍ້ລິເລີ່ມໜຶ່ງແລວ-ໜຶ່ງເສັ້ນທາງ ແລະ ວາລະ 2030 ເພື່ອການພັດທະນາແບບຍືນຍົງ ຂອງ ສະຫະປະຊາຊາດ.
ຂ້າພະເຈົ້າ, ຂໍສະແດງຂອບໃຈ ມາຍັງ ລັດຖະບານ ແຫ່ງ ສາທາລະນະລັດ ປະຊາຊົນ ຈີນ ທີ່ໃຫ້ຄວາມຮ່ວມມື ແລະ ການສະໜັບສະໜູນ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຕະຫລອດມາ ໂດຍສະເພາະ ກໍແມ່ນ ຜ່ານກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ແລະ ບັນດາໂຄງການອະນຸພາກພື້ນຕ່າງໆ ເຊິ່ງໄດ້ນໍາເອົາຜົນປະໂຫຍດຕົວຈິງ ມາສູ່ປະຊາຊົນໃນອະນຸພາກພື້ນແມ່ນ້ຳຂອງ. ການມີສ່ວນຮ່ວມຢ່າງຕັ້ງໜ້າຂອງ ສປປ ລາວ ໃນຂອບການຮ່ວມມືດັ່ງກ່າວ ໄດ້ເນັ້ນໜັກຄວາມໝາຍໝັ້ນຂອງພວກເຮົາ ໃນການສືບຕໍ່ຮ່ວມມືເຊິ່ງກັນ ແລະ ກັນ ແລະ ມີຜົນປະໂຫຍດຮ່ວມກັນ ລະຫວ່າງບັນດາປະເທດສະມາຊິກທັງໝົດ.
ໃນໂອກາດສະເຫລີມສະຫລອງວັນສ້າງຕັ້ງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄົບຮອບ 8 ປີ, ພວກເຮົາຢໍ້າຄືນຄວາມໝາຍໝັ້ນໃນການສືບຕໍ່ຍົກລະດັບຂອບການຮ່ວມມືດັ່ງກ່າວໄປສູ່ລະດັບໃໝ່ ກໍເພື່ອຮັບປະກັນ ສັນຕິພາບ, ສະຖຽນລະພາບ ແລະ ຄວາມສົມບູນພູນສຸກ ໃນອະນຸພາກພື້ນແມ່ນ້ຳຂອງ ແລະ ທົ່ວໂລກ.
