ນາຍົກລັດຖະມົນຕີປາແລັສຕິນຍື່ນໜັງສືລາອອກ ຫລັງເຫດການຄວາມຮຸນແຮງຢູ່ເຂດເວສແບງ ແລະ ສົງຄາມຢູ່ກາຊາ

      ທ່ານ ມູຮໍາໝັດ ຊາເຕເຢ (Mohammad Shtayyeh) ນາຍົກລັດຖະມົນຕີປາແລັສຕິນ ປະກາດຍື່ນໜັງສືລາອອກຈາກຕໍາແໜ່ງໃນວັນທີ 26 ກຸມພາ ທ່າມກາງສະຖານະການຄວາມຮຸນແຮງຢູ່ເຂດເວສແບງ ແລະ ສົງຄາມລະຫວ່າງອິດສະລາແອນ ແລະ ກຸ່ມຮາມັດທີ່ຍັງດໍາເນີນຕໍ່ໄປຢ່າງດຸເດືອດ.

      ທ່ານ ຊາເຕເຢ ໂພສຂໍ້ຄວາມໃນ Facebook ໂດຍລະບຸວ່າ: ໃນມື້ນີ້ ທ່ານໄດ້ຍື່ນໜັງສືລາອອກເປັນລາຍລັກອັກສອນຕໍ່ປະທານາທິບໍດີ ມາມູດ ອັບບາສ ໂດຍໃຫ້ເຫດຜົນໃນການລາອອກຈາກ “ເຫດການຄວາມຮຸນແຮງທີ່ຍົກລະດັບຂຶ້ນຢູ່ເຂດເວສແບງ ແລະ ນະຄອນເຢຣູຊາເລັມ ລວມທັງສົງຄາມ, ການຂ້າລ້າງເຜົ່າພັນ ແລະ ຄວາມອຶດຫິວຢູ່ເຂດກາຊາ”.

     ການຍື່ນໜັງສືລາອອກມີຂຶ້ນຫລັງຈາກອົງການບໍລິຫານປາແລັສຕິນ (Palestinian Authority) ເຊິ່ງປັດຈຸບັນຖືກເບິ່ງວ່າມີການສໍ້ລາດບັງຫລວງນັ້ນ ກໍາລັງຜະເຊີນແຮງກົດດັນຢ່າງໜັກຈາກອາເມລິກາໃຫ້ມີການປະຕິຮູບ ແລະ ພັດທະນາຮູບແບບການປົກຄອງຢູ່ເຂດເວສແບງ ໂດຍຢ້ອນກັບໄປເດືອນຕຸລາ 2023, ທ່ານ ຊາເຕເຢ ເຄີຍກ່າວວ່າ: “ບໍ່ມີທາງແກ້ໄຂຄວາມຂັດແຍ່ງລະຫວ່າງອິດສະລາແອນກັບປາແລັສຕິນໄດ້ ຖ້າປາສະຈາກອາເມລິກາ”, ແຕ່ທ່ານເບິ່ງວ່າລັດຖະບານອາເມລິກາຊຸດປັດຈຸບັນບໍ່ມີເຈດຕະນາທາງການເມືອງທີ່ຈະຢຸດຄວາມຂັດແຍ່ງທີ່ເກີດຂຶ້ນ.

     ເຖິງຢ່າງໃດກໍຕາມ, ໜັງສືລາອອກດັ່ງກ່າວຈະຕ້ອງລໍຖ້າການອະນຸມັດຈາກປະທານາທິບໍດີ ອັບບາສ ໂດຍທ່ານສາມາດຂໍໃຫ້ທ່ານ ຊາເຕເຢ ດໍາລົງຕໍາແໜ່ງຮັກສາການຕໍ່ໄປໄດ້ ຈົນກວ່າຈະມີການແຕ່ງຕັ້ງຜູ້ດໍາລົງຕໍາແໜ່ງແທນຖາວອນໃນອະນາຄົດ.

ອ້າງອີງ:

• https://www.reuters.com/world/middle-east/palestinian-prime-minister-submits-resignation-president-abbas-2024-02-26/
• https://www.cnbc.com/2024/02/26/palestinian-prime-minister-shtayyeh-resigns.html