ຣັດເຊຍຖະຫລົ່ມຜູ້ນຳຫົວຮຸນແຮງ ຄົນສຳຄັນໃນຊີຣີບາດເຈັບສາຫັດ
ກອງທັບຣັດເຊຍເປີດເຜີຍວ່າ: ຜູ້ນຳກຸ່ມຮາຍັດ ຕາຣີ ອຳຊາມ ໄດ້ຮັບບາດເຈັບສາຫັດຈາກການໂຈມຕີທາງອາກາດຢູ່ພາກເໜືອຂອງຊີຣີ ໃນຕົ້ນອາທິດນີ້, ແຕ່ຕໍ່ມາກຸ່ມຫົວຮຸນແຮງອອກມາປະຕິເສດ.
ສຳນັກຂ່າວຕ່າງປະເທດລາຍງານຈາກນະຄອນຫລວງມົດສະກູ ປະເທດຣັດເຊຍ ໃນວັນທີ 5 ຕຸລາວ່າ: ພົນຕີ ອິກໍ ໂກນາເຊນຄອບ ໂຄສົກກະຊວງປ້ອງກັນປະເທດຣັດເຊຍ ກ່າວໃນວັນທີ 4 ຕຸລາວ່າ: ຜົນຂອງປະຕິບັດການໂຈມຕີທາງອາກາດຢູ່ແຂວງອິດລິບ ທາງຕອນເໜືອຂອງຊີຣີ ໃນວັນທີ 3 ຕຸລາ ນຳໄປສູ່ການເສຍຊີວິດຂອງສະມາຊິກລະດັບແກນນຳພາກສະໜາມ 12 ຄົນຂອງກຸ່ມຮາຍັດ ຕາຣີ ອຳຊາມ (HTS) ເຊິ່ງເປັນເຄືອຂ່າຍໃນຊີຣີຂອງກຸ່ມອານກໍອີດະ. ຂະນະທີ່ທ່ານ ອາບູ ໂມຮຳເໝັດ ອຳໂກລານີ ໄດ້ຮັບບາດເຈັບສາຫັດ.
ເຖິງຢ່າງໃດກໍຕາມ, ກຸ່ມ HTS ອອກຖະແຫລງການໃນເວລາຕໍ່ມາວ່າ: ທ່ານ ໂກລານີ ສະບາຍດີ ແລະ ຍັງປະຕິບັດໜ້າທີ່ໄດ້ຕາມປົກກະຕິ. ທັງນີ້ ປະຕິບັດການໂຈມຕີທາງອາກາດໃນວັນດັ່ງກ່າວຂອງກອງທັບຣັດເຊຍ ໃຊ້ເຮືອບິນຂັບໄລ່ 2 ລຳ ຮຸ່ນ ຊູ-34 ແລະ ຊູ-35 ແລະ ເປັນໜຶ່ງໃນພາລະກິດຂອງປະຕິບັດການປົດປ່ອຍແຂວງອິດລິບຈາກກຸ່ມກໍ່ການຮ້າຍ ທີ່ດຳເນີນມາແຕ່ວັນທີ 18 ກັນຍາຜ່ານມາ, ຫລັງເຈົ້າໜ້າທີ່ຂອງຣັດເຊຍ 3 ຄົນເສຍຊີວິດຈາກການໂຈມຕີຂອງກຸ່ມກໍ່ການຮ້າຍ.
ທັງນີ້, ຢ້ອນກັບໄປໃນເດືອນມິຖຸນາຜ່ານມາ, ຣັດເຊຍເປີດເຜີຍວ່າ: ມີຄວາມເປັນໄປໄດ້ສູງທີ່ທ່ານ ອາບູ ບາກາ ອຳບັກດາດີ ຜູ້ນຳສູງສຸດຂອງກຸ່ມ IS ເສຍຊີວິດໃນປະຕິບັດການໂຈມຕີທາງອາກາດຢູ່ເມືອງຣັກກາ ເຊິ່ງເປັນຖານທີ່ໝັ້ນສຳຄັນຂອງກຸ່ມ IS ຢູ່ຊີຣີ, ແຕ່ອາເມລິກາຢືນຢັນປະຕິເສດ, ຂະນະທີ່ກຸ່ມ IS ເຜີຍແຜ່ຄລິບສຽງໃນອາທິດຜ່ານມາ ອ້າງວ່າເປັນສຽງຂອງ ບັກດາດີ ປະກາດວ່າ: ຍັງມີຊີວິດຢູ່.
