ຫວຽດນາມຕັ້ງເປົ້າຜະລິດໄຮໂດຣເຈນສູງສຸດ 500.000 ໂຕນຕໍ່ປີ ຕາມແຜນປ່ຽນຜ່ານພະລັງງານ

     ຫວຽດນາມມີເປົ້າໝາຍຈະຜະລິດໄຮໂດຣເຈນ 100.000-500.000 ໂຕນຕໍ່ປີ ພາຍໃນປີ 2030 ເຊິ່ງເປັນສ່ວນໜຶ່ງຂອງຄວາມພະຍາຍາມປ່ຽນຜ່ານພະລັງງານຕາມກົນລະຍຸດການພັດທະນາໄຮໂດຣເຈນຂອງປະເທດ ທີ່ນໍາມາໃຊ້ໃນຕົ້ນເດືອນຜ່ານມາ.

     ວັນທີ 25 ກຸມພາ, ສໍານັກຂ່າວຕ່າງປະເທດລາຍງານວ່າ: ລັດຖະບານຫວຽດນາມລະບຸໃນເອກະສານທີ່ໃຫ້ລາຍລະອຽດກ່ຽວກັບກົນລະຍຸດວ່າ: ຜົນຜະລິດໄຮໂດຣເຈນຂອງປະເທດຈະເພີ່ມຂຶ້ນເປັນ 10-20 ລ້ານໂຕນ ພາຍໃນປີ 2050 ເຊິ່ງລວມທັງໄຮໂດຣເຈນສີຂຽວນໍາ.

     “ການຜະລິດ, ການຈໍາໜ່າຍ ແລະ ການໃຊ້ໄຮໂດຣເຈນ ຈະຊ່ວຍໃຫ້ຫວຽດນາມບັນລຸເປົ້າໝາຍລະດັບປະເທດ ທັງດ້ານການປ່ຽນແປງສະພາບອາກາດ, ການເຕີບໃຫຍ່ທາງເສດຖະກິດທີ່ເປັນມິດຕໍ່ສິ່ງແວດລ້ອມ ແລະ ການປ່ອຍແກັສເຮືອນແກ້ວສຸດທິເປັນສູນ ພາຍໃນປີ 2050” ເອກະສານຂອງລັດຖະບານລະບຸ.

     ທັງນີ້, ໄຮໂດຣເຈນ ຈັດຢູ່ໃນປະເພດ “ພະລັງງານທີ່ເປັນມິດຕໍ່ສິ່ງແວດລ້ອມ” ເມື່ອຜ່ານຂະບວນການເອເລັກໂຕຣນິກ ຫລື ການແຍກໄຮໂດຣເຈນກັບອົກຊີພາຍໃນໂມເລກຸນນໍ້າ ທີ່ຂັບເຄື່ອນດ້ວຍພະລັງງານໝູນວຽນ. ອີກທັງໄຮໂດຣເຈນຍັງຖືເບິ່ງວ່າມີຄວາມສໍາຄັນຫລາຍໃນການຊ່ວຍຫລຸດການປ່ອຍກາກບອນໃນອຸດສາຫະກໍາ, ເຖິງວ່າເຕັກໂນໂລຊີດັ່ງກ່າວຍັງມີລາຄາແພງ ແລະ ຢູ່ໃນໄລຍະເລີ່ມຕົ້ນຂອງການພັດທະນາກໍຕາມ.

     ເອກະສານຂອງລັດຖະບານຮາໂນ້ຍ ລະບຸອີກວ່າ: ຜົນຜະລິດໄຮໂດຣເຈນ ຈະເຂົ້າມາແທນແກັສທໍາມະຊາດ ແລະ ຖ່ານຫີນໃນໂຮງໄຟຟ້າບາງສ່ວນ ພາຍໃນປີ 2030 ຕະຫລອດຈົນນໍາໄປໃຊ້ໃນການຂົນສົ່ງ ແລະ ການຜະລິດປຸ໋ຍ, ເຫລັກ ແລະ ຊີມັງ.

     ຍິ່ງໄປກວ່ານັ້ນ, ໄຮໂດຣເຈນ ຈະມີອັດຕາ 10% ຂອງການຜະລິດໄຟຟ້າໃນຫວຽດນາມ ພາຍໃນປີ 2050 ເຊັ່ນກັນ.