ເມືອງປາກລາຍ ກວດພົບໄວໜຸ່ມ ອາຍຸຕ່ຳກວ່າ 18 ປີ ເຂົ້າຮ້ານກິນດື່ມ-ບັນເທີງ 36 ຄົນ
ທ່ານ ສົມພອນ ລາດມົນຕີ ຫົວໜ້າ ຫ້ອງການ ຖວທ ເມືອງປາກລາຍ ລາຍງານຕໍ່ກອງ ກອງປະຊຸມປຶກສາຫາລື ແລະ ແກ້ໄຂບັນຫາປະກົດການຫຍໍ້ທໍ້ໃນສັງຄົມ ວັນທີ່ 14 ມີນາ 2024 ນີ້ວ່າ: ເດືອນກຸມພາຜ່ານມາ ໄດ້ຕິດຕາມກວດກາ ຢູ່ຕາມຮ້ານອາຫານ, ຮ້ານກິນດື່ມ, ບັນເທີງ, ເຮືອນພັກ ໃນເທສະບານເມືອງປາກລາຍ ໄດ້ພົບເຫັນບັນຫາປາກົດການຫຍໍ້ທໍ້ຫລາຍບັນຫາ, ເປັນຕົ້ນກວດກາພົບເຫັນໄວໜຸ່ມ ອາຍຸຕໍ່າກວ່າ 18 ປີເຂົ້າໃຊ້ບໍລິການ ຮ້ານກິນດື່ມ-ບັນເທີງ ທັງໝົດ 36 ຄົນ, ຍິງ 30 ຄົນ, ດັດແປງສະພາບເຕັກນິກໃສ່ທໍ່ສຽງດັງ, ດັດແປງໝໍ້ກອງ15 ຄັນ, ກວດພົບສິ່ງເສບຕິດຢາສູບໄຟຟ້າ 4 ຄົນ, ຍິງ 2 ຄົນ, ຄົນຕ່າງປະເທດ 1 ຄົນ, ພົບເຫັນຮ້ານອາຫານ ກິນດື່ມ ເປີດກາຍໂມງກາຍເວລາ ທີ່ໄດ້ກຳນົດ 24 ໂມງ ມີບາງຮ້ານເປີດຮອດຂ້ອນແຈ້ງ, ເປີດສຽງດັງແຮງ ສົ່ງຜົນກະທົບ ລົບກວນປະຊາຊົນ ທີ່ອາໄສຢູ່ບໍລິເວນໃກ້ຄຽງ ແລະ ຍັງອານຸຍາດ ປ່ອຍໃຫ້ເດັກນ້ອຍອາຍຸ ຕໍ່າກວ່າ 18 ປີເຂົ້າໃຊ້ບໍລິການ.
ເຈົ້າໜ້າທີ່ ແລະ ຄະນະກຳມະການຮັບຜິດຊອບຂັ້ນເມືອງໄດ້ເຊີນເອົາຜູ້ລະເມີດ ແລະ ພໍ່-ແມ່ຜູ້ປົກຄອງການຈັດຕັ້ງບ້ານ ແລະ ຄູອາຈານເຂົ້າຮ່ວມ ເຮັດບົດບັນທຶກສຶກສາອົບຮົມກ່າວເຕືອນ, ສ່ວນບຸກຄົນທີ່ມົ່ວສຸມຢາສູບໄຟຟ້າ ແລະ ມີອາຍຸ 18 ປີຂຶ້ນໄປແມ່ນມອບໃຫ້ເຈົ້າໜ້າທີ່ດຳເນີນການຕິດຕາມສືບສວນ-ສອບສວນ ຂະຫຍາຍຜົນ ຊອກຫາບຸກຄົນທີ່ພົວພັນ ແລະ ເອົາມາປະຕິບັດຕາມກົດໝາຍ.
ສຳລັບຜູ້ປະກອບການ ຮ້ານກິນດີ່ມບັນເທິງ ທີ່ຝ່າຝືນຕໍ່ລະບຽບການ ຫລື ປະຕິບັດຕາມບົດບັນທຶກ ຂອງຄະນະຮັບຜິດຊອບ ຄຸ້ມຄອງທຸລະກິດ ການທ່ອງທ່ຽວ ຄັ້ງທີ່ 1 ສະບັບລົງວັນທີ່ 20 ເມສາ 2023 ແມ່ນຈະໄດ້ປັບໃໝເປັນຄັ້ງທີ່ສອງເປັນເງິນຈຳນວນ 2.000.000 ກີບ.
