ວຽກງານຕິດຕາມ-ກວດກາ ແລະ ຕ້ານການສໍ້ລາດບັງຫລວງ ຕ້ອງໄດ້ຫັນປ່ຽນທຸກຂອດຂັ້ນໃຫ້ເລິກເຊິ່ງແຂງແຮງ

ໃນເວລາໂອ້ລົມຢູ່ກອງປະຊຸມສະຫລຸບວຽກງານກວດກາທົ່ວປະເທດ ປະຈໍາປີ 2023 ທີ່ຈັດຂຶ້ນໃນວັນທີ 6-7 ມີນາ 2024, ທ່ານ ຄຳພັນ ພົມມະທັດ ປະທານຄະນະກວດ ກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ, ໄດ້ເນັ້ນໃຫ້ກອງປະຊຸມ ລົງເລິກປຶກສາຫາລື ແລະ ແກ້ໄຂບັນຫາຕົວຈິງ, ຕ້ອງຮັບປະກັນບາງລັກສະນະສະເພາະ ແລະ ເປົ້າໝາຍຕົ້ນຕໍຄື: ສະຫລຸບວຽກງານກວດກາ ປະຈໍາປີ 2023 ຕິດພັນກັບການປະເມີນຄືນການ ເຄື່ອນໄຫວ ນັບແຕ່ກອງປະຊຸມວຽກງານກວດກາທົ່ວປະເທດ ຄັ້ງທີ IV; ສໍາມະນາລະດັບຄໍາເຫັນປິ່ນອ້ອມບາງບັນຫາຮີບດ່ວນ; ຝຶກອົບຮົມ-ຍົກລະດັບຄວາມຮູ້ຮ່ວມກັນກ່ຽວກັບເນື້ອໃນດ້ານຕ່າງໆຂອງວຽກງານກວດກາໃນໄລຍະໃໝ່ ແລະ ເຜີຍແຜ່ແນະນໍາປະຕິບັດບາງນິຕິກໍາ ແລະ ເອກະສານຕົ້ນຕໍຈໍານວນໜຶ່ງ; ຕີລາຄາຈຸດອ່ອນ-ຂໍ້ຄົງຄ້າງ, ຖອດຖອນບົດຮຽນ ທີ່ຈະໄດ້ປັງປຸງແກ້ໄຂໃນຕໍ່ໜ້າ, ພ້ອມຄົ້ນຄວ້າຊອກຫາໃຫ້ເຫັນສາເຫດ ແລະ ບົດຮຽນຕົວຈິງ.

ນອກນັ້ນ ທ່ານຍັງໄດ້ເນັ້ນໃຫ້ຜູ້ແທນກອງປະຊຸມຈະເຊີດຊູຄວາມຮັບຜິດຊອບທາງການເມືອງຂອງຕົນ, ເສີມຂະຫຍາຍປະຊາທິປະໄຕຢ່າງເຕັມສ່ວນ, ສຸມສະຕິປັນຍາເຂົ້າໃສ່ໃນການຄົ້ນຄວ້າ ແລະ ເປັນເຈົ້າການປະກອບຄໍາຄິດ-ຄໍາເຫັນໃຫ້ເລິກເຊິ່ງ, ກົງໄປກົງມາ ເຮັດໃຫ້ເນື້ອໃນຂອງກອງປະຊຸມມີຄວາມຈະ ແຈ້ງ, ຮັດກຸມ, ຄົບຖ້ວນ ແລະ ມີຄວາມເປັນເອກະພາບສູງຕໍ່ບັນຫາຕ່າງໆ ບົນພື້ນຖານແນວທາງ,ນະໂຍບາຍ, ກົດລະບຽບຂອງພັກ, ກົດໝາຍ ແລະ ລະບຽບການທີ່ກ່ຽວຂ້ອງຂອງລັດ, ຫລີກເວັ້ນການປະກອບຄໍາເຫັນທີ່ມີລັກສະນະລວມໆ ທີ່ບໍ່ມີວິທີການແກ້ໄຂ; ສືບຕໍ່ປັບປຸງແກ້ໄຂບັນຫາຕ່າງໆໃນຕໍ່ໜ້າ, ຫັນປ່ຽນຢ່າງແຂງແຮງ ແລະ ເລິກເຊິ່ງທຸກຂອດຂອງວຽກງານຕິດຕາມ-ກວດກາ ແລະ ຕ້ານການສໍ້ລາດບັງຫລວງ.