ປີ 2023 ສປປ ລາວມີມູນຄ່າການນໍາເຂົ້າ 7.189 ລ້ານໂດລາສະຫະລັດ ແລະ ສົ່ງອອກສິນຄ້າ 8.370 ລ້ານໂດລາສະຫະລັດ

ສູນຂໍ້ມູນຂ່າວສານທາງດ້ານການຄ້າ ລາຍງານວ່າ: ປີ 2023 ຜ່ານມາ ສປປ ລາວ ມີມູນຄ່າການນໍາເຂົ້າ ແລະ ສົ່ງອອກ ສິນຄ້າ ປະມານ 15 ຕື້ 558 ລ້ານໂດລາ ລື່ນປີ 2022 ຫລາຍກວ່າ 3%.

ໃນນັ້ນ ສິນຄ້າສົ່ງອອກຕົ້ນຕໍ 10 ອັນດັບ ມູນຄ່າທັງໝົດ ປະມານ 8 ຕື້ 370 ລ້ານໂດລາ ລວມມີ: ໄຟຟ້າ, ຄຳປະສົມ-ຄຳແທ່ງ, ເຈ້ຍ ແລະ ເຄື່ອງທີ່ເຮັດດ້ວຍເຈ້ຍ, ແຮ່ທອງ, ແຮ່ເຫລັກ, ເກືອກາລີ, ມັນຕົ້ນ, ຢາງພາລາ, ເຍື່ອໄມ້, ເສດເຈ້ຍ ແລະ ນ້ຳຕານ ຕາມລຳດັບ.

ສ່ວນສິນຄ້ານໍາເຂົ້າຕົ້ນຕໍ 10 ອັນດັບ ມີມູນຄ່າ ປະມານ 7 ຕື້ 189 ລ້ານໂດລາ ລວມມີ: ນ້ຳມັນກາຊວນ, ອຸປະກອນກົນຈັກ (ນອກຈາກເຄື່ອງກົນຈັກພາຫະນະ), ພາຫະນະທາງບົກ (ນອກຈາກລົດຈັກ, ລົດໄຖ), ເຫລັກ ແລະ ເຄື່ອງທີ່ເຮັດດ້ວຍເຫລັກ, ເຫລັກກ້າ, ນໍ້າມັນແອັດຊັງ, ແອັດຊັງພິເສດ, ຊິ້ນສ່ວນອາໄຫລ່ລົດ (ລວມທັງຢາງ, ແວ່ນ, ໂສ້...), ເຄື່ອງໄຟຟ້າ ແລະ ອຸປະກອນໄຟຟ້າ, ເຄື່ອງໃຊ້ທີ່ເຮັດດ້ວຍພລາສະຕິກ, ເຍື່ອໄມ້ ແລະ ເສດເຈ້ຍ ແລະ ເຄື່ອງດື່ມ (ນໍ້າ, ນໍ້າອັດລົມ, ຊູກໍາລັງ...) ຕາມລຳດັບ. 

ໄທ ຍັງເປັນປະເທດທີ່ ສປປ ລາວ ສົ່ງອອກສິນຄ້າເປັນອັນອຳທຳອິດ ຮອງລົງມາແມ່ນ, ຈີນ, ຫວຽດນາມ, ອົດສະຕາລີ ແລະ ກໍາປູເຈຍ ສ່ວນການນຳເຂົ້າຕົ້ນຕໍແມ່ນມາຈາກໄທ, ຈີນ, ຫວຽດນາມ, ສະຫະລັດອາເມລິກາ ແລະ ຍີ່ປຸ່ນ.