ມອບຢາໄອສ໌ 533 ກິໂລກຣາມ ທີ່ຢຶດມາໄດ້ ໃຫ້ພະແນກຕຳຫລວດສະກັດກັ້ນ ແລະ ຕ້ານຢາເສບຕິດ ປກສ ນວ
ວັນທີ 19 ກຸມພາ 2024 ນີ້, ປ້ອງກັນຄວາມສະຫງົບນະຄອນຫລວງ ລາຍງານວ່າ: ວັນທີ 22 ມັງກອນ ຜ່ານມາກອງຮ້ອຍຊາຍແດນ 243 ທະຫານນະຄອນຫລວງວຽງຈັນ ໄດ້ມອບຢາໄອສ໌ ທີ່ຢຶດໄດ້ ຈຳນວນ 13 ເປົາ ນ້ຳໜັກ 533 ກິໂລກຣາມ ໃຫ້ພະແນກຕຳຫລວດສະກັດກັ້ນ ແລະ ຕ້ານຢາເສບຕິດ ປກສ ນະຄອນຫລວງວຽງຈັນ, ໂດຍການເຂົ້າຮ່ວມ ຂອງ ພັທ ຄຳວົງ ໄຊຍະເພັດ ຫົວໜ້າພະແນກປ້ອງກັນພາຍໃນ ກອງບັນຊາການ ທະຫານນະຄອນຫລວງວຽງຈັນ ແລະ ພັທ ພົມມີ ແສນຈົງຮັກ ຫົວໜ້າພະແນກຕຳຫລວດສະກັດກັ້ນ ແລະ ຕ້ານຢາເສບຕິດ ຫ້ອງຕຳຫລວດ ປ້ອງກັນຄວາມສະຫງົບ ນະຄອນຫລວງວຽງຈັນ.
ເຊິ່ງຢາໄອສ໌ ຈຳນວນນີ້ ສືບເນື່ອງມາຈາກ, ວັນທີ 14 ມັງກອນ 2024 ເວລາ 22:30 ໂມງເຈົ້າໜ້າທີ່ກອງຮ້ອຍຊາຍແດນ 243 ທະຫານນະຄອນຫລວງວຽງຈັນ ໄດ້ອອກກວດກາລາດລະເວນໃນຂອບເຂດຮັບຜິດ ຊອບຕາມລຳແມ່ນ້ຳຂອງ ພົບເຫັນເຮືອ 1 ລໍາ ພ້ອມຄົນ 3 ຄົນ ກໍາລັງຂັບຂີ່ເຮືອອອກໄປກາງແມ່ນໍ້າຂອງມຸ່ງໜ້າໄປປະເທດເພື່ອນບ້ານ, ດັ່ງນັ້ນຈຶ່ງໄດ້ຂັບຂີ່ເຮືອໄລ່ສະກັດຈັບເພື່ອຈະກວດກາ ແຕ່ຍ້ອນຄວາມມືດພວກກ່ຽວຈຶ່ງລົບໜີໄປໄດ້, ຈາກນັ້ນເຈົ້າໜ້າທີ່ກອງຮ້ອຍຊາຍແດນ 243 ຈຶ່ງໄດ້ກັບມາກວດສອບຕາມແຄມຝັ່ງແມ່ນ້ຳຂອງຈຶ່ງພົບເຫັນ ຢາເສບຕິດ ປະເພດຢາໄອສ໌ ຈໍານວນ 13 ເປົາ, ໜັກ 533 ກິໂລກຣາມ ກອງຢູ່ແຄມແມ່ນໍ້າຂອງລະຫວ່າງ ບ້ານນາໄຮ່ ຫາ ບ້ານສີຖານໃຕ້ ເມືອງຫາດຊາຍຟອງ ນະຄອນຫລວງວຽງຈັນ ແລະ ໄດ້ສົ່ງ-ມອບໃຫ້ ກອງບັນຊາການທະຫານ ນະຄອນຫລວງວຽງຈັນ ເກັບມ້ຽນໄວ້ ແລະ ໄດ້ມອບໃຫ້ພະແນກຕຳຫລວດສະກັດກັ້ນ ແລະ ຕ້ານຢາເສບຕິດ ປກສ ນະຄອນຫລວງວຽງຈັນ ດຳເນີນການຕາມກົດໝາຍຕໍ່ໄປ.
