ຟີລິບປິນສັ່ງພັກວຽກເຈົ້າໜ້າທີ່ 130 ກວ່າຄົນ ກ່ຽວພັນລັກລອບຂາຍເຂົ້າໃນຄັງສໍາຮອງ
ເຈົ້າໜ້າທີ່ສໍານັກງານອາຫານແຫ່ງຊາດຟີລິບປິນ ຫລາຍກວ່າ 130 ຄົນ ຖືກສອບສວນ ກໍລະນີກ່ຽວຂ້ອງກັບການລັກລອບຂາຍເຂົ້າໃນຄັງສໍາຮອງຂອງປະເທດ.
ວັນທີ 6 ມີນາ, ສໍານັກຂ່າວຕ່າງປະເທດລາຍງານວ່າ: ສໍານັກງານຜູ້ກວດສອບແຫ່ງຊາດຂອງຟີລິບປິນອອກຖະແຫລງການ ກ່ຽວກັບຄໍາສັ່ງພັກວຽກຜູ້ອໍານວຍການສໍານັກງານອາຫານແຫ່ງຊາດ (NFA) ແລະ ເຈົ້າໜ້າທີ່ NFA ອີກ 138 ຄົນ ຂໍ້ຫາກ່ຽວຂ້ອງກັບການຂາຍເຂົ້າໃນຄັງສໍາຮອງ ດ້ວຍຂະບວນການບໍ່ເໝາະສົມ.
ທັງນີ້, ຂໍ້ມູນຈາກເຈົ້າໜ້າທີ່ຄົນໜຶ່ງໃນ NFA ລະບຸວ່າ: ມີການຂາຍເຂົ້າອອກຈາກຄັງສໍາຮອງບາງສ່ວນ ໂດຍບໍ່ມີການປະມູນຢ່າງຖືກຕ້ອງ. ຂະນະທີ່ທ່ານ ຟຣານຊິສໂກ ທິວ ຣໍເຣລ ລັດຖະມົນຕີກະຊວງພາຍໃນຟີລິບປິນ ກ່າວວ່າ: ຜູ້ອໍານວຍການ NFA ແລະ ເຈົ້າໜ້າທີ່ ເຊິ່ງຖືກກວດສອບທຸກຄົນຄວນພັກວຽກໂດຍສະໝັກໃຈລະຫວ່າງໄລຍະເວລາທີ່ຢູ່ລະຫວ່າງການສອບສວນ.
ສະຖານະການດັ່ງກ່າວເກີດຂຶ້ນທ່າມກາງສະພາບເງິນເຟີ້ອາຫານເຊິ່ງຍັງເພີ່ມສູງ ໂດຍສະເພາະເຂົ້າທີ່ເປັນອາຫານຫລັກ, ເຖິງວ່າລັດຖະບານຟີລິບປິນຢືນຢັນວ່າ: ອຸປະທານເຂົ້າຍັງພຽງພໍ. ເຖິງຢ່າງໃດກໍຕາມ, ອັດຕາເງິນເຟີ້ເຂົ້າຂອງຟີລິບປິນເພີ່ມຈາກ 19,6% ໃນເດືອນທັນວາ 2023 ເປັນ 22,6% ໃນເດືອນມັງກອນຜ່ານມາ ເປັນສະຖິຕິສູງສຸດໃນຮອບເກືອບ 15 ປີ ຫລື ນັບແຕ່ເດືອນມີນາ 2009.
