ປີ 2023 ດ່ານ ຕມ ສາກົນບໍ່ເຕນ ມີຄົນເຂົ້າ-ອອກເມືອງ ຫລາຍກວ່າ 1 ລ້ານ 2 ແສນຄົນ
ພັທ ດາວເພັດ ຄຳທອງ ຫົວໜ້າດ່ານຕຳຫລວດກວດກາຄົນເຂົ້າ-ອອກເມືອງ ສາກົນບໍ່ເຕນ ແຂວງຫລວງນ້ຳທາ ລາຍງານໃນວັນທີ 29 ກຸມພາ 2024 ວ່າ: ປີ 2023 ມີຄົນເຂົ້າ-ອອກເມືອງຜ່ານມາ ດ່ານ ຕມ ສາກົນບໍ່ເຕນ ທັງໝົດ 1.277.000 ກວ່າຄົນ ໃນນັ້ນມີຄົນເຂົ້າເມືອງ 654.000 ກວ່າຄົນ, ຄົນອອກເມືອງທັງໝົດ 623.800 ກວ່າຄົນ; ເປັນຄົນລາວ 206.000 ກວ່າຄົນ, ຄົນຈີນ 434.500 ກວ່າຄົນ, ຄົນປະເທດທີ່ສາມ 13.000 ກວ່າຄົນ.
ສ່ວນພາຫະນະເຂົ້າ – ອອກເມືອງທັງໝົດ 278.000 ກວ່າຄັນ, ລົດລາວ 37.503 ຄັນ, ລົດປະເທດທີສາມ 592 ຄັນ; ພາຫະນະ ເມືອງທັງໝົດ 134.189 ຄັນ, ລົດລາວ 76.350 ຄັນ, ລົດຈີນ 94.800 ຄັນ, ລົດປະເທດທີສາມ 1.000 ກວ່າຄັນ.
ສໍາລັບໂດຍສານທີ່ ເຂົ້າ-ອອກ ດ່ານສ່ວນຫລາຍແມ່ນຖືກຕ້ອງຕາມລະບຽບກົດໝາຍວ່າດ້ວຍການ ເຂົ້າ-ອອກ ແລະ ຄຸ້ມຄອງຄົນຕ່າງປະເທດຢູ່ ສປປ ລາວ, ແຕ່ກໍ່ມີຈຳນວນໜຶ່ງທີ່ລະເມີດລະບຽບກວດຄົນ ເຂົ້າ-ອອກ ເມືອງເຊັ່ນ: ເຂົ້າເມືອງບໍ່ໄດ້ເອົາວີຊ່າ, ບໍ່ໄດ້ຈໍ້າແຈ້ງເຂົ້າເມືອງ ແລະ ເຂົ້າເມືອງໂດຍບໍ່ຜ່ານດ່ານກວດກາ, ໃນກໍລະນີກວດພົບເຫັນຜູ້ລະເມີດລະບຽບກວດຄົນ ເຂົ້າ-ອອກເມືອງໄດ້ມີວິທີແກ້ໄຂໂດຍແນະນຳໃຫ້ເຂົາເຈົ້າໄປເອົາວິຊ່າ-ຈ້ຳແຈ້ງເຂົ້າຄືນ ແລະ ຈະບໍ່ໄດ້ປັບໃໝ່ ແຕ່ຈະສຶກສາອົບຮົມ, ກ່າວເຕືອນ, ສ່ວນຜູ້ທີ່ເຂົ້າເມືອງບໍ່ຜ່ານດ່ານກວດກາແມ່ນສົ່ງໃຫ້ພະແນກ ຕ.ມ ເປັນຜູ້ແກ້ໄຂຕາມລະບຽບຫລັກການ.
ທັງນີ້ເພື່ອເຮັດໃຫ້ການເດີນທາງ ເຂົ້າ-ອອກ ສປປ ລາວ ມີຄວາມສະດວກຄ່ອງຕົວ ແລະ ໃຫ້ການຮ່ວມມືຕໍ່ເຈົ້າໜ້າທີ່ ຍົກສູງສະຕິການເປັນເຈົ້າການ ແລະ ປະຕິບັດຕາມລະບຽບການແຈ້ງ ເຂົ້າ-ອອກ ສປປ ລາວ ຢ່າງເຂັ້ມງວດ.
