ສະຖານະການຢູ່ເຂດພາກຕາ ເວັນອອກອູແກຣນດີຂຶ້ນ

ວັນທີ 4 ຕຸລານີ້, ໜ່ວຍງານພົວພັນ 3 ຝ່າຍ ຄືອູແກຣນ, ອົງການຄວາມໝັ້ນຄົງ ແລະ ການຮ່ວມມືເອີຣົບ ແລະ ຣັດເຊຍກ່ຽວກັບບັນຫາອູແກຣນໄດ້ຈັດການເຈລະຈາເປັນປະຈຳຢູ່ນະຄອນຫຼວງມິນສ໌ຂອງເບລາຣູຊີ. ທ່ານ ມາຕິນ ຊາດິກ ຜູ້ຕາງໜ້າພິເສດຂອງອົງການຄວາມໝັ້ນຄົງ ແລະ ການຮ່ວມມືເອີຣົບ ກ່າວວ່າ: ຫວ່າງມໍ່ໆນີ້ ການລະເມີດສັນຍາຢຸດຍິງຢູ່ເຂດປະທະກັນທາງພາກຕາເວັນອອກຂອງອູແກຣນໄດ້ຫຼຸດໜ້ອຍລົງຢ່າງຫຼວງຫຼາຍ, ສະຖານະການຄວາມໝັ້ນຄົງຢູ່ເຂດດັ່ງກ່າວດີຂຶ້ນກວ່າເກົ່າ.

ທ່ານ ຊາດິກ ກ່າວໃນການຖະແຫຼງຂ່າວຫຼັງການເຈລະຈາວ່າ: ຍ້ອນວ່າໜ່ວຍງານພົວພັນສາມຝ່າຍໄດ້ເຈລະຈາ ແລະ ບັນລຸການຢຸດຍິງໃນລະດູການເກັບກ່ຽວ ແລະ ສົກຮຽນໃໝ່ໃນຕົ້ນລະດູຮ້ອນປີນີ້, ນັບແຕ່ເດືອນມິຖຸນາປີນີ້ເປັນຕົ້ນມາ ສະພາບການເສຍຊີວິດ ແລະ ບາດເຈັບຂອງປະຊາຊົນຢູ່ເຂດຕາເວັນອອກອູແກຣນກໍຫຼຸດໜ້ອຍລົງຢ່າງຈະແຈ້ງ. ພາກສ່ວນທີ່ກ່ຽວຂ້ອງຂອງອົງການສະຫະປະຊາຊາດເປີດເຜີຍວ່າ: ເດືອນກັນຍາຜ່ານມາ, ຢູ່ທ້ອງຖິ່ນດັ່ງກ່າວມີປະຊາຊົນພຽງແຕ່ 2 ຄົນເສຍຊີວິດ ແລະ ອີກ 16 ຄົນບາດເຈັບຍ້ອນເຫດການປະທະກັນ ເຊິ່ງເປັນສະຖິຕິຕໍ່າສຸດນັບແຕ່ເຂດດັ່ງກ່າວເກີດການປະທະກັນດ້ວຍກຳລັງອາວຸດເປັນຕົ້ນມາ.

ທ່ານ ຊາດິກ ຢືນຢັນວ່າ: ໜ່ວຍງານພົວພັນສາມຝ່າຍຈະສືບຕໍ່ສຸມທຸກຄວາມພະຍາຍາມເພື່ອຮັບປະກັນໃຫ້ຝ່າຍຕ່າງໆເຄົາລົບ ແລະ ປະຕິບັດຕາມກົນໄກຢຸດຍິງທີ່ບໍ່ມີເວລາຈຳກັດ.